ရန်ကုန်၊ ဇွန် ၁၀
မွန်ပြည်နယ်၊ ကျိုက်ထိုမြို့နယ်၊ အင်္ဂဘိုကျေးရွာ၊ လက်ပံပင်သင်္ချိုင်းအရှေ့တွင် ကျိုက်ထိုဘက်သို့ မောင်းနှင်လာသော စစ်တောင်းလူမှုကူညီရေးအသင်းမှ လူနာတင်ကား ၁ စီးကို ကင်းပုန်းဝပ်နေသော စစ်ကောင်စီတပ်ဖွဲ့က လက်နက်ကြီး၊ လက်နက်ငယ်များဖြင့် ပစ်ခတ်ရာ ကားပေါ်ပါလာသူ မောင်ပြည့်ဖြိုးအောင်မှာ ကျည်ထိမှန်သေဆုံးခဲ့ကြောင်း သတင်းရရှိသည်။
ကင်းပုန်းဝပ်နေသော စစ်ကောင်စီတပ်ဖွဲ့က အော်ဟစ်ဆဲဆိုပြီး ၄၀ မမ လက်နက်ကြီးဖြင့်လည်းကောင်း လက်နက်ငယ်များဖြင့် အချက် ၂၀၀ ခန့်လည်းကောင်း ပစ်ခတ်ခဲ့ရာ လူနာတင်ကားတွင်ကျည်ထိမှန်ပြီး ကျိုက်ထိုဆေးရုံသို့ မောင်းနှင်လာစဉ် ခါးတွင် ကျည်ထိမှန်ခဲ့သူ မောင်ပြည့်ဖြိုးအောင်မှာ လမ်းခုလတ်တွင် သေဆုံးခဲ့ခြင်းဖြစ်သည်။
အဆိုပါ ဖြစ်စဥ်နှင့်ပတ်သက်ပြီး စစ်ကောင်စီက PDFနှင့် တော်လှန်ရေးအင်အားစုများပစ်ခတ်ခြင်းကြောင့် သေဆုံးရခြင်းဖြစ်ကြောင်း သတင်းမှားဖြန့်ဝေနေကြောင်း KNU တပ်မဟာ ၁၊ သထုံခရိုင် PDF တာဝန်ခံက ပြောသည်။
အခင်းဖြစ်ပွားရာ လက်ပံပင်သင်္ချိုင်းတွင် ကင်းပုန်းဝပ်နေသော စစ်ကောင်စီတပ်ဖွဲ့များရှိကြောင်း၊ ယင်းစစ်သားများသည် နေ့စဉ်နီးပါး အရက်သေစာ သောက်စားမူးယစ်နေပြီး ရမ်းသန်းပစ်ခတ်လေ့ရှိကြောင်း၊ စစ်တောင်းနာရေးကူညီမှုအသင်း၏ လူနာတင်ကား ပစ်ခတ်ခံရမှုတွင် အဆိုပါ စစ်သားများက အော်ဟစ်ဆဲဆိုကာ ပစ်ခတ်ခြင်းဖြစ်ကြောင်း ဒေသသတင်းရင်းမြစ်များထံမှ စုံစမ်းသိရှိရသည်။
စစ်ကောင်စီက အဆိုပါ ဖြစ်ရပ်အပေါ် လုပ်ကြံသတင်းဖြန့်ဝေနေမှုအပေါ် ပြင်းထန်စွာ ရှုတ်ချကြောင်း၊ PDFနှင့် တော်လှန်ရေးအင်အားစုများအနေဖြင့် ပြည်သူလူထု၏ အသက်အိုးအိမ် စည်းစိမ်များအား မည်သည့်အခါမျှ ထိခိုက်ပျက်စီးအောင် ပြုလုပ်မည်မဟုတ်ကြောင်း KNU တပ်မဟာ ၁၊ သထုံခရိုင် PDF က ထုတ်ပြန်ထားသည်။
ဓါတ်ပုံ – စစ်တောင်းလူမှုကူညီရေးအသင်း၏ လူနာတင်ကားများ (ပုံအဟောင်းဖြစ်ပါသည်)
