ရန်ကုန်၊ ဇွန် ၂၀
ရန်ကုန်တိုင်း၊ သန်လျင်မြို့နယ်၊ အောင်သပြေရဲစခန်းတွင် ယမန်နေ့ ည ၈ နာရီ ၃၀ မိနစ်အချိန် ဗုံး ပေါက်ကွဲမှုဖြစ်ပွားပြီး စစ်ကောင်စီတပ်များ လုံခြုံရေးယူထားသော TTU ဂိတ်ကိုလည်း ပစ်ခတ်မှု ဖြစ် ပွားကြောင်း ဒေသခံများက ရန်ကုန်ခေတ်သစ်သတင်းဌာနထံသို့ ပြောဆိုချက်နှင့် ဒေသ သတင်း ရင်းမြစ် သန်လျင်မီဒီယာ၏ ပြောဆိုချက်အရ သိရှိရသည်။
ဇွန်လ ၁၉ ရက်နေ့ ည ၈နာရီ၃၀ခန့်က သန်လျင် ကျောက်တန်းလမ်းမပေါ်ရှိ အောင်သပြေ ရဲစခန်း အနီးတွင် ဗုံးပေါက်ကွဲမူဖြစ်ခဲ့ပြီးနောက် TTU ကျောင်းအရှေ့ရှိ အကြမ်းဖက်စစ်ကောင်စီဂိတ်ကို လည်း လာရောက်ပစ်ခတ်သွားကြောင်း သိရှိရသည်။
“အောင်သပြေရဲစခန်းနားမှ ဗုံးပေါက်ကွဲသံအကျယ်ကြီးကြားရတယ်။ ပြီးတော့ ရဲစခန်းထဲကနေ သေနတ် သုံးချက်ပစ်တယ်။ ဘယ်ကပစ်တာလဲတော့ မသိဘူး။ အဲဒါပြီးတာနဲ့ TTU ကျောင်းအရှေ့က စစ်ခွေးဂိတ်ကို သေနတ်နဲ့၇ချက်၊ ၈ချက် လောက်ပစ်သွားတယ်။ ခွေးတွေကလည်းပြန်ပစ်တယ်။ ပြီးတာနဲ့ လမ်းကိုပိတ်ချပြီး ကားတွေကိုစစ်တော့တာပဲ။ သူတို့စစ်နေတဲ့အချိန် လာသမျှ ကား တွေ ကိုလည်းမီးတွေပိတ်ခိုင်းတယ်” ဟု ဒေသသတင်းရင်းမြစ် သန်လျင်မီဒီယာက ပြောသည်။
ယမန်နေ့ညပိုင်း သန်လျင် အောင်သပြေရဲစခန်း ဗုံးပစ်ခတ်မှုနှင့် TTU ကျောင်းရှေ့ စစ်တပ်ဂိတ် ပစ်ခတ်ခံရမှု စစ်သား ထိခိုက်သေဆုံးမှု သတင်း မသိရှိရသေးပေ။
အလားတူ လှိုင်သာယာ မြို့နယ်တွင် ဇွန်လ ၁၉ ရက်နေ့ ည ၈ နာရီအချိန် ဗုံးပေါက်ကွဲမှု ဖြစ်ပွားကြောင်း ၊ ထိခိုက်မှု မရှိသော်လည်း စစ်တပ်က မြို့နယ်အတွင်းသို့ လှည့်လည် စစ်ဆေးမှုများရှိကြောင်း သိရှိရသည်။
ဇွန်လ ၁၇ ရက်နေ့ ထန်းတပင်မြို့နယ်၊ ပန်တိုင်ဂိတ်တွင် မွန်းလွဲ ၂ နာရီခွဲ အချိန် ပစ်ခတ်မှုဖြစ်ပွားခဲ့ပြီး ၂ ဦးသေဆုံးကာ ၆ ဦး ဖမ်းဆီးခံရကြောင်း ရဲသတင်းရင်းမြစ်က ပြောသည်။
ဇွန်လ ၁၇ ရက်နေ့ မွန်းလွဲ ၂ နာရီခွဲအချိန် ထန်းတပင်၊ ပန်တိုင်စစ်ကောင်စီစစ်ဆေးရေးဂိတ်ကို လာရောက်ပစ်ခတ်ခြင်းဖြစ်ပြီး ပစ်ခတ်မှုကြောင့် ရဲ ၁ ဦးအပါအဝင် လူ ၂ ဦး သေဆုံးခဲ့ကြောင်း၊ စစ်တပ်ကလည်း လမ်းပိတ်ဆို့ခြင်း ၊ ပစ်ခတ်ခြင်းများ လုပ်ဆောင်သဖြင့် လူငယ် ၆ ဦး ဖမ်းဆီးခံရကြောင်း သိရှိရသည်။
“လူငယ်တွေကတော့ လမ်းသွားလမ်းလာတွေပါ။ လာပစ်တဲ့သူတွေမဟုတ်ဘူးလို့သိရတယ်။ ဖမ်းဆီး ခံရတဲ့သူ ၆ ဦးထဲမှာ ၂ ဦးကတော့ ကျည်ထိထားပြီး သေပြီလို့လည်း သိရတယ်။ ကျန်တဲ့သူတွေလည်း ဒဏ်ရာတွေနဲ့ပဲ။ ပန်တိုင်ဂိတ် ပစ်ခတ်မှုမှာ ၂ ဦးသေတာက ရဲတစ်ဦးနဲ့ ဂိတ်ထဲမှာ ထိုင်နေတဲ့ လူတစ်ဦး လို့ သိရတယ် ။ ဘယ်သူတွေလဲဆိုတာ အထဲမှာ လျှို့ဝှက် သတင်းဖုံးထားလို့ သေချာ မသိရဘူး” ဟု ရဲသတင်းရင်းမြစ်က ဆိုသည်။
အလားတူ ဇွန်လ ၁၈ ရက်နေ့ ညပိုင်း ရန်ကုန်တိုင်း မှော်ဘီမြို့နယ်တွင် စစ်တပ်နှင့်ရဲ အဖွဲ့များ ကင်း လှည့် ကြစဉ် အရက်မူးပြီး အဖွဲ့အချင်းချင်း ပစ်ခတ်မှုဖြစ်ပွားကြောင်း၊ ပစ်ခတ်မှုကြောင့် စစ်သား ထိခိုက်သေဆုံးမှု အခြေအနေကို မသိရှိရသေးကြောင်း ဒေသခံများထံမှ သိရှိရသည်။
“ပစ်ခတ်မှုဖြစ်စဉ် မူးပြီးဖြစ်တာလို့သိရတယ်။ စစ်ဒေသမှူးအဖွဲ့နဲ့ ရဲအဖွဲ့ငြိတာလို့ သိရတယ်။ စစ်ဒေသမှူးက စစ်မောင်” ဟု မှော်ဘီ သတင်းရင်းမြစ်က ပြောဆိုသည်။
ဓာတ်ပုံ- ရန်ကုန်တွင် လုံခြုံရေးယူထားသည့် အကြမ်းဖက်စစ်သားတစ်ဦး။ (ပုံအဟောင်းဖြစ်သည်။)
Photo- အီးပီအေ။
