By Kyiv Post
ယူကရိန်းသမ္မတ Volodymyr Zelensky သည် ယမန်နေ့ (မေလ ၉ ရက်) တွင် ကျရောက်သော ဒုတိယကမ္ဘာစစ်အတွင်း နာဇီဝါဒအပေါ် အောင်ပွဲခံသည့် (၇၇) နှစ်မြောက် ဥရောပအောင်ပွဲနေ့ အထိမ်းအမှတ် မိန့်ခွန်းတွင် နာဇီဂျာမနီတပ်များကို ယခု ၎င်း၏နိုင်ငံကို ကျူးကျော်တိုက်ခိုက်နေသော ရုရှားများနှင့် နှိုင်းယှဉ်ပြောဆိုခဲ့သည်။
ဗီဒီယိုမှတဆင့် ပြောကြားသော Zelensky ၏ မိန့်ခွန်းသည် ၄င်း၏ ပြောင်မြောက် ပြတ်သားသော နိုင်ငံရေး ဦးဆောင်မှုကို ဖော်ကျူးနိုင်သည့်အတွက် အများပြည်သူ ဖတ်ရှုနိုင်ရန်အတွက် သင့်လျှော်အောင် ဘာသာပြန်ဆို ဖော်ပြအပ်ပါသည်။
=========
ကြီးမြတ်သော ယူကရိန်းပြည်သူများခင်ဗျာ
၂၀၂၁ ခုနှစ်၊ ဩဂုတ်လ ၂၄ ရက်နေ့က ကျွန်ုပ်တို့ရဲ့ နှစ် ၃၀ ပြည့် လွတ်လပ်ရေး အောင်ပွဲနေ့ကို နိုင်ငံတဝန်းလုံး ဆင်နွှဲခဲ့ကြပါတယ်။ ကျွန်ုပ်တို့ စစ်သည်တော်တွေ၊ အမိမြေ ကာကွယ်စောင့်ရှောက်သူတွေ၊ ကျွန်ုပ်တို့ စစ်ယာဉ်တွေဟာ ခရပ်ရှ်ချတစ် (Khreshchatyk) လမ်းမကြီးတလျောက် ချီတက်ခဲ့ကြတယ်၊ ကျွန်ုပ်တို့ရဲ့ “မရီယာလေယာဉ်ကြီး” ကလည်း ကောင်းကင်ထက်မှာ ပျံသန်းခဲ့ပါတယ်။
“ပုန်းကွယ်နေတဲ့ ရန်သူထက် ကြောက်ဖို့ကောင်းတာမရှိ၊ အယောင်ဆောင် မိတ်ဆွေထက် အဆိပ်ပြင်းတာ မရှိ”။ ဒီစကားက ယူကရိန်း တွေးခေါ်ပညာရှင်ကြီး Hryhorii Skovoroda ရဲ့ စကား ဖြစ်ပါတယ်။ ဖေဖော်ဝါရီ ၂၄ ရက်နေ့မှာတော့ အယောင်ဆောင်မိတ်ဆွေက ယူကရိန်းအပေါ် စစ်ပွဲကြီးတစ်ရပ် စတင်လိုက်ချိန်မှာ ဒီအမှန်တရားကို ကျွန်ုပ်တို့ လက်တွေ့နားလည်ခဲ့ကြရတယ်။
ဒီစစ်ပွဲက စစ်တပ်နှစ်ခုကြားဖြစ်တဲ့ စစ်ပွဲမဟုတ်ပါ။ ကမ္ဘာ့အမြင် နှစ်ရပ်ကြားဖြစ်တဲ့ စစ်ပွဲဖြစ်ပါတယ်။ ဒီစစ်ပွဲကို Skovoroda ပြတိုက်ကို ဗုံးကြဲဖျက်ဆီးလိုက်တဲ့ အရိုင်းအစိုင်းတွေက စတင်ခဲ့ကြပြီး၊ ၎င်းတို့ ဒုံးကျည်တွေက ကျွန်ုပ်တို့ရဲ့ ခံယူချက်သဘောတရားတွေကို ဖျက်ဆီးပစ်နိုင်မယ်လို့ ယုံကြည်နေကြတယ်။
