ရန်ကုန်၊ အောက်တိုဘာ ၁၀
ရန်ကုန်တိုင်း၊ ဒဂုံမြို့သစ်မြောက်ပိုင်းမြို့နယ် ၊ စစ်တောင်းစီးတီးမတ်အတွင်း ညနေ ၄ နာရီ ၃၀ မိနစ်အချိန် မော်တော်ယာဉ်အတွင်း ပေါက်ကွဲမှုဖြစ်ပြီး ယာဉ် မောင်းဖြစ်သူ ပြင်းထန်စွာ ဒဏ်ရာရရှိကြောင်း ဒေသခံများက ရန်ကုန်ခေတ် သစ်သတင်းဌာနထံသို့ ပြောဆိုသည်။
အောက်တိုဘာ ၁၀ ရက်နေ့ ညနေ ၄ နာရီ ၃၀ မိနစ်အချိန် ဟွန်ဒါဖစ် အနီရောင်ယာဉ်အတွင်းမှ ပေါက်ကွဲခြင်းဖြစ်ပြီး ယာဉ်မောင်းဖြစ်သူသည် ခြေထောက် နှစ်ဖက်စလုံး ဖြတ်တောက်ရဖွယ်ရှိပြီး မျက်နှာနှင့်ရင်ဘတ်တွင်လည်း ဗုံးစများ ထိမှန်ထားကြောင်း သိရှိရသည်။
“မြောက်ဒဂုံ စစ်တောင်းစီးတီမတ်ရှေ့မှာ ပေါက်ကွဲမှု ဖြစ်ပါတယ်။ ညနေ၄ ၃၀လောက်မှာပါ။ နှစ်ကြိမ်ပေါက်ပါတယ်လူထိတယ်။ ပေါက်တဲ့အသံတော့ကိုယ်တိုင်ကြားပါတယ်။ လူဘယ်နှစ်ယောက်ထိလဲတော့ မသိရသေးဘူး။ ထိတဲ့လူလည်း သေလောက်မယ်ပြောတယ်။ ကားထဲက ပေါက်တာလား။ ကားထဲကို ဗုံးပစ်ထည့်ခံရသလားလဲ သေချာမသိရသေးဘူး” ဟု ဒေသခံတစ်ဦးက ပြောသည်။
လက်ရှိတွင် ဗုံးကွဲမှုကြောင့်ဒဏ်ရာရရှိသူကို ဆေးရုံတင်ပို့ထားပြီး စစ်တပ်က မြောက်ဒဂုံမြို့နယ်တစ်ခုလုံးကို ပိတ်ဆို့ စစ်ဆေးလျက်ရှိကြောင်း သိရှိရသည်။
ဓာတ်ပုံ- စစ်တပ်လော်ဘီများ ထုတ်ပြန်ထားသည့် မြောက်ဒဂုံ တွင် ဗုံးပေါက်ကွဲမှုဖြစ်ပွားသော ဟွန်ဒါဖစ် အနီရောင်ကား။
