ရန်ကုန်၊ ဧပြီ ၁၀
မကွေးတိုင်း ပခုက္ကူခရိုင် ပေါက်မြို့နယ် တောင်ပိုင်း ဇီးတောရွာကို အကြမ်းဖက် စစ်ကောင်စီ တပ်ဖွဲ့များက ယနေ့ ဧပြီလ ၁ဝရက်နေ့ ည ၈နာရီ ၃ဝမိနစ်ခန့်တွင် ဝင်ရောက် စီးနင်းမီးရှို့နေပြီး ပြည်သူ ၇ဝကျော်ကိုလည်း ဖမ်းဆီးထားကြောင်း ဒေသခံပြည်သူများက ရန်ကုန်ခေတ်သစ် မီဒီယာသို့ ပြောဆိုသည်။
အဆိုပါ အကြမ်းဖက် စစ်ကောင်စီ စစ်ကြောင်းတွင် စစ်သား၊ရဲနှင့် ပျူစောထီး များပါဝင်ပြီး ပျူစောထီးများက လမ်းပြပြုလုပ်ကာ ကျေးရွာသို့ ခေါ်ဆောင် လာခြင်းဖြစ်ပြီး ဇီးတောရွာစာသင်ကျောင်း၌ ပြည်သူ ၇ဝကျော်ကို ဖမ်းဆီးထားခြင်း ဖြစ်ကြောင်း သိရသည်။
“ဇီးတောရွာကို စစ်ခွေးတွေ မီးရှို့နေတယ်။ ပြည်သူတွေတော့ ဘေးလွတ်ရာကို ပြေးနေရတယ်။ ရွာထဲက စာသင်ကျောင်းထဲမှာ ပြည်သူ ၇ဝကျော် ဖမ်းခံထား ရတယ်။ ကျန်တဲ့သူတွေကတော့ ပြေးနေပြီ အိမ်တွေလည်း ဝင်မွှေခံရတယ် ရှိတဲ့ ပစ္စည်း အကုန်လုံးကို ယူနေတာ ပျက်စီးဆုံးရှုံးမှု အခြေအေနတွေတော့ မသိရသေးဘူး” ဟု ဒေသခံပြည်သူ တစ်ဦးက ပြောဆိုသည်။
ဇီးတောကျေးရွာတွင် ပြည်သူပိုင် နေအိမ် ၂၅ဝကျာ်ခန့်ရှိကာ အကြမ်းဖက် စစ်ကောင်စီ တပ်ဖွဲ့များက ရွာအနောက်ပိုင်းမှစ၍ မီးရှို့ ဖျက်ဆီး နေခြင်း ဖြစ်ကြောင်း သိရသည်။
