ရန်ကုန်၊ မတ် ၂၈
သီရိလင်္ကာနိုင်ငံတွင် မတ်လ ၃၀ ရက်၌ ကျင်းပမည့် BIMSTEC (၅) ကြိမ်မြောက် ထိပ်သီးညီလာခံသို့ မင်းအောင်လှိုင်ဦးဆောင်သော စစ်ကောင်စီကို ဖိတ်ကြားခြင်းမပြုရန် နယူးဒေလီရှိ၊ သီရိလင်္ကာသံရုံးရှေ့တွင် India for Myanmar အဖွဲ့က မတ်လ ၂၇ ရက်နေ့တွင် ဆန္ဒပြ ဖိအားပေး တောင်းဆိုကြသည်။
India 4 Myanmar သည် သီရီလင်္ကာနိုင်ငံ အပါအ၀င် BIMSTEC အဖွဲ့၀င်နိုင်ငံများသို့ စစ်ကောင်စီအား မြန်မာနိုင်ငံကိုယ်စားပြုအစိုးရအဖြစ် ဖိတ်ကြားမှုအပေါ် ကန့်ကွက်သည့် အိတ်ဖွင့်ပေးစာများ ပေးပို့ခြင်းကို ဖေဖော်၀ါရီ လ ကတည်းက ဆောင်ရွက်ခဲ့ကြပြီး မတ်လ (၂၃) ရက်နေ့တွင်လည်း ကမ္ဘာအရပ်ရပ်ရှိ အရပ်ဘက်အဖွဲ့အစည်း ၁၃၆ ဖွဲ့၏ ကြေညာတောင်းဆိုချက်အား ထုတ်ပြန်ခဲ့သည်။
အဆိုပါ လှုပ်ရှားမှုကြောင့် India 4 Myanmar အဖွဲ့သား ၂၁ ဦးကို အိန္ဒိယနိုင်ငံ ရဲတပ်ဖွဲ့က ၁၀ နာရီကျော်ကြာ ဖမ်းဆီးထိန်းသိမ်းထားခဲ့ကြောင်း India for Myanmar အဖွဲ့ထံမှ သိရှိရသည်။
