နောင်ချို ခမရ ၁၁၅ တပ်ရင်းကို PDF များဝင်တိုက်၊ မြင်းမူနှင့်မိုးကုတ်တို့တွင်လည်း စစ်ကောင်စီတပ်များ မိုင်းခွဲပစ်ခတ်တိုက်ခိုက်ခံရပြီး အရာရှိ အပါအဝင် စစ်သား ၁၁ ဦးသေဆုံး၊ မုံရွာတွင်လည်း စစ်ကောင်စီတပ်ကို လက်ပစ်ဗုံးဖြင့်ပစ်

ရန်ကုန်၊ မတ် ၁၇

ရှမ်းပြည်နယ်၊ နောင်ချိုမြို့နယ်ရှိ ခြေမြန်တပ်ရင်း ၁၁၅ တပ်ရင်းကို PDF များက ယမန်နေ့ မတ် ၁၆ ရက်နေ့ ညပိုင်းတွင် ဝင်ရောက်တိုက်ခိုက်ခဲ့ကြောင်း နောင်ချိုPDF တပ်ဖွဲ့ဝင်တစ်ဦးက ပြောသည်။

နောင်ချိုမြို့ရှိ ခမရ ၁၁၅ တပ်ရင်းအဝင်ဂိတ်ကိုမတ်လ ၁၆ ရက်နေ့ ည ၁၁ နာရီခွဲအချိန်တွင် PDF များက ဝင်ရောက်ပစ်ခတ်ခဲ့ကြောင်း၊ ယင်းသို့ ပစ်ခတ်မှုကြောင့် ဂိတ်စောင့် တပ်သား ၁ ဦးသေဆုံးသွားပြီး အခြား ၁ ဦးလည်း ဒဏ်ရာရရှိသွားကြောင်း၊ အပြန်အလှန် ပစ်ခတ်မှု များဖြစ်ပွားခဲ့သော်လည်း PDF များ အထိအခိုက်မရှိ ပြန်လည် ဆုတ်ခွာနိုင်ခဲ့ကြောင်း သိရှိရသည်။

အလားတူ ယနေ့ မတ်လ ၁၇ ရက်နေ့ နံနက် ၉ နာရီအချိန် စစ်ကိုင်းတိုင်း၊ မြင်းမူမြို့နယ်၊ ဝမ်းပြည့်ကျေးရွာနှင့် အလ္လကပ္ပကျေးရွာကြားသို့ မိုင်းရှင်းလင်းရေး လာရောက်သော စစ်ကောင်စီတပ်သား ၁၀ ဦးကို မြောင်မြို့နယ် တော်လှန်ရေးတပ် MRA နှင့် Knight Commanders တော်လှန်ရေးညီနောင်တပ်ဖွဲ့က မိုင်းဆွဲတိုက်ခိုက်ရာ စစ်သား ၇ ဦးသေဆုံးသည်ကို အတည်ပြုနိုင်ခဲ့ကြောင်း မြောင်မြို့နယ် တော်လှန်ရေးတပ်က သတင်းထုတ်ပြန်သည်။

ထို့ပြင် မတ်လ ၁၅ ရက်နေ့ မွန်းလွဲ ၁၂ နာရီ ၅၉ မိနစ်အချိန် မန္တလေးမှ မိုးကုတ်သို့ တက်လာသော စစ်ကောင်စီကား ၂ စီးကို ပဒေသာရှေ့ထွက် မိုင်း ၃ လုံးခွဲ တိုက်ခိုက်ရာ အရာရှိပါအဝင် စစ်ကောင်စီတပ်ဖွဲ့ဝင် ၃ ဦးသေဆုံးကြောင်း ဗိုလ်လင်းယုန်အဖွဲ့က သတင်းထုတ်ပြန်သည်။

ထို့ပြင် မတ်လ ၁၇ရက်နေ့ မုံရွာမြို့အတွင်း စစ်ကောင်စီတပ်များ တပ်စွဲထားသော ကန်သာယာနှင့်အ-ထ-က အမှတ်၂စာသင်ကျောင်းတို့တွင်နာနတ်သီးတစ်လုံးစီဖြင့် Unity Force Monywaနှင့်Brother Defense Forceတို့မှလက်ပစ်မိုင်းများဖြင့်ဖောက်ခွဲတိုက်ခိုက်ခဲ့ကြောင်း၊ စစ်ကောင်စီတပ်က ရမ်းသမ်းပစ်ခတ်မှုများ လုပ်ဆောင်ခဲ့သော်လည်း ပြည်သူ့ကာကွယ်ရေးတပ်ဖွဲ့ဝင်များ ဘေးကင်းကြောင်း၊ အလှူရှင်များအနေဖြင့်လည်း PDF များကို ထောက်ပံ့လှူဒါန်းကြရန် Unity Force Monywaမှ ဗိုလ်အောက်ဆွဲက ရန်ကုန်ခေတ်သစ်သို့ ပြောဆိုသည်။

ဓာတ်ပုံ- အကြမ်းဖက်စစ်ကောင်စီတပ်သားများ။

Photo – Agencies