ရန်ကုန်၊ မတ် ၂၄
ကရင်နီပြည်နယ်တွင် ၂၀၂၂ ခုနှစ်၊ မတ်လ တတိယပတ်အတွင်း အကြမ်းဖက်စစ်ကောင်စီတပ်နှင့် ကရင်နီပူးပေါင်းတပ်ဖွဲ့များကြား တိုက်ပွဲများတွင် စစ်ကောင်စီဘက်မှ ၇ ဦးထက်မနည်းသေဆုံးကာ ထိခိုက်ဒဏ်ရာရသူများရှိကြောင်း ကရင်နီအမျိုးသားများကာကွယ်ရေးတပ် KNDF က သတင်းထုတ်ပြန်သည်။
မတ်လ ၁၇ ရက်နှင့် ၁၈ ရက်များတွင် ဖရူဆိုမြို့မရဲစခန်းနှင့် ခမရ (၅၃၁) တပ်ရင်းများကို ကရင်နီတပ်မတော်နှင့် KNDF က ဝင်ရောက်တိုက်ခိုက်ခဲ့ပြီး တိုက်ခိုက်မှု ၂ ကြိမ်တွင် စစ်သား ၅ ဦး သေဆုံးခဲ့ကြောင်း သိရှိရသည်။
မတ်လ ၁၈ ရက် နံနကတွင် မိုးဗြဲ၊ ဝါရီဆူးဖလိုင်ကျေးရွာတွင် တပ်စွဲထားသော အကြမ်းဖက်စစ်ကောင်စီတပ်နှင့် KNDF တပ်ဖွဲ့များ ထိတွေ့တိုက်ပွဲဖြစ်ပွားခဲ့ကြောင်း စစ်ကောင်စီဘက်မှ ထိခိုက်ကျဆုံးမှုများကို အတည်မပြုနိုင်ကြောင်း KNDF က ဆိုသည်။
မတ်လ ၁၉ ရက်နေ့နှင့် ၂၀ ရက်နေ့ နံနက် ၅ နာရီခွဲတွင် လွိုင်ကော်၊ ကယန်းသာယာလမ်းခွဲအနီးရှိ စစ်ဆေးရေးဂိတ်အနီးတွင် စစ်ကောင်စီတပ်နှင့် KA၊ KNDF ပူးပေါင်းတပ်ဖွဲ့ကြား ၂ ကြိမ် တိုက်ပွဲဖြစ်ပွားခဲ့ပြီး စစ်သား ၂ ဦး သေဆုံးခဲ့ကြောင်း၊ မတ်လ ၂၁ ရက် ည ၆ နာရီတွင် လွိုင်ကော်၊ လွယ်တမူကျေးရွာအနီးတွင်လည်း တိုက်ပွဲဖြစ်ပွားကြောင်း၊ မတ်လ ၂၂ ရက် ည ၈ နာရီတွင် နန်းမယ်ခုံ၊ နန့်စံခန်းကျေးရွာသို့ စစ်ကြောင်းထိုးလာသော စစ်ကောင်စီတပ်ဖွဲ့ကို KNDF က ပြောက်ကျားတိုက်ခိုက်ရာ စစ်ကောင်စီဘက်မှ ထိခိုက်မှုများ ရှိကြောင်း KNDF က ထုတ်ပြန်သည်။
စစ်ကောင်စီ၏ တပ်မ ၆၆ စစ်ကြောင်းသည် ဒီးမော့ဆိုမြို့နယ် နောင်ပုလဲနှင့် ဆိုဘောသဲကျေးရွာများသို့ ရောက်ရှိလာပြီး တာဝေးပစ်အမြှောက်များ၊ ဒုံးများဖြင့် တိုက်ခိုက်မှုများအပြင် တပ်အင်အားဖြည့်တင်းလျှက်ရှိကြောင်း KNDF က ယနေ့ သတင်းထုတ်ပြန်သည်။
ဓါတ်ပုံ – ကရင်နီပူးပေါင်းတပ်ဖွဲ့ဝင်များ
