ဖရူဆို၊ ဒေါလောခူကျေးရွာအတွင်း အများပြည်သူပိုင် ပစ္စည်းများ ဖောက်ထွင်းခိုးယူနေသော အကြမ်းဖက်စစ်တပ်ကို ကရင်နီပူးပေါင်းတပ်ဖွဲ့ဝင်တိုက်၊ စစ်သား ၁ ဦးသေဆုံးပြီး လက်နက် ၁ လက်ရရှိ

ရန်ကုန်၊ ဇူလိုင် ၁၇

ကရင်နီပြည်နယ်၊ ဖရူဆိုမြို့နယ်၊ ဒေါလေခူကျေးရွာအတွင်းရှိ အများပြည်သူပိုင် နေအိမ်များကို ဖောက်ထွင်းဝင်ရောက်ကာ ပစ္စည်းများနှင့် အိမ်မွေး တိရစ္ဆာန်များကို ခိုးယူနေသော အကြမ်းဖက်စစ်တပ်ကို ယမန်နေ့ ဇူလိုင်လ ၁၆ ရက်နေ့တွင် ကရင်နီတပ်မတော် KA နှင့် ကရင်နီအမျိုးသားများကာကွယ်ရေးတပ်ဖွဲ့ KNDF က ဝင်ရောက်တိုက်ခိုက်ရာ စစ်သား ၁ ဦးသေဆုံးပြီး ၎င်းထံမှ သေနတ် ၁ လက်ကို ရရှိခဲ့ကြောင်း KNDF က သတင်းထုတ်ပြန်သည်။

အများပြည်သူပိုင် ပစ္စည်းများကို ဖောက်ခွင်းခိုးယူနေသော အကြမ်းဖက်စစ်ကောင်စီတပ်ဖွဲ့မှ တပ်မ ၆၆ လက်အောက်ခံ တပ်ဖွဲ့များဖြစ်ပြီး KNDF က ဝင်ရောက်တိုက်ခိုက်ရာ ၁၀ မိနစ်ခန့် တိုက်ပွဲဖြစ်ပွားကြောင်း၊ ကရင်နီတပ်ဖွဲ့ဘက်မှ ထိခိုက်မှု မရှိကြောင်း သိရှိရသည်။

ဖရူဆိုမြို့အခြေစိုက် အကြမ်းဖက်စစ်တပ်ဩ အမှတ် ၁၄ တန်းမြှင့်စစ်လေ့ကျင့်ရေးကျောင်း ပတ်ပတ်လည်တွင် လုံခြုံရေးယူထားသော တပ်မ ၆၆ တပ်ဖွဲ့ဝင်များသည် အနီးဝန်းကျင် ကျေးရွာများရှိ အများပြည်သူနေအိမ်များကို နေ့စဉ်ဝင်ရောက် ဖောက်ထွင်းကာ တန်ဖိုးရှိပစ္စည်းများ အိမ်မွေး တိရစ္ဆာန်များကို ခိုးယူစားသောက်နေကြောင်း KNDF က သတင်းထုတ်ပြန်သည်။