ရန်ကုန်၊ ဇွန် ၉
မွန်ပြည်နယ်၊ မော်လမြိုင်မြို့ ၊ သံလွင်ဥယျာဉ်လမ်းမှာ မနေ့က(ဇွန်လ ၈ရက်) သေနတ်နဲ့ပစ်ခတ်သတ်ဖြတ်ခံလိုက်ရတဲ့ ကမ္ဘာ့ကျန်းမာရေးအဖွဲ့ (WHO) ဝန် ထမ်းဟာ စစ်ကောင်စီသတင်းပေး(ဒလန်)ဖြစ်ပြီး စစ်ကောင်စီက ဒုတိယဗိုလ်ချုပ်ကြီး အောင်လင်းဒွေးရဲ့ ဆွေမျိုးနီးစပ်တော်သူဖြစ်တယ်လို့ ပြည်သူ့ကာကွယ်ရေးအဖွဲ့ (မော်လမြိုင်) က ထုတ်ပြန်ထားပါတယ်။
ကမ္ဘာ့ကျန်းမာရေးအဖွဲ့ WHOကတော့ ပစ်ခတ်သတ်ဖြတ်ခံရတဲ့ ဝန်ထမ်းဟာ ဦးမျိုးမင်းထွဋ်ဖြစ်ပြီး သူဟာ WHO မြန်မာရုံးမှာ ၅နှစ်နီးပါး ကားဒရိုင်ဘာအဖြစ်တာဝန်ထမ်းဆောင်ခဲ့သူလို့ ထုတ်ပြန်ထားပါတယ်။
ဦးမျိုးမင်းထွဋ် ရုံးကနေ အိမ်အပြန် သံလွင်ဥယျာဉ်လမ်းမှာ သူ့ရဲ့ ကိုယ်ပိုင်မော်တော်ဆိုင်ကယ်စီးနင်းလာစဉ် သေနတ်နဲ့ပစ်ခံရကြောင်း၊ စုံစမ်းစစ်ဆေးမှု လုပ်ဆောင်ဖို့ WHOက ထုတ်ပြန်ထားပါတယ်။
ပြည်သူ့ကာကွယ်ရေးအဖွဲ့ – PDO (မော်လမြိုင်)ကတော့ အခုလိုပစ်ခတ်သတ်ဖြတ်တာဟာ သူတို့ရဲ့လက်ချက်ဖြစ်ပြီး ဦးမျိုးမင်းထွဋ်ဟာ စစ်ကောင်စီသတင်းပေးအဖြစ်ဆောင်ရွက်နေလို့ ရှင်းလင်းရတာဖြစ်ကြောင်း ထုတ်ပြန်ပါတယ်။
ဦးမျိုးမင်းထွဋ်ဟာ မော်လမြိုင် မြေနီကုန်းအနီးတစ်ဝိုက်နဲ့ မြို့တွင်း ဧည့်စာရင်းစစ်ဆေးရာမှာ ဦးဆောင်ပါဝင်တတ်ပြီး စစ်အကြမ်းဖက်အုပ်စု ရဲမှူးတွေနဲ့ ဆက်ဆံရေးနီးစပ်သူတစ်ဦးလို့လည်း PDO (မော်လမြိုင်)ကဆိုပါတယ်။
ဒါ့အပြင် ဦးမျိုးမင်းထွဋ်ဟာ CDM ဝန်ထမ်းတွေကိုလည်း အကျပ်ကိုင်ခြိမ်း ခြောက် တာတွေလုပ်ဆောင်သလို အရွယ်မရောက်သေးတဲ့ မိန်းကလေးတွေကိုလည်း လိင်ပိုင်းဆိုင်ရာ ဗီဒီယိုဖိုင်တွေ ရိုက်ကူးပြီး သက်ငယ်မုဒိန်းမှုကျူးလွန်နေသူတစ်ဦးဖြစ်တယ်လို့လည်း PDO (မော်လမြိုင်)ရဲ့ ထုတ်ပြန်ချက်မှာ ဖော်ပြထားပါတယ်။
ပစ်ခတ်သတ်ဖြတ်ခံရတဲ့ WHO ဝန်ထမ်း ဦးမျိုးမင်းထွဋ်ဟာ စစ်ကောင်စီသတင်းပေး(ဒလန်)တစ်ဦးဟုတ်မဟုတ်ဆိုတာနဲ့ ဒုတိယဗိုလ်ချုပ်ကြီး အောင်လင်းဒွေးရဲ့ ဆွေမျိုးနီးစပ်တော်သူဖြစ်တယ်ဆိုတာကိုခေတ်သစ် အနေနဲ့ သီးခြား အတည်ပြု့ချက် ရယူနိုင်ခြင်းမရှိသေးပါဘူး။
ကမ္ဘာ့ကျန်းမာရေးအဖွဲ့(WHO)ဝန်ထမ်းအသတ်ခံရမှုအပေါ် ဝမ်းနည်းကြောင်းနှင့် ဖြစ်စဉ်ကို ဘက်မလိုက်ဘဲ စုံးစမ်းစစ်ဆေးပေးရန် ကုလသမဂ္ဂဌာနေညှိနှိုင်းရေးမှူး Ramanathan Balakrishnan က ထုတ်ပြန်ပါတယ်။
အရပ်သားများ၏ အခွင့်အရေးများနှင့် လုံခြုံမှုကို ကာကွယ်ပေးရန် ထပ်လောင်းတောင်းဆိုခဲ့ပြီး ပြည်သူများအပေါ် အကြမ်းဖက်လုပ်ငန်းရပ်များကို ပြင်းထန်စွာကန့်ကွက်ရှုတ်ချတယ်လို့ ကုလသမဂ္ဂရဲ့ ထုတ်ပြန်ချက်မှာ ဖော်ပြပါတယ်။
ဘက်မလိုက်သောစုံစမ်းစစ်ဆေးမှုပြုလုပ်ပေးနဲ့ ကျူးလွန်သူတွေကို တာဝန်ခံမှုရှိစေရေးလုပ်ဆောင်ပေးဖို့ မျှော်လင့်ကြောင်း ကုလသမဂ္ဂရဲ့ ထုတ်ပြန်ချက်မှာ ဆိုထားပါတယ်။
