ရန်ကုန်၊ ဇွန် ၈
စစ်ကိုင်းတိုင်း ကနီမြို့နယ် ချင်းတွင်မြစ်ကမ်းဘေးရှိ ကျေးရွာ ၄၅ ရွာကို အကြမ်းဖက် စစ်တပ်က မေလ ၁ဝ ရက်နေ့မှ ဇွန်လ ၅ ရက်နေ့အထိ ဝင်ရောက် စီးနင်းခဲ့ပြီး အသက် ၁၇ နှစ်အရွယ် လူငယ် ၁ ဦးပါအဝင် ပြည်သူ ၇ ဦးဖမ်းဆီးသတ်ဖြတ်ခဲ့ကြောင်း ကနီမြို့နယ် နွေဦးတော်လှန်ရေး သပိတ်အင်အားစု အဖွဲ့ထံမှ သိရသည်။
မေလ ၁၈ ရက်နေ့တွင် အကြမ်းဖက် စစ်တပ်က ကင်းတောင်ရွာသား ဦးဇော်လင်းကို ဖမ်းဆီး သတ်ဖြတ်ခဲ့ပြီး ရေလည်ကျွန်း ပျူစောထီး စခန်းအနီး၌ လည်ပင်း၊ ရင်ဘတ် ပြတ်ရှိ ဒဏ်ရာ၊ ဝမ်းဗိုက် ထိုးသွင်းဒဏ်ရာ မျက်နှာ နောက်ကျော ခြေထောက် ဦးခေါင်းတို့တွင် ညိုမည်း ဒဏ်ရာနှင့် လက်နှစ်ဖက်အား လက်ပြန်ကြိုးတုပ်လျက် စစ်တပ်က အလောင်းစွန့်ပစ် ထားသည်ကို တွေ့ရှိခဲ့ကြောင်းသိရသည်။
မေလ ၂၅ ရက်နေ့တွင် အကြမ်းဖက် စစ်တပ်က အထက်ကင်းရွာသား ဦးအောင်သန်းမော်ကို ညနေပိုင်းတွင် ဖမ်းဆီးပြီး ကျေးရွာ အနီး၌ပင် ဘယ်လက်နှင့် ညာလက်ရှိ လက် ၃ ချောင်းနှင့် ခြေချောင်းများကို ဖြတ်တောက်ထားပြီး လည်ပင်းတွင် သံကြိုးချည်ကာ လက်ထိပ်ခတ် အနေအထားဖြင့် သတ်ဖြတ်ထားသည်ကို တွေ့ရှိခဲ့ကြောင်း သိရသည်။
မေလ ၃၁ ရက်နေ့တွင် အကြမ်းဖက် စစ်တပ်က တဇယ်ချောင်း ကျေးရွာသား ၄ ဦးဖြစ်သည့် ဦးခင်မောင်ချမ်း၊ ဦးကျော်လှိုင်ဝင်း၊ ဦးဇော်နှင့် အသက် ၁၇ နှစ်အရွယ် ကိုဖြိုးတို့ကို မွန်းလွဲ ၁ နာရီခန့်တွင် ဖမ်းဆီး သတ်ဖြတ်ခဲ့ပြီး ဘုရားကုန်း ချောက်အနီးတွင် ဇွန်လ ၅ ရက်နှင့် ၆ ရက်နေ့တို့တွင် ပုပ်ပွ အနေအထားဖြင့် ရုပ်အလောင်းများကို ပြန်လည် တွေ့ရှိခဲ့ကြောင်း သိရသည်။
ဇွန်လ ၅ ရက်နေ့တွင် အကြမ်းဖက် စစ်တပ်က ဒေါင်းခြံကျေးရွာသား ဦးချစ်လွင်ကို ညနေ ၃ နာရီခန့်တွင် နတ်တောင်ရွာနှင့် နတ်မြောင်ရွာသွားလမ်း အနီး ထန်းတောတွင် ဖမ်းဆီးသွားပြီး ယင်းနေရာ အနီး လျှော်ဖြူခြံနားရှိ တဲ တစ်လုံးတွင် မီးရှို့သတ်ဖြတ်ထားသည်ကို တွေ့ရှိခဲ့ကြောင်း သိရသည်။
အကြမ်းဖက် စစ်တပ်သည် ကနီမြို့နယ်တွင် ၂၇ ရက်တာ အတွင်း ကျေးရွာ ၁၈ ရွာမှ ပြည်သူပိုင် နေအိမ် ၁၀၅၃ လုံးကိုလည်း မီးရှို့ ဖျက်ဆီးခဲ့ပြီး အရပ်သား ပြည်သူ ၇ ဦးကို ဖမ်းဆီး ဖြတ်ခဲ့ခြင်း ဖြစ်ကြောင်း ကနီမြို့နယ် နွေဦးတောင်လှန်ရေး သပိတ် အင်အားစုက ထုတ်ပြန်ထားသည်။
အလားတူ မကွေးတိုင်း ရေစကြိုမြို့နယ် ဆင်ကြို့ကြူကျေးရွာ အနီး၌ အကြမ်းဖက် စစ်တပ် လက်အောက်ခံ ပျူစောထီး အဖွဲ့များက PDF ရဲဘော် ၃ ဦးကို မေလ ၂၈ ရက်နေ့ ည ၁၁ နာရီ ၂၅ မိနစ်တွင် ဖမ်းဆီး သတ်ဖြတ်ခဲ့ပြီး ရုပ်အလောင်းများကို မီးရှို့ထားခဲ့ကြောင်း Taung Lat People’s Defense Force TLF ပြောက်ကျား တပ်ဖွဲ့ထံမှ သိရသည်။
ပျူစောထီး အဖွဲ့များ ဖမ်းဆီးဖြတ်ခဲ့သော PDF တပ်ဖွဲ့မှ ရဲဘော် ၃ ဦးမှာ ဆရာထွန်း၊ ဝဏ( ဝဏစိုး)နှင့် ဘယ်ကျော်(ကောင်းမြတ်စိုး) တို့ ဖြစ်ပြီး ဟင်္သာ ကျေးရွာနှင့် ဆင်မရဲရွာမှာ ပျုစောထီးများက ကျောက်လှေခါး ဆင်ကြို့ကြူရွာ အလယ် ဇရပ်လမ်းဘေး တွင်သတ်ဖြတ်ကာ ရုပ်အလောင်းများကို မီးရှို့ထားခဲ့ကြောင်း သိရသည်။
Taung Lat People’s Defense Force TLF မြေပြင် ပြောက်ကျား တပ်အဖွဲ့မှလည်း ကျဆုံးရဲဘော် ၃ ဦးအတွက် ဝမ်းနည်း ကြေကွဲကြောင်းနှင့် အကြမ်းဖက် စစ်တပ် အမြစ်ပြတ်သည်အထိ တိုက်ခိုက်သွားမည် ဖြစ်ကြောင်း ကြေညာချက် တစ်စောင် ထုတ်ပြန်ထားသည်။
