ရန်ကုန်၊ ဇူလိုင် ၂၇
စစ်ကိုင်းတိုင်း ခင်ဦးမြို့နယ် လက်ပန်လှရွာကို အကြမ်းဖက် စစ်ကောင်စီ တပ်ဖွဲ့များက အရပ်ဝတ်များဖြင့် ယနေ့ ဇူလိုင်လ ၂၇ ရက်နေ့ နံနက် ၉ နာရီခန့်တွင် ဝင်ရောက် စီးနင်းခဲ့ပြီး ပြည်သူ ၂ ဦးသတ်ဖြတ်ခဲ့ကြောင်း ဒေသခံ ပြည်သူများက ရန်ကုန်ခေတ်သစ် မီဒီယာသို့ ပြောဆိုသည်။
အကြမ်းဖက် စစ်တပ်သည် ကျေးရွာနေ ပြည်သူ ကိုတင်မိုးဝင်းကို ပစ်သတ်ပြီး အသက် ၈၀ ကျော်အရွယ် ဒေါ်ဖွားဆီကို မီးရှို့သတ်ဖြတ်ခဲ့ကာ ပြည်သူပိုင် နေအိမ် ၂၀ ကျော်ကို မီးရှို့ဖျက်ဆီးခဲ့ကြောင်း သိရသည်။
” ဒီနေ့ ၉ နာရီလောက်က စစ်ခွေးတွေက ရွာကို ဝင်စီးတာ အရပ်ဝတ်တွေနဲ့ PDF ပုံစံလိုမျိုး အယောင်ဆောင်ပြီး ဝင်လာတာ ရွာထဲရောက်တော့ ကိုတင်မိုးဝင်းကို အရင် ပစ်သတ်တယ်။ အသက် ၈စ ကျော်အရွယ် ဒေါ်ဖွားဆီကိုလည်း မီးရှို့ သတ်ဖြတ်သွားတယ်။ ပြည်သူပိုင် နေအိမ် ၂၀ ကျော်ကိုလည်း မီးရှို့ ဖျက်ဆီးသွားတယ်” ဟု ဒေသခံ ပြည်သူ တစ်ဦးကပြောဆိုသည်။
အဆိုပါ အကြမ်းဖက် စစ်တပ်သည် လက်ပန်လှရွာကို ဝင်ရောက် စီးနင်းပြီးနောက် လောင်းရှည်ရွာကိုလည်း ဝင်ရောက် စီးနင်းခဲ့ပြီး ပျက်စီးဆုံးရှုံးမှု အခြေအနေများကို အတည်မပြုနိုင်သေးကြောင်း သိရသည်။
