ရန်ကုန်၊ မတ် ၂၄
ကရင်ပြည်နယ်အတွင်း အပစ်အခတ် မဖြစ်စေရေးအတွက် ဒေသတွင်း ညှိနှိုင်းရေးအဖွဲ့ ဖွဲ့စည်းထားပြီး ယင်းအဖွဲ့၌ ကရင်အမျိုးသားအစည်းအရုံး KNU ပါဝင်ရန် အကြမ်းဖက်စစ်ကောင်စီက မတ်လ ၂၃ ရက်နေ့တွင် စာပို့ကမ်းလှမ်းခဲ့ပြီး စစ်ကောင်စီတပ်သည် ပါးစပ်က ပြောပြီး မြေပြင်တွင် လုပ်ချင်ရာ လုပ်နေခြင်း ဖြစ်ကြောင်း KNU က တုံ့ပြန် ပြောဆိုလိုက်သည်။
“အပစ်အခတ်ရပ်စဲရေးဆိုတာကြီးက ပြောတာလည်း အက်ကြောင်းထပ်နေပြီလေ၊ ကျနော်တို့လည်း လက်မှတ်ထိုးထားတာ အများကြီးပဲ၊ တပြည်လုံး အပစ်အခတ်ရပ်စဲရေးတောင် လက်မှတ်ထိုးတာ နိုင်ငံတကာရဲ့ ရှေ့မှောက်မှာ။ ထိုးပြီးတော့လည်း လုပ်ချင်ရာ လုပ်သွားတာပဲလေ။ အဲဒါကြောင့်မို့လို့ အခုက ဒီအခြေ အနေထိ ရောက်လာတာလေ၊ အာဏာသိမ်းတာကနေ အခြေအနေက ဘယ်လိုမှ ထိန်းမနိုင် သိမ်းမရ ဖြစ်သွားတာပေါ့လေ။ ကျနော်ပြောချင်တာက ကိုယ့်ဒေသ တခုတည်းမှာ လာပြီးတော့ ကွက်ကွက်လေးလုပ်လို့မရဘူးဗျ၊ တတိုင်း ပြည်လုံးမှာ လိုနေတာ။ အဲဒါကြောင့်မို့ တတိုင်းပြည်လုံးမှာ လုပ်မှာလား မလုပ်ဘူးဆိုရင် လာပြီးတော့ စကားကြော ရှည်မနေနဲ့ အလကား အချိန်ကုန်တယ်” ဟု ကရင်အမျိုးသားအစည်းအရုံး ပြောခွင့်ရ ပဒိုစောတောနီးက ရန်ကုန်ခေတ်သစ်သတင်းဌာနသို့ ပြောဆိုသည်။
လေးကေ့ကော်နှင့် ကော့ကရိတ်တောင်ပိုင်းရှိ စစ်ရှောင်ဒေသခံများ နေရပ်ပြန်နိုင်ရန်အတွက် စစ်တပ်များ ဆုတ်ခွာရန် KNU က မတ်လ ၇ ရက်နေ့တွင် သတိပေးစာထုတ်ခဲ့ပြီး စစ်ကောင်စီတပ်များသည် ဆုတ်ခွာပေးခြင်းမရှိခြင်းကြောင့် အဆိုပါဒေသများတွင် ရက်ဆက် တိုက်ပွဲများ ဖြစ်ပွားနေသည်။
“ဒါ ကျနော်တို့ ဒေသမှာပဲ ဖြစ်နေတာမဟုတ်ဘူး၊ တတိုင်းပြည်လုံး နေရာအနှံ့မှာ ဖြစ်နေတာကို ရပ်ပါ၊ အဲဒါမျိုးတွေ ရပ်ပါလို့ အရင်က ပြောထားတာ ရှိပါတယ်။ ဒါလည်း မလုပ်သေးဘူး။ ကိုယ့်ယုံကြည်ချက်ကြောင့် အကျဉ်းကျနေတဲ့သူတွေလည်း ထောင်ထဲမှာ အများကြီးရှိတယ်၊ ဒီအကျဉ်းသားတွေကို လွှတ်ပါဆိုတာလည်း အများကြီးရှိတယ်။ ဒါက အဓိက စိတ်ရင်း စေတနာပေါ့၊ အနည်း ဆုံးအဆင့် ပြီးခဲ့တဲ့ မတ်လ (၇) ရက်က လေးကေ့ကော်နဲ့ ကော့ကရိတ်တောင်ပိုင်းမှာ တပ်တွေဆုတ်ပါလို့ ကျနော်တို့ပြောတာက အလဟသ ပြောတာမဟုတ်ဘူးဗျ၊ တောထဲမှာ ပြေးလွှားနေရတဲ့ ကျနော်တို့ရဲ့ စစ်ရှောင်တွေ အိမ်မှာ ပြန် လာနေနိုင်ဖို့အတွက်၊ သူတို့ (စစ်ကောင်စီတပ်) ရှိနေခြင်းအားဖြင့် ဘယ်လိုမှ ပြန်လာလို့ မရဘူးလေ။ လုပ်ရပ်တွေက လူထုက လက်မခံနိုင်တဲ့အနေအထားဆိုတော့ အဲဒီမှာ ရှိနေရင် လူထုက ပြန်လာလို့ မရတော့ဘူး၊ ကျနော်တို့က အဲဒါပြောတာကို စစ်ကောင်စီဘက်က ဘာနဲ့ တုံ့ပြန်လဲဆိုတော့ တပ်တွေလွှတ်တာနဲ့ ပြန်တုံ့ပြန်တယ်ဆိုတော့ တိုက်ပွဲက နေ့တိုင်း ဖြစ်နေတာ” ဟု ပဒိုစောတောနီးက ရှင်းပြသည်။
အကြမ်းဖက်စစ်ကောင်စီ၏ လုံခြုံရေးနှင့် နယ်စပ်ရေးရာဝန်ကြီး ဗိုလ်မှူးကြီး မျိုးမင်းနောင် လက်မှတ်ဖြင့် ဘားအံမြို့ KNU ဗဟိုနှင့် တပ်မဟာများဆက်ဆံရေးရုံးထံ လိပ်မူပြီး မတ်လ ၂၃ ရက်နေ့တွင် စာပို့ ကမ်းလှမ်းခဲ့ပြီး ယနေ့နံနက်အစောပိုင်းတွင်မူ မြဝတီ၊ သင်္ဃန်းညီနောင်အခြေစိုက် ခမရ (၃၅၅) တပ်ရင်းက ထီမူထကျေးရွာအတွင်းသို့ လက်နက်ကြီးဖြင့်ပစ်ခတ်၍ ပြည်သူ ၁ ဦးသေဆုံးကာ ၃ ဦး ဒဏ်ရာရရှိခဲ့သည်။
