ရန်ကုန်၊ အောက်တိုဘာ ၂၄
စစ်ကိုင်းတိုင်း၊ ကန့်ဘလူမြို့နယ်ရှိ ကျေးရွာ ၃ ရွာကို အကြမ်းဖက် စစ်တပ်က မီးရှို့နေကြောင်း ကျွန်းလှတက်ကြွလှုပ်ရှားသူများ အဖွဲ့ထံမှ သိရသည်။
အောက်တိုဘာလ ၂၄ ရက်နေ့တွင် ကိုတောင်ဘို့တွင် တပ်စွဲထားသော အကြမ်းဖက် စစ်တပ် ခမရ-၃၆၃မှ စစ်သားများသည် နံနက် ၆ နာရီခန့်တွင် ဥာဏ်အင်းရွာ၊ နံနက် ၉ နာရီခန့်တွင် ရွာမရွာနှင့် နံနက် ၁၁ နာရီခန့်တွင် ဇော်ချောင်းရွာတို့ကို ဝင်ရောက် စီးနင်း မီးရှို့ဖျက်ဆီးနေခြင်း ဖြစ်ကြောင်း သိရသည်။
အကြမ်းဖက် စစ်တပ်သည် တိုက်ပွဲဖြစ်ပွားခြင်း မရှိဘဲ ဝင်ရောက် စီးနင်း နေခြင်းဖြစ်ပြီး အင်းလယ်ကြီး၊ ဉာဏ်အင်း၊ ရွာသစ်ကုန်း၊ ရွာမ၊ ရှမ်းတပ်၊ ကျွန်းပင်ကုန်း၊ ကိုင်းရိုး၊ သရက်တာနှင့် ထိန်တော စသည့် ကျေးရွာ ၉ ရွာ ထောင်နှင့် ချီသော ပြည်သူများလည်း ဘေးလွတ်ရာသို့ ထွက်ပြေး တိမ်းရှောင်နေရကြောင်း သိရသည်။
” ဒီနေ့ စီးနင်းမှုမှာ သင်တောရွာက ပြည်သူ ၁ ဦး လက်နက်မှန်ပြီး ထိခိုက်ဒဏ်ရာရထားတယ်။ တိုက်ပွဲလဲ မရှိဘူး။ ထိတွေ့မှုလဲ မဖြစ်ဘူး။ အဲ့ဒီစစ်ကြောင်းက ကိုးတောင်ဘို့ အထိုင်ချထားတာ ၆ လကျော်လာပြီ သူတို့က တစ်ရွာဝင် တစ်ရွာထွက် လှည့်ပတ် ရှို့နေတာပဲ မနေ့ကတော့ ဝက်သဲအင်းရွာက တစ်အိမ်ရှို့ခံရတယ်။ လောလောဆယ်တော့ ဇော်ချောင်းရွာထဲ ဝင်ခါစပဲရှိသေးတယ်။ ဘယ်ကို ဆက်ပြီး စီးနင်းမယ်ဆိုတာ အတိအကျတော့ ပြောလို့မရသေးဘူး” ဟု ကျွန်းလှတက်ကြွလှုပ်ရှားသူများ အဖွဲ့မှ တာဝန်ရှိသူ တစ်ဦးကပြောဆိုသည်။
အကြမ်းဖက် စစ်တပ် စစ်ကြောင်းသည် ဇော်ချောင်းရွာကို ကြိမ်မြောက် မီးရှို့ ဖျက်စီးနေခြင်း ဖြစ်ပြီး ဇော်ချောင်းရွာတွင် အိမ်ခြ ၁၈၀ ခန့်ရှိကာ ၄ ကြိမ် မီးရှို့ဖျက်စီးမှုအတွင်း အိမ်ခြေ ၁၃၉ လုံး မီးလောင်ပြာကျခဲ့ပြီး အိမ်ခြေ ၄၀ ခန့်သာ ကျန်ရှိတော့သည့် ကျေးရွာဖြစ်ကြောင်း သိရသည်။
Photo – အကြမ်းဖက် စစ်တပ် မီးရှို့ဖျက်ဆီး နေသော ဇော်ချောင်းရွာကို အဝေးမှ တွေ့မြင်ရစဥ်