ဒါက သူတို့ကို စိတ်ဒုက္ခရောက်စေတယ်။ ဒါက သူတို့အတွက် နားမလည်နိုင်အောင် ထူးခြား နေတယ်။ ဒါက သူတို့ကို ခြောက်လှန့်နေတယ်။ ဒီခံယူချက် သဘောတရားရဲ့ အနှစ်ချုပ်က ငါတို့သည် ကိုယ်ပိုင် လမ်းကြောင်းရှိတဲ့ လွတ်လပ်တဲ့သူတွေ ဖြစ်ကြတယ် ဆိုတာပါပဲ။ ယနေ့ ကျွန်ုပ်တို့ ဒီလမ်းကြောင်းပေါ်မှာ စစ်ပွဲဆင်နွှဲနေကြတာဖြစ်ပြီး၊ မည်သူတစ်ဦးတစ်ယောက်ကိုမှ ကျွန်ုပ်တို့နိုင်ငံရဲ့ မြေတမှုန် ကိုတောင် ပေးလိမ့်မည်မဟုတ်ပါ။
ယနေ့ နာဇီဝါဒအပေါ်အောင်ပွဲနေ့ကို ကျွန်ုတို့ ဆင်နွှဲကြတယ်။ ကျွန်ုပ်တို့အနေနဲ့ မည်သူတစ်ဦး တစ်ယောက်ကိုမှ ကျွန်ုပ်တို့နိုင်ငံရဲ့ မြေတမှုန်ကိုတောင် ပေးမည်မဟုတ်ပါ။ ဟစ်တလာဆန့်ကျင်ရေး မဟာမိတ်ဖွဲ့မှုမှာ အခြားနိုင်ငံတွေနဲ့အတူ နာဇီဝါဒကို အနိုင်ယူခဲ့တဲ့ ကျွန်ုပ်တို့ ဘိုးဘေးတွေအတွက် ကျွန်ုပ်တို့ ဂုဏ်ယူပါတယ်။ ဒါ့အပြင် ကျွန်ုပ်တို့အနေနဲ့ မည်သူတစ်ဦးတစ်ယောက်ကိုမှ ဒီအောင်ပွဲကို တိုက်ခိုက်သိမ်းယူခွင့် ပြုမည်မဟုတ်သလို ဒီအောင်ပွဲကို အပိုင်စီး ရယူခွင့်လည်း ပြုလိမ့်မည်မဟုတ်ပါ။
ကျွန်ုပ်တို့ ရန်သူတွေက ကျွန်ုပ်တို့အနေနဲ့ မေ ၉ ရက်နေ့၊ နာဇီဝါဒအပေါ် အောင်ပွဲနေ့ကို ဆင်နွှဲဖို့ ငြင်းဆန်လိမ့်မယ်လို့ စိတ်ကူးယဉ်ခဲ့ကြတယ်။ သန်းပေါင်းများစွာသော ယူကရိန်းတွေက နာဇီဝါဒကို တိုက်ခိုက်ခဲ့ကြပြီး၊ ခက်ခဲကြမ်းတမ်းတဲ့ ခရီးရှည်ကြီးကို ဖြတ်သန်းခဲ့ကြရတယ်။ နာဇီတွေကို လူးဟန့်မြို့ကနေ တိုက်ထုတ်ခဲ့ကြတယ်။ နာဇီတွေကို ဒွန်းတက်မြို့ကနေ တိုက်ထုတ်ခဲ့ကြတယ်။ ခါဆန်၊ မီလီတိုပိုနဲ့ ဘတ်ရန့် မြို့တွေဟာ ကျူးကျော်သူတွေထံမှ လွတ်မြောက်ခဲ့ကြတယ်။
