ရန်ကုန်၊ မတ် ၂၄
ရန်ကုန်ခေတ်သစ်အယ်ဒီတာဟောင်း မခင်နှင်းကြည်သာ နေထိုင်ဖူးခဲ့သည့် စမ်းချောင်းမြို့နယ်၊ မြင့်မိုရ်လမ်း ၊ အမှတ် ၇ မင်းတိရိစ္ဆာန်ဆေးကုခန်းအိမ်ကိုမတ်လ ၂၃ ရက်နေ့ နံနက် ၀ရမ်းစာလာကပ်ပြီး ချိတ်ပိတ်သွားကြောင်း ဒေသခံများက ပြောသည်။
“အမှတ် ၇ မြင့်မိုရ်လမ်း နေအိမ်ကို မနေ့က နံနက်ပိုင်းက ရဲကား၊ စစ်ကား ၇ စီးနဲ့ လာပြီး ဝရမ်း စာလာကပ်သွားသွားပါတယ်။ အင်အားကတော့ အတော်များတယ်” ဟု မြင့်မိုရ်လမ်းအတွင်း နေထိုင်သူတစ်ဦးက ပြောသည်။
အဆိုပါ၀ရမ်းစာတွင် အယ်ဒီတာဟောင်း မခင်နှင်းကြည်သာကို ပုဒ်မ ၁၂၄ (က) ဖြင့် အနောက်ပိုင်းခရိုင်တရားရုံးတွင် အမှုဖွင့်ထားကြောင်း ဖော်ပြထားသည်။
အဆိုပါချိတ်ပိတ်ခံရသော နေအိမ်သည် မခင်နှင်းကြည်သာ၏ မိဘများ ပိုင်ဆိုင်သော နေအိမ်သာဖြစ်ကြောင်းသိရှိရသည်။
အလားတူ မကြာသေးမီကလည်း အယ်ဒီတာဟောင်း မခင်နှင်းကြည်သာ ငှားနေခဲ့ဖူးသော အလုံမြို့နယ်မှ တိုက်ခန်းတစ်ခုကို ချိတ်ပိတ်မှု ဆောင်ရွက်ခဲ့သည်။
ရန်ကုန်ခေတ်သစ်သတင်းဌာန၏ တည်ထောင်သူနှင့်အယ်ဒီတာချုပ် သာလွန်ဇောင်းထက်၊ အယ်ဒီတာ ကံဇော်၊ အယ်ဒီတာဟောင်း မခင်နှင်းကြည်သာတို့ကို ပုဒ်မ ၁၂၄ (က) ၊ ပုဒ်မ ၁၇ (၁) ၊ အကြမ်းဖက်တိုက်ဖျက်ရေးဥပဒေ ပုဒ်မ ၅၀ (က) ၊ ၅၂ (က)။ ပုဒ်မ ၅၀၅ (က) တို့ဖြင့် အမှုဖွင့်ထားကြောင်း၊ အဆိုပါ ပုဒ်မများသည် ထောင်ဒဏ် တစ်သက်ချမှတ်နိုင်သော ပုဒ်မများဖြစ်ကြောင်း သိရှိရသည်။
ခေတ်သစ်အယ်ဒီတာချုပ် သာလွန်ဇောင်းထက်၏ စမ်းချောင်းမြို့နယ်၊ မင်း လမ်း၊ အိမ်အမှတ် ၆၅ ၊ ၅ လွှာ (A) နေအိမ်ကို ဖေဖော်ဝါရီလအတွင်း အကြမ်းဖက် စစ်ကောင်စီ ချိတ်ပိတ်ခဲ့သည်။
