ရန်ကုန်၊ ဧပြီ ၂ဝ
တနင်္သာရီတိုင်း၊ စစ်ကိုင်းတိုင်း၊ မန္တလေးတိုင်းနှင့် ပဲခူးတိုင်းတို့တွင် စစ်ကားများ၊ မိုင်းရှင်းလင်းရေး လုပ်ဆောင်နေသော အကြမ်းဖက် စစ်တပ် စစ်ကြောင်းများ၊ ကင်းစောင့် စစ်သားများနှင့် စစ်တပ် ထောက်တိုင် KBZ ဘဏ်တို့ ဗုံးခွဲ ပစ်ခတ် တိုက်ခိုက်ခံရ စစ်သား ၁၁ဦး သေဆုံးခဲ့ကြောင်း ဒေသခံ ကာကွယ်ရေး တပ်ဖွဲ့များထံမှ သိရသည်။
စစ်ကိုင်းတိုင်း၊ ချောင်းဦး
=============
စစ်ကိုင်းတိုင်း ချောင်းဦးမြို့နယ် မုံရွာ-ချောင်းဦး လမ်းပိုင်း၌ ဧပြီလ ၁၉ ရက်နေ့တွင် အကြမ်းဖက် စစ်တပ် ခြေလျင် စစ်ကြောင်းများ မိုင်းရှာဖွေနေစဉ် ချောင်းဦးမြို့နယ် ပြည်သူ့ကာကွယ်ရေး တပ်ဖွဲ့ (CHUPDF)က မိုင်းဆွဲ တိုက်ခိုက်ခဲ့ပြီး စစ်သား ၄ဦး သေဆုံးခဲ့ကြောင်း CHUPDF တပ်ဖွဲ့ထံမှ သိရသည်။
အဆိုပါ တိုက်ခိုက်မှုကို ချောင်းဦးမြို့နယ် ပြည်သူ့ကာကွယ်ရေး တပ်ဖွဲ့ (CHUPDF) တပ်ခွဲ(၂) မှ ရဲဘော်များက ပြုလုပ် ခဲ့ခြင်းဖြစ်ပြီး အောင်မြင်စွာ ဆုတ်ခွာ နိုင်ခဲ့ကြောင်း သိရသည်။
တနင်္သာရီတိုင်း၊ မြိတ်ခရိုင်
==============
တနင်္သရီတိုင်း မြိတ်ခရိုင် တနင်္သာရီမြို့နယ် သိန္ဓောရွာရှိ လှေဆိပ်တစ်ခု၌ ဧပြီလ ၂၀ ရက်နေ့ နံနက် ၉ နာရီ ၃ဝမိနစ်ခန့်တွင် ဆက်ကြေး ကောက်ခံနေသော အကြမ်းဖက် စစ်ကောင်စီ တပ်ဖွဲ့ဝင် ၂ဦးကို ဒေသခံကာကွယ်ရေး တပ်ဖွဲ့များက ပစ်ခတ်တိုက်ခိုက်ခဲ့ပြီး စစ်သား ၁ဦးသေဆုံးခဲ့ကြောင်း သိရသည်။
အဆိုပါ တိုက်ခိုက်မှုကို ဘက်မလိုက် ပြောက်ကျား တပ်ဖွဲ့က ပြုလုပ်ခဲ့ခြင်းဖြစ်ပြီး အကြမ်းဖက် စစ်ကောင်စီ တပ်ဖွဲ့များက လက်နက်ကြီး လက်နက်ငယ်များဖြင့် ပြန်လည် ပစ်ခတ်ခဲ့ခြင်းကြောင့် ဆုတ်ခွာခဲ့ရကြောင်း သိရသည်။
စစ်ကိုင်းတိုင်း၊ တန့်ဆည်မြို့
===============
စစ်ကိုင်းတိုင်း၊ တန့်ဆည်မြို့ မြောက်ဘက် ခွေးနတ်ချောင်းအနီးတွင် အကြမ်းဖက် စစ်ကောင်စီ တပ်ဖွဲ့ဝင်များ လိုက်ပါလာသော Forland ကား ၁စီးကို ယနေ့ ဧပြီ၂၀ရက် မွန်းလွဲ ၁နာရီခန့်တွင် ဒေသခံ ကာကွယ်ရေး တပ်ဖွဲ့များက မိုင်းဆွဲ တိုက်ခိုက်ခဲ့ပြီး စစ်သား ၃ဦးသေဆုံးခဲ့ကြောင်း သိရသည်။
