ရန်ကုန်၊ မေ ၃၁
မြန်မာနိုင်ငံ၏ လက်ရှိ နိုင်ငံရေးအခြေအနေတွင် အစိုးရအဖြစ် မည်သူက အုပ်ချုပ်သည်ဖြစ်စေ၊ ဗမာတိုင်းရင်းသားများ၏ အတွင်းရေးသာဖြစ်ပြီး ပဋိပက္ခ ပို၍ မဖြစ်စေလိုသောကြောင့် မည်သည့်ဘက်မှ ပါဝင်ပတ်သက်မည်မဟုတ်ကြောင်း မင်းအောင်လှိုင်ကို ၀ ပြည်နယ်ကိုယ်စားလှယ်အဖွဲ့က ပြောဆိုသည်။
မင်းအောင်လှိုင်နှင့် “ဝ” ပြည်သွေးစည်းညီညွတ်ရေးပါတီ UWSP မှ ဒုတိယဥက္ကဋ္ဌ ဦးလော့ယာကု ဦးဆောင်သော အဖွဲ့တို့ နေပြည်တော်တွင် မေလ ၃၀ ရက်နေ့က တွေ့ဆုံစဉ် ၀ ပြည်နယ်ကိုယ်စားလှယ်က ထိုသို့ ပြောဆိုခြင်းဖြစ် ကြောင်း တရားဝင် သတင်းထုတ်ပြန်ချက်အရ သိရှိရသည်။
၀ ကိုယ်စားလှယ်အဖွဲ့က လက်ရှိ ပြဿနာများကို အင်အားသုံးမဖြေရှင်းနိုင်ကြောင်း၊ နိုင်ငံတကာက လက်ရှိမြန်မာ့အခြေအနေကို ဖြေရှင်းရန် ကြိုးစားသော်လည်း နောက်ဆုံးတွင် သက်ဆိုင်သူများက ဖြေရှင်းရမည်ဖြစ်ကြောင်း၊ တွေ့ဆုံဆွေးနွေးမှုမှတစ်ဆင့် အမြန်ဆုံးဖြေရှင်းရန် တောင်းဆိုကြောင်း ၀ ပြည်နယ်ကိုယ်စားလှယ်အဖွဲ့က ပြောဆိုသည်။
၀ ပြည်နယ်အနေဖြင့် နိုင်ငံတော်မှ ခွဲထွက်ခြင်းမပြုလုပ်မဟုတ်ကြောင်း၊ ကာကွယ်ရေးနှင့်သံတမန်ရေးမှ လွဲ၍ မိမိကိုယ်ကိုယ် စီမံအုပ်ချုပ်မည်ဖြစ်ကြောင်း၊ ပြည်နယ်အဆင့်နှင့် ပြည်ထောင်စုအဆင့် ငြိမ်းချမ်းရေးစာချုပ်ကို လိုက်နာ ထိန်းသိမ်းမည်ဖြစ်ကြောင်း၊ ၀ အမျိုးသားကိုယ်ပိုင်အုပ်ချုပ်ခွင့်ရ ပြည်နယ် တည်ထောင်ရန် တောင်းဆိုကြောင်း၊ နှစ်ဖက် ပဋိပက္ခ ရှောင်ရှားရန်နှင့် အနာဂတ်တွင် ငြိမ်းချမ်းရေး ဆွေးနွေးမှု ထိန်းသိမ်းရန် မင်းအောင်လှိုင်ကို ၀ ကိုယ်စားလှယ်အဖွဲ့က တောင်းဆိုကြောင်း သိရှိရသည်။
ဓာတ်ပုံ- ၂၀၁၈ ခုနှစ် ဇူလိုင် ၁၃ ရက်နေ့ မင်းအောင်လှိုင်က ပြည်ထောင်စု ငြိမ်းချမ်းရေးညီလာခံ (၂၁)ရာစုပင်လုံ တတိယအစည်းအဝေး တက်ရောက် ရင်း ကျန်းမာရေး မကောင်းမွန်၍ နေပြည်တော်ကုတင် ၁၀၀၀ ဆံ့ ဆေးရုံတွင် ဆေးကုသမှုခံယူရသည့် UWSA “ဝ”အဖွဲ့ ဒုတိယဥက္ကဋ္ဌ ဦးပေါက်ယူယိနှင့် ပြင်ပဆက်ဆံရေးဌာနမှူး ဦးကျောက်ကော်အမ်တို့ကို သွားရောက် ငှက်သိုက်တိုက်စဉ်။
