ရန်ကုန်၊ ဧပြီ ၈
အကြမ်းဖက်စစ်ကောင်စီက စစ်ကိုင်းတိုင်း၊ ပင်လည်ဘူးမြို့ပေါ်တွင် ယနေ့ ဧပြီလ ၈ ရက် နံနက်ပိုင်းတွင် တိုက်လေယာဉ်များဖြင့် ၃ ကြိမ် ဗုံးကျဲချတိုက်ခိုက်ခဲ့ပြီး နေအိမ် ၃ လုံးထက်မနည်း မီးလောင်ပျက်စီးနေပြီး ပြည်သူအချို့ ထိခိုက်မှုရှိနေကြောင်း ဒေသသတင်းရင်းမြစ်များထံမှ သိရှိရသည်။
ယနေ့ နံနက်အစောပိုင်း ၄ နာရီဝန်းကျင်တွင် ၁ ကြိမ်၊ ၇ နာရီဝန်းကျင်တွင် ၁ ကြိမ်၊ ၈ နာရီခန့်တွင် ၁ ကြိမ် စစ်ကောင်စီက ဗုံးကျဲတိုက်ခိုက်သဖြင့် နေအိမ်အချို့ မီးလောင်ပျက်စီးပြီး ထိခိုက်ဒဏ်ရာရသူများရှိကြောင်း ဒေသသတင်းရင်းမြစ် Kawlin Info က ရေးသားဖော်ပြသည်။
ပင်လည်ဘူးဒေသတွင် အကြမ်းဖက်စစ်ကောင်စီတပ်နှင့် ဒေသခံပြည်သူ့ကာကွယ်ရေးတပ်ဖွဲ့များကြား တိုက်ပွဲဖြစ်ပွားနေသည်မှာ ၆ ရက်ခန့်ရှိနေပြီဖြစ်ကြောင်း အင်တာနက်လိုင်းများ၊ ဖုန်းလိုင်းများ ဖြတ်တောက်ခံထားရ၍ အဆက်အသွယ်များ ပြတ်တောက်နေကြောင်း ဒေသသတင်းရင်းမြစ်ထံမှ သိရှိရသည်။
လက်ရှိတွင် ပင်လည်ဘူးဒေသသတင်းရင်းမြစ်များနှင့် အဆက်အသွယ်များပြတ်တောက်နေပြီး ဗုံးကျဲတိုက်ခိုက်ခံရမှုများကြောင့် နေအိမ်မည်မျှ မီးလောင်ပျက်စီးနေခြင်းနှင့် ပြည်သူထိခိုက်မှုစာရင်းကို ရန်ကုန်ခေတ်သစ်အနေဖြင့် သီးခြားအတည်ပြုနိုင်ခြင်းမရှိသေးပေ။
ယင်းအပြင် အကြမ်းဖက်စစ်ကောင်စီတပ်ဖွဲ့သည် စစ်ကြောင်းထိုးရာလမ်းကြောင်းရှိ ပင်လည်ဘူးမြို့နယ်၊ မံစီလေးကျေးရွာရှိ နေအိမ် ၅ လုံးကို မီးရှို့ဖျက်ဆီးသွားကြောင်းလည်း သိရှိရသည်။
