ရန်ကုန်၊ ဇွန် ၁ဝ
မကွေးတိုင်း ရေစကြိုမြို့နယ် သစ်ကြီးတောရွာကို အကြမ်းဖက် စစ်တပ်က ယနေ့ ဇွန်လ ၁ဝ ရက်နေ့ ညနေ ၅ နာရီခန့်က စတင်ကာ မီးရှို့ဖျက်ဆီးနေကြောင်း ဒေသခံ ပြည်သူများက ရန်ကုန်ခေတ်သစ် မီဒီယာသို့ ပြောဆိုသည်။
အကြမ်းဖက် စစ်တပ်သည် သစ်ကြီးတောရွာအတွင်း သေနတ်များ ပစ်ဖောက်ကာ ဝင်ရောက်လာခြင်းကြောင့် ဒေသခံပြည်သူ အားလုံးသည် ဘေးလွတ်ရာသို့ ထွက်ပြေးနေရပြီး ဘေးပတ်ဝန်းကျင် အနီးအနားရှိ ကျေးရွာများက ပြည်သူများပါ ထွက်ပြေးတိမ်းရှောင်နေရကြောင်း သိရသည်။
” ရေစကြိုမြို့နယ် သစ်ကြီးတောရွာကို စစ်ခွေးတွေ မီးရိူ့နေတယ်။ အနီးအနား ကျေးရွာတွေက ပြည်သူတွေပါ ထွက်ပြေးနေရတယ်။ အခု ညနေ ၅ နာရီ လောက်ကတည်းက မီးရှို့နေတာ မီးတော့ များတယ်” ဟု ဒေသခံပြည်သူ တစ်ဦးကပြောဆိုသည်။
အလားတူ စစ်ကိုင်းတိုင်း ခင်ဦးမြို့နယ် ကံသစ်ရွာကို အကြမ်းဖက် စစ်တပ်က ယနေ့ ဇွန်လ ၁ဝ ရက်နေ့ မွန်းလွဲ ၂ နာရီခန့်တွင် မီးရှို့ဖျက်ဆီးနေကြောင်း ခင်ဦးမြို့နယ် သတင်းမှန်ပြန်ကြားရေး အဖွဲ့ထံမှ သိရသည်။
ကံသစ်ကျေးရွာကို အကြမ်းဖက် စစ်တပ်က အကြောင်းမဲ့ မီးတင်ရှို့ နေခြင်းဖြစ်ပြီး ကျေးရွာ မြောက်ပိုင်းကိုပါ ဆက်လက် မီးရှို့ဖျက်ဆီးနေကြောင်း သိရသည်။
လက်ရှိချိန်တွင် အကြမ်းဖက် စစ်တပ်က ကျေးရွာများကို ဆက်တိုက် ဝင်ရောက် စီးနင်းနေသောကြောင့် ခင်ဦး-ရေဦး လမ်းပိုင်းရှိ ကျေးရွာ ၅ရွာမှ ဒေသခံ ပြည်သူများသည် ဘေးလွတ်ရာသို့ ထွက်ပြေးတိမ်းရှောင်နေရကြောင်း သိရသည်။
Photo – အကြမ်းဖက် စစ်တပ် မီးရှို့ဖျက်ဆီးနေသော ရေစကြိုမြို့နယ်၊ သစ်ကြီးတောရွာကို အဝေးမှ တွေ့မြင်ရစဉ်။
