ရန်ကုန်၊ စက်တင်ဘာ ၂၈
ရန်ကုန်တိုင်း၊ အလုံမြို့နယ်၊ အင်းစိန်မြို့နယ်၊ သာကေတမြို့နယ်တို့တွင် ဗုံးပေါက် ကွဲမှုများနှင့် ပစ်ခတ်မှုများဖြစ်ပေါ် ကြောင်း ဒေသခံများက ရန်ကုန်ခေတ်သစ်သတင်းဌာနထံသို့ ပြောဆိုကြသည်။
စက်တင်ဘာလ ၂၈ ရက်နေ့ မွန်းလွဲ ၁ နာရီ ၃၀ မိနစ်အချိန် ရန်ကုန်တိုင်း၊ အလုံမြိုနယ်၊စောရန်ပိုင်အရှေ့ရပ်ကွက် ရပ်ကွက်အုပ်ချုပ်ရေးမှူးရုံး ဗုံးပေါက်ကွဲခဲ့ပြီး လူ ၃ ဦး ထိခိုက်ဒဏ်ရာရရှိကြောင်း ဒေသခံများက ပြောဆိုကြသည်။
“ဗုံးပေါက်တာက ရပ်ကွက်ရုံးနားမှာ ပေါက်တာ။ ရပ်ကွက်ရုံးထဲမှာ ခွေးတွေ မကြာခဏ လာတာမျိုးရှိတယ်။ တချို့လည်း အရပ်ဝတ်နဲ့နေတာမျိုးရှိတယ်။ လူ ၃ ဦးတော့ထိသွားတယ်။ မစိုးရိမ်ရဘူး။ ရှပ်ထိတွေပဲ။ နောက်တော့ ခွေးတွေက လမ်းတွေကိုပါ ပိတ်ပြီး စစ်တာ။ ရုံးနားကိုတော့ ဗုံးရှိမလားဆိုပြီး သူတို့ ထပ်ရှာနေတာလည်း တွေ့တယ်” ဟု အလုံမြို့နယ်မှ ဒေသခံ ပြည်သူတစ်ဦးက ဆိုသည်။
ယနေ့ စက်တင်ဘာလ ၂၈ ရက်နေ့ည ၇ နာရီအချိန် အလုံမြို့နယ်တွင်ပင် ဗုံးပေါက်ကွဲသံ ထပ်မံကြားရကြောင်း ဒေသခံများက ပြောဆိုပြီး ပေါက်ကွဲသည့်နေရာကို မသိရှိရသေးဟု ဆိုကြသည်။
ထို့ပြင် အင်းစိန် ကြို့ကုန်းအနောက်ရပ်ကွက် မြို့ပတ် ရထားစက်ရုံနောက်ဘက်၊ မီးရထားသံလမ်းတွင်စစ်တပ်က ပြည်သူများကို ပစ်ခတ်မှုများလုပ်ဆောင်နေကြောင်း ၊ မည်သည့်အတွက်ကြောင့် ပစ်ခတ်သည်ကို မသိရှိရကြောင်း ဒေသခံများက ပြောသည်။
” စစ်ကာင်စီက သေနတ်ပစ်ခတ်နေတယ်။ သူတို့တပ်စွဲတဲ့ အရှေ့နေ ဖြတ်သွား ဖြတ်လာ လူကို ပစ်တာ။ ဒီည ၇ နာရီ ၄၈ မိနစ် အချိန်မှာ ၅ ချက်ပစ်တာ။ မနေ့ကလည်း စက်ရုံရှေ့ ဗဟို လမ်းမပေါ်မှာ ၆ ချက် ပစ်တယ်။ မြို့ ပတ် ဒီဇယ် စက်ရုံမှာ တပ်စွဲထားတဲ့ စစကောင်စီတပ်က ပစ်နေတာပါ။ ခွေးတွေ ရမ်းကားနေတာ” ဟု ပြည်သူတစ်ဦးက ပြောသည်။
အလားတူ သာကေတမြို့နယ်တွင်လည်း ယနေ့ည ၇ နာရီ ၄၅ မိနစ်အချိန် ပစ်ခတ်သံ တချို့ကြားရပြီး အသေးစိတ် အခြေအနေကို ဆက်လက်စုံစမ်းနေဆဲပင်ဖြစ်သည်။
သာကေတဒေသခံတချို့၏ အဆိုအရ သာကေတတွင် ယနေ့ ညထွက်ပေါ်သော သေနတ်သံမှာ အုပ်ချုပ်ရေးမှူး ၊ စစ်တပ်သတင်းပေး ထွန်းထွန်းဝင်း ပစ်သတ်ခံ ရခြင်းဖြစ်ကြောင်း၊ လက်ရှိတွင် စစ်တပ်က ပိတ်ဆို့ စစ်ဆေးမှုများလုပ်ဆောင် နေကြောင်း သိရှိရသည်။
“သာကေတ ၄တောင် အောင်သစ္စာ ၈လမ်း ကန်ထောင့်အနီးမှာ ထွန်းထွန်းဝင်းဆိုသူ ဖောင်းဒိုင်းခံရတယ်လို့ကြားတယ်” ဟု ဒေသခံတစ်ဦးက ပြောဆိုသည်။
ထို့ပြင် မန္တလေးတိုင်း၊ မန္တလေးမြို့၊ အောင်မြေသာစံမြို့နယ်တွင် အကြမ်းဖက်စစ်တပ်ကို သတင်းပေးလုပ်နေသည့် ငမျိုးဆိုသူကို ယနေ့ နံနက် ၇ နာရီအချိန် ကမ်းနားလမ်း၊ ဘောကကြီး ဆိပ်ကမ်းအနီးတွင် Generation Z Power -GZP(Mandalay) က သေနတ်ဖြင့် ၁၂ ချက်ပစ်ခတ်သဖြင့် သေဆုံးသွားကြောင်း၊ ထိုရှင်းလင်းမှုတွင် ပြည်သူတစ်ဦး ထိခိုက်မှုရှိ၍ တောင်းပန်ကြောင်း သတင်းထုတ်ပြန်ထားသည်။
ဓာတ်ပုံ- ရန်ကုန်တွင် လုံခြုံရေးယူနေသော အကြမ်းဖက်စစ်ကောင်စီလက်အောက်ခံ ရဲကားတစ်စီ။
