ရန်ကုန်၊ အောက်တိုဘာ ၂၆
ကမ္ဘာကျော် အွန်လိုင်းကုမ္ပဏီတစ်ခုဖြစ်သည့် Joom ကုမ္ပဏီ၏ အမည်၊ Logo များကို အသုံးပြုကာ ဝက်ဘ်ဆိုက်အတု၊ ဆော့ဖ်ဝဲလ်အတု၊ အက်ပလီကေးရှင်း အတု ဖန်တီး၍ MLM ပုံစံဖြင့် ငွေထည့်ခိုင်း ၊ အဖွဲ့ဝင် ရှာဖွေခိုင်းပြီး ကျပ်သိန်းထောင်သောင်းချီ လိမ်လည်မှုဖြစ်ပွားကြောင်း Joom အတုဖြင့် အလိမ်ခံခဲ့ရသူများက ရန်ကုန်ခေတ် သစ်သတင်းဌာနထံသို့ ပြောဆိုကြသည်။
မြန်မာနိုင်ငံတစ်ဝန်းတွင် Joom အတုဖြင့် လူဦးရေ ၁၉,၀၀၀ ကျော် ငွေအလိမ်ခံလိုက်ရကြောင်း၊ အဖွဲ့ဝင်များ များပြား လာချိန်တွင် ငွေထုတ်မရတော့ဘဲ လိမ်လည်သွားခြင်းဖြစ်ကြောင်း၊ နစ်နာသူများစွာ ရှိကြောင်း သိရှိရသည်။
“ Joom ဆိုတဲ့ ဆော့ဝဲလ်တစ်ခုကနေ လူတွေတော်တော်များများ ငွေတွေ လိမ်ခံလိုက်ရပါတယ် ။ ခုထိ ငွေတွေ မထုတ်ပေးသေးဘဲ နေ့ရွှေ့ညရွှေ့ လုပ်နေပါတယ်။ လိမ်ခံရတဲ့သူတွေထဲမှာ မိသားစု ခက်ခဲနေလို့ ပိုက်ဆံချေးပြီး လုပ်တဲ့သူတွေရယ်၊အရမ်းခက်ခဲပြီး ဘယ်အလုပ်မှ ရှာမရလို့ ရမိရရာ လုပ်မိတဲ့သူတွေ ၊ အခြားနစ်နာသူတွေ အများကြီးပါပါတယ်။ တတ်နိုင်တဲ့ဘက်ကနေ ကူညီပေးပါနော်။ ကိုယ်တိုင်လည်း တစ်သိန်းခွဲပါသွားတယ်။ ” ကိုယ်တိုင် လိမ်လည်ခံလိုက်ရသူတစ်ဦးက ရန်ကုန်ခေတ်သစ်သို့ ပြောဆိုသည်။
Joom အမည်ခံ ဆောဖ့်ဝဲသည် အဖွဲ့ဝင် အဖြစ် ဝင်ရောက်လျှင် တစ်နေ့ အမေရိကန်ဒေါ်လာ ၃ ဒေါ်လာရမည်ဖြစ်ကြောင်း၊ လူအသစ်ထပ်ရှာလျှင် ရာထူး အဆင့်တက်ကာ ဘောနပ်ရမည်ဟူ၍ စည်းရုံးကြောင်း၊ ယင်းနောက် လူများစွာ ရှိလာချိန်တွင် ငွေကြေးလိမ်လည်ခဲ့ခြင်းဖြစ်ကြောင်း၊ အဖွဲ့ဝင် မန်ဘာ စတင်ဝင်ချိန်တွင် အမေရိကန်ဒေါ်လာ ၇၀ ဝင်ကြေးအဖြစ် ပေးရကြောင်း၊ ကုန်ပစ္စည်းများကို အော်ဒါအတုတင်ရုံနှင့် နေ့စဉ် ငွေဝင်မည်ဟုဆိုကာ မဲဆွယ်ခဲ့ပြီး အစပိုင်းတွင် Kpay မှ တစ်ဆင့် ငွေသွင်း ငွေထုတ်လုပ်ဆောင်နိုင်ခဲ့ကြောင်း၊ ယင်းနောက် လက်ရှိအချိန်တွင် ငွေရရှိခြင်းမရှိဘဲ လူပေါင်းများစွာ အလိမ်ခံလိုက်ရခြင်းဖြစ်ကြောင်း သိရှိရသည်။
Joom ဆော့ဖ်ဝဲအတုဖြင့် ငွေသွင်းငွေထုတ် လက်ခံ လိမ်လည်သွားသည့် Kpay နံပါတ်များမှာ 09- 670048290 ၊ 09 686547123 ၊ 09 686074205 ၊ 09 674089529 ၊ 09 665758024 ၊ 09 699323483 ၊ 09 670623721 ၊ 09 683063206 ၊ 09 689495943 ၊ 09 691939818 ၊ 09 675892933 ၊ 09 686334027 ၊ 09 691752239 ၊ 09 774691325 ၊ 09 965077891 တို့ ဖြစ်ကြောင်း ငွေလိမ်ခံရသူများက ရန်ကုန်ခေတ်သစ်သို့ ပေးပို့သည်။
အဆိုပါ Joom ဆော့ဖ်ဝဲအတုနှင့် ပတ်သက်၍ စောင့်ကြည့်သူများက စက်တင်ဘာက အစောပိုင်းတည်းက သတိ ပေးရေးသားမှုများရှိခဲ့ပြီး လက်ရှိအချိန်တွင် Joom ဦးဆောင်သူဆိုသူများက မန်ဘာဝင်များကို ဆက်သွယ်ခြင်းမရှိ၊ ငွေပေးခြင်း မရှိဘဲ ငွေကြေးလိမ်လည်သွားကြခြင်းဖြစ်သည်။
ကမ္ဘာကျော် အွန်လိုင်းကုန်သွယ်ရေး Joom အစစ်မှာ ကုန်ပစ္စည်းများကို အမှန်တကယ် ဝယ်ယူနိုင်သည့် ဝက်ဘ်ဆိုက်ဖြစ်ပြီး မြန်မာနိုင်ငံတွင် လိမ်လည်သည့် Joom အတုကဲ့သို့ ကုန်ပစ္စည်းများကို အော်ဒါ အယောင်ဆောင်တင်ခြင်းလုပ်ဆောင်နိုင်သည့် ဝက်ဘ်ဆိုက်မဟုတ်ပေ။
ဓာတ်ပုံ- ငွေလိမ်လည်သည့် Joom အက်ပလီကေးရှင်း အတုကို ငွေထည့်သွင်းပြီး မြင်ရသည့်ပုံ။