နာဇီတွေကို ရယ်လ်တ၊ ဆမ်ဖီရိုပိုလ်၊ ခါးချ်နဲ့ ခရိုင်းမီးယား ဒေသတစ်ခုလုံးကနေ တိုက်ထုတ်ခဲ့ကြတယ်။ မာရီပိုလ်မြို့လည်း နာဇီတွေထံမှ လွတ်မြောက်ခဲ့တယ်။ သူတို့အနေနဲ့ နာဇီတွေကို ယူကရိန်းတစ်နိုင်ငံလုံး ကနေ တိုက်ထုတ်ခဲ့ကြတယ်။ သို့ပေမယ့် ကျနော်ပြောသွားတဲ့ မြို့တွေဟာ ယနေ့မှာ ကျွန်ုပ်တို့ကို ထူးထူးခြားခြား လှုံ့ဆော်ပေးနေပါတယ်။ ဒီမြို့တွေက ကျွန်ုပ်တို့အနေနဲ့ ကျူးကျော်ဝင်ရောက်လာသူတွေ ကို ကျွန်ုပ်တို့ပိုင် မြေပေါ်ကနေ မောင်းထုတ်နိုင်မှာ သေချာတယ်ဆိုတဲ့ ယုံကြည်မှုကို ပေးနေတယ်။
နာဇီဝါဒအပေါ် အောင်ပွဲနေ့မှာ ကျွန်ုပ်တို့ဟာ အောင်ပွဲသစ်တစ်ရပ်အတွက် တိုက်ပွဲဝင်နေကြရတယ်။ အောင်ပွဲဆီသွားရာလမ်းက ခက်ခဲတယ်။ သို့ပေမယ့် ကျွန်ုပ်တို့နိုင်မယ်ဆိုတာကိုတော့ ယုံမှားသံသယ မရှိပါ။ ရန်သူအပေါ် ကျွန်ုပ်တို့ရဲ့ အရေးသာမှုက ဘာဖြစ်မလဲ။ ကျွန်ုပ်တို့က စာအုပ်တစ်အုပ်ကြောင့် ပိုတော်တဲ့ သူတွေဖြစ်တယ်။ ဒီစာအုပ်က ယူကရိန်းသမိုင်းကြောင်းဆိုင်ရာ ပြဌာန်းစာအုပ် တစ်အုပ်ဖြစ်တယ်။ ကျွန်ုပ်တို့ရန်သူ အားလုံးအနေနဲ့ ဒီစာအုပ်ကို ဖတ်နိုင်ပြီး၊ မှန်ကန်တဲ့ကောက်ချက်တွေသာ ဆွဲနိုင်မယ်ဆိုရင် ကျွန်ုပ်တို့ ပူပန်သောက ရောက်လိမ့်မည်မဟုတ်ပါ။
ဖေဖော်ဝါရီ ၂၄ ရက်နေ့မှာ ရုရှားနိုင်ငံက ကျူးကျော်စစ်တစ်ရပ်ကို စတင်ခဲ့တယ်။ တူညီတဲ့ ထွန်တုံးပေါ်ကိုပဲ နင်းတယ်။ ငါတို့မြေကို လာရောက်ကျူးကျော်သူတိုင်းက အဲဒီအပေါ်မှာ နင်းကြတယ်။ ကျွန်ုပ်တို့အနေနဲ့ မတူညီတဲ့စစ်ပွဲတွေကို ဖြတ်သန်းခဲ့ကြပြီး ဖြစ်ပါတယ်။ သို့ပေမယ့် သူတို့အားလုံးအနေနဲ့ တူညီတဲ့နောက်ဆုံးရလာဒ်ကိုသာ ရရှိခဲ့ ကြတယ်။