ယင်း တိုက်ခိုက်မှုကို တန့်ဆည် PDFတပ်ရင်း(၇)မှ Phoenix၊ KPKတပ်ဖွဲ၊ TSR၊ မူးမြစ်ဝှမ်းလွင်ပြင်အဖွဲနှင့် ပလဖတို့က ပူးပေါင်း ပြုလုပ် ခဲ့ခြင်းဖြစ်ပြီး ထို Forland ကားသည် မိုင်းထိမှန် ပျက်စီးခဲ့ပြီး တန့်ဆည်ရဲစခန်းမှ ကားတစ်စီးဖြင့် သေဆုံး၊ဒဏ်ရာရ စစ်သားများကို လာရောက် တင်ဆောင်သွားကြောင်း ကာကွယ်ရေး တပ်ဖွဲ့များက ထုတ်ပြန်ထားသည်။
မန္တလေးတိုင်း၊ ကျောက်ဆည်ခရိုင်
==================
မန္တလေးတိုင်း ကျောက်ဆည်ခရိုင် စဉ့်ကိုင်နှင့် ပလိပ်ကြားရှိ ကွန်ပျူတာ တက္ကသိုလ်လမ်း အကျော်တွင် ဧပြီလ ၂ဝရက်နေ့ နံနက် ၂နာရီခန့်တွင် အကြမ်းဖက် စစ်ကောင်စီ စစ်ကားများကို ဒေသခံကာကွယ်ရေး တပ်ဖွဲ့များက မိုင်းဆွဲ တိုက်ခိုက်ခဲ့ပြီး စစ်သား ၃ဦး ထက်မနည်း သေဆုံးခဲ့ကြောင်း သိရသည်။
ထို စစ်ကားများကို M.D.Y တပ်ဖွဲ့၊ အနက်ရောင်သေမင်းတပ်ဖွဲ့၊ ပြည်သူ့ကာကွယ်ရေး တပ်ဖွဲ့ ဗိုလ်နောင်လေး အဖွဲ့တို့က ပူးပေါင်းတိုက်ခိုက်ခဲ့ခြင်းဖြစ်ကြောင်း သိရသည်။
မန္တလေးတိုင်း၊ စက်မှုပန်းခြံ
===============
မန္တလေးတိုင်း စက်မှုပန်းခြံ ၁၁၃နှင့် ၁၁၄ ကြားရှိ KBZ ဘဏ်ကို ယနေ့ ဧပြီလ ၂၀ ရက်နေ့ မွန်းလွဲ ၂နာရီ ၂၄ မိနစ်ခန့်တွင် Yadanarbon Phoenix Guerilla Force-YPGFနှင့် Dragon Warrior တပ်ဖွဲ့တို့က ဗုံးခွဲ တိုက်ခိုက်ခဲ့ပြီး ထိခိုက်သေဆုံးမှု အခြေအနေကို အတည်မပြုနိုင်သေးကြောင်း ထုတ်ပြန်ထားသည်။
ပဲခူးတိုင်း၊ အုတ်ဖိုမြို့နယ်
==============
ပဲခူးတိုင်း အုတ်ဖိုမြို့နယ် မြန်မာ့ စီးပွာရေးဘဏ်ရှိ အကြမ်းဖက် စစ်ကောင်စီ လုံခြုံရေးကင်းကို ဧပြီလ ၁၉ ရက်နေ့ ည ၈နာရီ ၅၅ မိနစ်ခန့်က ဒေသခံကာကွယ်ရေး တပ်ဖွဲ့များ အဝေးထိန်းမိုင်းဖြင့် ဖောက်ခွဲ တိုက်ခိုက်ခဲ့ပြီး စစ်သားများ ထိခိုက်သေဆုံးမှု ရှိမရှိကို အတည်မပြုနိုင်သေးကြောင်း ကာကွယ်ရေး တပ်ဖွဲ့များက ထုတ်ပြန်ထားသည်။
အဆိုပါ အကြမ်းဖက် စစ်ကောင်စီ လုံခြုံရေး ကင်းကို ဖက်ဆစ် တိုက်ဖျက်ရေးနှင့် ပြည်သူ့ အာဏာတည်ဆောက်ရေး တပ်ဦး (ဖတပအ) နှင့် တပ်ရင်းအမှတ် ၃၈၀၂ သာယာဝတီခရိုင် တပ်ရင်း (၂) တပ်ခွဲ (၄) မဟာမိတ် တပ်ဖွဲ့တို့က် ပူးပေါင်း တိုက်ခိုက်ခဲ့ခြင်း ဖြစ်ကြောင်း သိရသည်။
Photo – AFP
