ရန်ကုန်၊ ဇွန် ၂၄
မကွေးတိုင်း မြိုင်မြို့နယ် အတွင်းရှိ ကျေးရွာ ၁၃ ရွာကို စစ်တပ်က ယခုနှစ် ဇွန်လ အတွင်း ဝင်ရောက် စီးနင်းခဲ့ပြီး ကျေးရွာ ၂ ရွာက ပြည်သူပိုင် နေအိမ် ၈၅ လုံးကို မီးရှို့ ဖျက်ဆီးခဲ့ကြောင်း မြိုင်မြို့နယ် အခြေခံပညာ အထွေထွေ သပိတ်ကော်မတီ ထံမှ သိရသည်။
အကြမ်းဖက် စစ်တပ်သည် မြိုင်မြို့နယ် အတွင်းရှိ ကန်နက်၊ ပြင်သာ၊ ကျောက်တော၊ ရွာရှည်၊ လက်ထုပ်တော၊ ကုန်းဗလူ၊ ထနောင်းဝင်း၊ အလုံကြီး၊ ကုန်းစဥ်၊ မန်ကျည်းလေးပင်၊ ရွှေလင်းဆွဲ၊ တောင်ဘို့နှင့် ကွမ်းတောရွာများကို ဝင်ရောက် စီးနင်းခဲ့ခြင်းဖြစ်ကြောင်း သိရသည်။
အဆိုပါ အကြမ်းဖက် စစ်တပ်သည် ဇွန်လ ၁၆ ရက်နှင့် ၁၇ ရက်နေ့တို့တွင် ကန်နက် ကျေးရွာနှင့် ပြင်သာ ကျေးရွာရှိ ပြည်သူပိုင် နေအိမ် ၈၅ လုံးနှင့် ကျောက်တော ကျေးရွာရှိ ကား၂စီး ၊ ထွန်စက်(၁)စီးနှင့် ဆိုင်ကယ်(၃)စီးတို့ကို မီးရှို့ ဖျက်ဆီးခဲ့ကြောင်း သိရသည်။
ရွာရှည်ကျေးရွာကိုလည်း အကြမ်းဖက် စစ်တပ်က ဝင်ရောက် စီးနင်းခဲ့ပြီး လူမှုကူညီရေးကား ၁ စီးကို ရိုက်ခွဲဖျက်ဆီးပြီး ကျန် ၁ စီးကို ယူဆောင်ကာ ပြင်သာကျေးရွာမှ လူမှုကူညီရေး ကား ၁ စီးကိုလည်း ယူဆောင်သွားကြောင်း သိရသည်။
ထို့ပြင် အကြမ်းဖက် စစ်တပ် စစ်ကြောင်းသည် လက်ထုပ်တော၊ ကုန်းဗလူ၊ ထနောင်းဝင်း၊ အလုံကြီး၊ ကုန်းစဥ်၊ မန်ကျည်းလေးပင်နှင့် ရွှေလင်းဆွဲကျေးရွာများကိုလည်း ဝင်ရောက် စီးနင်းခဲ့ပြီး ပြည်သူပိုင် နေအိမ်များ ဝင်ရောက်မွှေနှောက်ဖျက်ဆီးကာ ဆိုင်ကယ်များနှင့် အဖိုးတန်ပစ္စည်းများကို ရိုက်ခွဲဖျက်ဆီးခဲ့ပြီး တောင်ဘို့ကျေးရွာနှင့် ကွမ်းတောကျေးရွာရှိ ပြည်သူပိုင် နေအိမ်များမှ အိမ်တွင်း ပရိဘောဂ ပစ္စည်းများအပါအဝင် အဖိုးတန် ပစ္စည်းအများအပြားကို ပျူစောထီးအဖွဲ့ဝင် အများစု နေထိုင်သော ကန်နီကျေးရွာနှင့် မြိုင်မြို့ပေါ်သို့ ကားများဖြင့် ယူဆောင်သွားကြောင်းသိရသည်။
ယင်း အကြမ်းဖက် စစ်တပ် စစ်ကြောင်းသည် လမ်းခရီး တစ်လျှောက်၌ ပြည်သူများကိုပါ ဖမ်းဆီးခဲ့ပြီး လူသားဒိုင်း အဖြစ်အသုံးပြုခြင်း၊ ပစ္စည်းများ သယ်ဆောင်ခိုင်းခြင်းများလည်း ပြုလုပ်ခဲ့ပြီး ဖမ်းဆီးခံရသောပြည်သူ အားလုံးပြန်လည်လွတ်မြောက်ခြင်း ရှိမရှိကို အတည်မပြုနိုင်သေးကြောင်း မြိုင်မြို့နယ် အခြေခံပညာ အထွေထွေ သပိတ်ကော်မတီ ထံမှ သိရသည်။
Photo – မြိုင်မြို့နယ်အတွင်း အကြမ်းဖက် စစ်တပ် မီးရှို့ဖျက်ဆီးသွားသော ပြည်သူပိုင် နေအိမ်များနှင့် ပစ္စည်းများ
