ရန်ကုန်၊ ဧပြီ ၉
အကြမ်းဖက်စစ်ကောင်စီက စီမံခန့်ခွဲလျက်ရှိသော စည်ပင်ပိုင် ရန်ကုန်မြို့တော်ဂေါက်ကွင်းကို ယနေ့ နံနက် ၆ နာရီကျော်၊ နံနက် ၇ နာရီဝန်းကျင်အချိန်တွင် ရှော့တိုက်ဒုန်းဖြင့် ပစ်ခတ်ခံရပြီး လူ ၁ ဦးထိခိုက်ကြောင်း၊ မင်္ဂလာဒုံမြို့နယ်ရှိ တပ်ပိုင်နေရာများကို ရှော့တိုက်ဒုန်း၊ ဗုံးများဖြင့် ပစ်ခတ်မှုများရှိကြောင်း ဒေသခံများနှင့် တပ်သတင်းရင်းမြစ်များထံမှ သိရှိရသည်။
“ဂေါက်ကွင်း ကွင်းအမှတ် ၁၁ ကို ဗုံးကျတယ်။ အဲဒါ ဂေါက်ကွင်းဝန်ထမ်း ၁ ဦး ထိပါတယ်။ အခုတော့ စစ်တပ်နဲ့ ရဲတွေ ရောက်နေပါတယ်။ ကွင်းအပြင်နဲ့ ကွင်းအထဲကို အခု စစ်ဆေးနေပါတယ်။ ဖြစ်တာက ၆ နာရီကျော်ကျော် ၇ နာရီထိုးခါနီးလောက်မှာဖြစ်တာ။ ကွင်းကတော့ မပိတ်ပါဘူး ဖွင့်ထားပါတယ်” ဟု ရန်ကုန်မြို့တော်ဂေါက်ကွင်းမှ တာဝန်ရှိသူတစ်ဦးက ပြောသည်။
ထို့ပြင် မင်္ဂလာဒုံလေတပ်စခန်း၊ အိမ်ထောင်သည်လိုင်းခန်းကိုလည်း ရှော့ခ်တိုက်ဒုန်းဖြင့် ပစ်ခတ်တိုက်ခိုက်မှုဖြစ်ပေါ်ခဲ့ပြီး စစ်တပ်ပိုင် ခေါက်ဆွဲစက်ရုံနားတွင်လည်း ပေါက်ကွဲမှုဖြစ်ပွားကြောင်း ဒေသခံများထံမှ သိရှိရသည်။
ရှော့ခ်တိုက်ဒုန်းဖြင့် ပေါက်ကွဲသံများကို မှော်ဘီဘက်နှင့် မြောက်ဥက္ကလာဘက်ကလည်း ကြားရကြောင်း ဒေသခံများက ဆိုကြသည်။
“မနက် ၇ နာရီ ၁၅ မိနစ်မှာ တွင် အရမ်းကျယ်တဲ့ ပေါက်ကွဲသံ လေးချက်ကြားရပါတယ်” ဟု မှော်ဘီဒေသခံတစ်ဦးက ပြောသည်။
မြောက်ဥက္ကလာဒေသခံတစ်ဦးကလည်း “ခေါင်းကို မိုးကြိုးများပစ်လိုက်တာလား ထင်ရတယ်။ ဗုံးပေါက်တာ ကြားဖူးသမျှအကျယ်ဆုံးပဲ။ ၇ နာရီဝန်းကျင်လောက်က ပေါက်တာ” ဟု ရန်ကုန်ခေတ်သစ်သို့ ပြောဆိုသည်။
ဓာတ်ပုံ-အကြမ်းဖက်စစ်ကောင်စီ၏ လေတပ်စခန်းတစ်ခု။
