ရန်ကုန်၊ ဇွန် ၉
ရန်ကုန်တိုင်း လှိုင်သာယာမြို့နယ်နှင့် အင်းစိန်း လမ်းမနှင့် ပါရမီလမ်းထောင့်ရှိ စစ်တပ် ထောက်တိုင် ကမ္ဘောဇဘဏ်၏ ATM စက် ၂ လုံးကို မြို့ပြ ပြောက်ကျား တပ်ဖွဲ့များက ဇွန်လ ၈ ရက်နှင့် ၉ ရက်နေ့တို့တွင် ဖောက်ခွဲ တိုက်ခိုက်ခဲ့ကြောင်း Civil Guerrilla Force – YGN တပ်ဖွဲ့ထံမှ သိရသည်။
ဇွန်လ ၈ ရက်နေ့တွင် လှိုင်သာယာမြို့နယ် ရွှေကမ်းသာယာ အိမ်ယာရှိ KBZ ဘဏ် ATM စက်နှင့် ဘဏ်ဝင်ပေါက်ကို နံနက် ၉ နာရီခန့်တွင်လည်းကောင်း၊ ဇွန်လ ၉ ရက်နေ့တွင်အင်းစိန်း လမ်းမနှင့် ပါရမီလမ်းထောင့်ရှိ KBZ ဘဏ် ATM စက်များကို ည ၉ နာရီခန့်တွင် လည်းကောင်း Civil Guerrilla Force – YGN နှင့် Southern Division PDF တို့က ပူးပေါင်း ဖောက်ခွဲ တိုက်ခိုက်ခဲ့ခြင်းဖြစ်ကြောင်း သိရသည်။
ထိုသို့ ဖောက်ခွဲ တိုက်ခိုက် ရခြင်းသည် ကမ္ဘောဇဘဏ် အနေဖြင့် တော်လှန်ရေးအဖွဲ့များနှင့် ထောက်ပို့များ၏ ငွေအကောင့်များအား စစ်ကောင်စီ အလိုကျ ပိတ်သိမ်းခြင်း၊ အပြစ်မရှိသော ပြည်သူလူထု၏ ငွေအကောင့်များကို တရားမဝင် ပိတ်ဆို့၍ ပြည်သူပိုင် ငွေများအား ဂုတ်သွေးစုပ် သိမ်းယူခြင်း၊ အပြစ်မဲ့ ပြည်သူများ၏ ငွေကြေး မိသားစု ဘဝများ ပျက်ဆီးရခြင်ကြောင့် စစ်ရေး ပစ်မှတ်အဖြစ် ဖောက်ခွဲ တိုက်ခိုက်ရခြင်း ဖြစ်ကြောင်း သိရသည်။
အဆိုပါ တိုက်ခိုက်မှုတွင် ပြည်သူလူထု ထိခိုက်မည်ကို စိုးရိမ်သောကြောင့် ပြင်းအားနည်းသည့် ပစ္စည်းများဖြင့်သာ ဖောက်ခွဲ တိုက်ခိုက်ခဲ့ပြီး ပိုမို ပြင်းထန်သော စစ်ရေး တိုက်ခိုက်မှုများကို ထပ်မံ ပြုလုပ်မည်ဖြစ်သောကြောင့် ပြည်သူလူထု အနေဖြင့် ကမ္ဘောဇဘဏ်၌ ငွေအပ်ရန်၊ ငွေလွှဲရန် သွားရောက်ခြင်းများကို ရှောင်ရှားပေးကြရန် Civil Guerrilla Force – YGN တပ်ဖွဲ့ထံမှ ထုတ်ပြန်ထားသည်။
ယနေ့ညပိုင်းတွင် မြောက်ဒဂုံ အရှေ့ဒဂုံ မြောက်ဥက္ကလာ မရမ်းကုန်း သာကေတနှင့် လှိုင်မြို့နယ်များတွင် ပေါက်ကွဲမှုနှင့် ပစ်ခတ်မှုများဖြစ်ပေါ်ခဲ့ကြောင်းသိရပါသည်။
ရန်ကုန်တိုင်း၊ မြောက်ဥက္ကလာပအ၀ိုင်းတွင် ယနေ့ ည ၈ နာရီ ၄၃ မိနစ် ၊ မြောက်ဥက္ကလာမြို့နယ်အခြားနေရာတွင်လည်းကောင်း ဗုံးပေါက်ကွဲပြီး မြောက်ဥက္ကလာပအဝိုင်း၊ ကျောက်ရေတွင်း တံတားထိ ကားများ ပိတ်ဆို့စစ်ဆေးနေကြောင်း သိရှိရသည်။
