ရန်ကုန်၊ စက်တင်ဘာ ၂၆
မကွေးတိုင်းမြိုင်မြို့နယ်၊ ကျောက်ခွက်ကျေးရွာတွင် ယမန်နေ့ မိုင်းဆွဲတိုက်ခိုက်မှုကြောင့် စစ်သား ၂ ဦးသေဆုံးခဲ့ပြီး သေဆုံးခဲ့သူ တပ်ကြပ်ကြီးအောင်ဆန်းဝင်း၏ အလောင်းကို အမိန့်ပြန်တမ်းတစ်ခု၊ ငွေကျပ် ၆၄၅၀ ဖြင့် မြေမြှုပ်သဂြိုလ်ထားခဲ့ကြောင်း မြိုင်မြို့နယ် ပြည်သူ့ ကာကွယ်ရေးတပ်ဖွဲ့က ရန်ကုန်ခေတ်သစ်သတင်းဌာနထံသို့ ပြောဆိုသည်။
မြိုင်မြို့နယ် ပကဖသည် စက်တင်ဘာလ ၂၆ ရက်နေ့ နံနက် ၁၁ နာရီ ၃၅ မိနစ်အချိန် မြိုင်နယ် ကျောက်ခွက်ရွာသို့ စစ်ကြောင်းထိုးလာသော စစ်အင်အား ၆၀ ခန့်အား မိုင်းပွိုင့်အကြီး ၂ ပွိုင့်ဖြင့်တိုက်ခိုက်ခဲ့ကြောင်း၊ မိုင်းဆွဲတိုက်ခိုက်မှုကြောင့် တပ်ကြပ်ကြီးအပါအဝင်နှစ်ဦးသေဆုံးပြီးအများအပြား ထိခိုက်ဒဏ်ရာရသွားကြောင်း၊ သေဆုံးသွားသော တပ်ကြပ်ကြီးအလောင်းအား ပိုက်ဆံ ၆၄၅၀ ကျပ်(နှစ်ရာတန်တစ်ရာတန်ငါးဆယ်တန်အကြွေများ)နှင့်အမိန့်ပြန်တမ်းစာတစ်ခုပါ အတူမြုပ်နှံထားခဲ့ကြောင်း မြိုင်ပကဖက ပြောသည်။
တပ်ကြပ်ကြီးအောင်ဆန်းဝင်းကို ခလရ ၂၅၈ မှ တပ်ရင်းမှူး ဒုတိယဗိုလ်မှူးကြီး ငြိမ်းချမ်း၏ အမိန့်ဖြင့် အမိန့်ပြန်ထားသည်ကို တွေ့ရသည်။
ထို့ပြင် ယနေ့နံနက် ၁၁ နာရီ ၅၀ မိနစ်အချိန် မြိုင်မြို့နယ်၊ ကျောက်ခွက်ကျေးရွာမှထွက်လာသော စစ်ကောင်စီတပ်များ ကြက်ဆူအိုင့်ကျေး ရွာရောက်ရှိနေချိန် ပြည်သူ့ကာကွယ်ရေးတပ်များက လက်နက်ကြီး လက်လုပ်မိုင်းများဖြင့်တိုက်ခိုက်ရာ စစ်တပ်မှ အရာရှိတစ်ဦး အပါအဝင် ၂ ဦး သေဆုံးကြောင်း ၊ အလောင်း အား မီးရှို့ ခြင်း မြေမြှပ်ခြင်းတို့ဆောင်ရွက်ခဲ့ကြောင်း မြိုင်ပကဖက ပြောသည်။
“အလောင်းက မနေ့က သူတို့မြှုပ်ထားခဲ့တာက။ ဒီနေ့ ထပ်ပြီး မိုင်းဆွဲတယ်။ ၂ ဦးသေတယ်” ဟု မြိုင်ပကဖက ဆိုသည်။