ကျွန်ုပ်တို့မြေကို ကျည်ဆံ အမြောက်ဆံတွေနဲ့ ကြဲပက် စိုက်ပျိုးခဲ့ကြတယ်။ ဒါပေမယ့် ဘယ်ရန်သူမှ ဒီမြေပေါ်မှာ အမြစ်တွယ် အခြေချနိုင်ခြင်း မရှိခဲ့ကြဘူး။ ရန်သူ့စစ်ယာဥ်ရထားတွေနဲ့ တင့်ကားတွေဟာ ကျွန်ုပ်တို့ စိုက်ခင်းတွေကို ဖြတ်သန်း မောင်းနှင်ခဲ့ကြတယ်။ သို့ပေမယ့် အသီးအပွင့်တွေကို ၎င်းတို့ မခံစားခဲ့ကြရဘူး။ ရန်သူ့မြှားတွေနဲ့ ဒုံးကျည်တွေဟာ ကျွန်ုပ်တို့ ကောင်းကင်ထက်မှာ ပျံသန်းခဲ့ကြတယ်။ သို့ပေမယ့် မည်သူကမှ ကျွန်ုပ်တို့ ကောင်းကင်ပြာကို အရိပ် မလွှမ်းနိုင်ကြဘူး။
ကျွန်ုပ်တို့ရဲ့ လွတ်လပ်တဲ့ စိတ်ဓါတ်ကို ချည်နှောင်နိုင်မယ့် နှောင်ကြိုးမရှိပါ။ လွတ်လပ်တဲ့ ကျွန်ုပ်တို့မြေပေါ် အမြစ်တွယ် အခြေချနိုင်မယ့် ကျူးကျော်သူ မရှိပါ။ ကျွန်ုပ်တို့ရဲ့ လွတ်လပ်တဲ့ ပြည်သူတွေအပေါ် အုပ်ချုပ်နိုင်မယ့် ကျူးကျော်သူ မရှိပါ။
တချိန်ချိန်မှာတော့ ကျွန်ုပ်တို့ အနိုင်ရမယ်။ လုယက် ဖျက်ဆီးသူတွေဖြစ်စေ၊ နာဇီဝါဒ ဖြစ်စေ၊ ပထမနှင့် ဒုတိယအမျိုးအစား ပေါင်းစပ်ထားတဲ့ လက်ရှိရန်သူဖြစ်စေ၊ ကျွန်ုပ်တို့ အနိုင်ရရှိမှာ ဖြစ်ပါတယ်။ ဒီမြေဟာ ကျွန်ုပ်တို့ပိုင်တဲ့ မြေဖြစ်လို့ပါပဲ။ တစ်စုံတစ်ယောက်က father tsar အတွက်, the führer အတွက်၊ ပါတီအတွက်နဲ့ အကြီးအကဲအတွက် တိုက်ခိုက် ပေးနေတာကြောင့် ဖြစ်တယ်။
ကျွန်ုပ်တို့က အမိမြေအတွက် တိုက်ပွဲဝင်နေကြတာ ဖြစ်တယ်။ ကျွန်ုပ်တို့ဟာ တစုံတယောက်အတွက် တိုက်ခိုက်ပေးခဲ့ခြင်း ဘယ်တုန်းကမှ မရှိခဲ့ပါ။ ကျွန်ုပ်တို့ဟာ ကျွန်ုပ်တို့အတွက်သာ အမြဲတမ်း တိုက်ပွဲဝင်ပါတယ်။ ကျွန်ုပ်တို့ လွတ်လပ်မှုအတွက်၊ ကျွန်ုပ်တို့ လွတ်လပ်ရေးအတွက် ကျွန်ုပ်တို့ ဘိုးဘေးတွေရဲ့ အောင်ပွဲကို အချည်းနှီး မဖြစ်ရအောင်အတွက်။ ဘိုးဘေးတွေက ကျွန်ုပ်တို့အတွက် လွတ်လပ်မှုရဖို့ တိုက်ခိုက်ခဲ့ကြတယ်။ အနိုင်ရခဲ့ကြတယ်။
