ရန်ကုန်၊ မတ် ၂၄
ရန်ကုန် လှိုင်သာယာ အနောက်ပိုင်မြို့နယ် ၁၄ ရပ်ကွက် အပိုင် ၉ ၊ ငွေပြည်သာယာလမ်းရှိ ကျူးကျဲတဲများကို ၂၀၂၂ ခုနှစ် ဇန်နဝါရီလအတွင်းက အတင်းအဓမ္မဖျက်သိမ်းခဲ့သည့် မြေနေရာများကို စစ်တပ်၊ ရပ်ကွက်အုပ်ချုပ်ရေးမှူးနှင့် စည်ပင်ပူးပေါင်းကာ အဆိုပါ မြေကွက်များကို အကွက်ရိုက် ပြန်ရောင်းစားနေကြောင်း ဒေသခံများက ရန်ကုန်ခေတ်သစ်သို့ ပြောဆိုသည်။
“ခု ပေ ၂၀ ၊ ပေ ၆၀ တစ်ကွက်ကို ၁၇၅ သိန်းနဲ့ ရောင်းစားထားတယ်။ အရင်က ကျူးကျော်တဲတွေထဲမှာ စည်ပင်နဲ့ အုပ်ချုပ်ရေးမှူးကို လာဘ်ထိုးပြီး အဆောင်တွေ ဆောက်ထားတာ ကြာပြီ ။ ဖျက်တော့ အဆောင်တွေက မဖျက်ရဘဲ ကျွန်တော်တို့ပဲ ဖျက်ရတာ။ ၂၀၀၉ ကတည်းက ကျွန်တော်တို့က နေခဲ့တာ စမတ်ကတ်လည်း ရထားပြီးသား” ဟု ၂၀၂၂ ခုနှစ် ဇန်နဝါရီ ၁ရက်နေ့တွင် အပြီးဖယ်ပေးခဲ့ရသူ တစ်ဦးက ရန်ကုန်ခေတ်သစ်သို့ ပြောကြားသည်။
ကျူးကျော်ဟု ဆိုကာ ဖယ်ရှားခံရသူများသည် စမတ်ကတ် ရထားသူများ ဖြစ်ပြီး အိမ်ခြေ ၂၀၅ ခု အဖျက်ခံရလိုက်ခြင်းဖြစ်ကြောင်း၊ လာဖျက်ခိုင်းသူများမှာ အကြမ်းဖက်စစ်တပ်၊ ရဲ၊ စည်ပင်၊ အုပ်ချုပ်ရေးမှုန်းနှင့် လူမိုက်အဖွဲ့များ ဖြစ်ကြောင်း၊ လက်ရှိ အဆိုပါ နေရာများတွင် အကွက်ရိုက် ပြန်ရောင်းစားနေသည်ကို တွေ့ရသည့်အတွက် မတရားလုပ်ခံရသည်ဟု ခံစားရကြောင်း နေအိမ်ဖျက်ဆီးခံရသူများက ပြောဆိုသည်။
လက်ရှိ အကွက်ရိုက် ရောင်းစားထားသည့် မြေနေရာတွင် ၂ နေရာ ခြံစည်းရိုးလာခတ်သွားသည်ကို တွေ့ရပြီး အကွက်များ အကုန်မရိုက်ထားရသေးကြောင်း ဒေသခံများ ထံမှ သိရှိရသည်။