ကျွန်ုပ်တို့က ကျွန်ုပ်တို့ကလေးတွေအတွက် လွတ်လပ်မှုရဖို့ ကျွန်ုပ်တို့ တိုက်ပွဲဝင်ကြတယ်။ ဒါကြောင့် ကျွန်ုပ်တို့ အနိုင်ရရှိလိမ့်မယ်။ ယူကရိန်း ၈ သန်းကျော် သေဆုံးခဲ့ရတဲ့ ဒုတိယကမ္ဘာစစ်အတွင်း ကျွန်ုပ်တို့ ဘိုးဘေးတွေ လုပ်ဆောင်ခဲ့ကြတာတွေကို ကျွန်ုပ်တို့ ဘယ်တော့မှ မေ့ဖျောက်မှာမဟုတ်ပါ။ ယူကရိန်း ၅ ဦးမှာ တစ်ဦးက အိမ်ပြန်မရောက်နိုင်ခဲ့ကြပါ။ စုစုပေါင်း စစ်ပွဲက အနည်းဆုံး သန်း ၅၀ သော ဘဝတွေကို သေကျေပျက်ဆီးစေခဲ့တယ်။
ကျွန်ုပ်တို့အနေနဲ့ “ငါတို့ နောက်တစ်ကြိမ် ထပ်ဖြစ်နိုင်တယ်” လို့ မဆိုပါ။ ဘာကြောင့်ဆိုရင် ၂၁၉၄ ရက်ကြာ စစ်ပွဲကြီးကို ထပ်မံဖြစ်စေဖို့ လူရူးတစ်ယောက်ကသာလျှင် ဆန္ဒရှိနိုင်လို့ပါပဲ။ နာဇီအတွေးအခေါ်တွေကို လိုက်နာပြီး၊ နာဇီတွေလုပ်ခဲ့သမျှ ပုံတူကူးလုပ်ဆောင်ပြီး ဟစ်တလာအစိုးရရဲ့ ကြောက်မတ်ဖွယ် ရာဇဝတ်မှုတွေကို တကျော့ပြန်လုပ်ဆောင်နေတဲ့ သူတစ်ယောက်။
သူ့မှာ ပျက်ဆီးကိန်းဆိုက်နေပြီ။ ဘာကြောင့်ဆိုရင် သန်းပေါင်းများစွာသော ဘိုးဘေးတွေက သူတို့ကို သတ်ဖြတ်ခဲ့သူတွေအတိုင်း တုပလုပ်ဆောင်ဖို့ သူ့အနေနဲ့ စတင်ချိန်မှာပဲ၊ သူ့အပေါ် ကျိန်စာတိုက်ခဲ့တာကြောင့် ဖြစ်ပါတယ် ထို့အတွက်ကြောင့်ပဲ ၎င်းအနေနဲ့ အရာအားလုံး ဆုံးရှုံးရပါလိမ့်မယ်။
မကြာတော့မယ့်အချိန်မှာ ယူကရိန်းနိုင်ငံမှာ အောင်ပွဲနေ့ နှစ်ခု ရှိလာပါလိမ့်မယ်။ တစုံတစ်ယောက် အတွက်တော့ မည်သူမှ ကျန်ရှိလိမ့်မည်မဟုတ်ပါ။ ထိုစဉ်က ကျွန်ုပ်တို့ နိုင်ခဲ့တယ်။ ယခုလည်း ကျွန်ုပ်တို့ အနိုင်ရရှိလိမ့်ဦးမယ်။
ထို့နောက်မှာ ခရပ်ရှ်ချတစ်လမ်းမကြီးဟာ ယူကရိန်နိုင်ငံရဲ့ အောင်ပွဲအတွက် စစ်ရေးပြ အခမ်းအနားကြီးကို မြင်တွေ့ရပါလိမ့်မယ်။
နာဇီဝါဒအပေါ် အောင်ပွဲနေ့ကို ဂုဏ်ပြုပါတယ်။
ယူကရိန်းနိုင်ငံ ဂုဏ်ရောင်ထွန်းပြောင်ပါစေ။
