ရန်ကုန်၊ နိုဝင်ဘာ ၂၆
ကရင်ပြည်နယ်၊ သံတောင်ကြီးမြို့နယ်၊ လိပ်သိုဒေသ သံမိုးတောင်ကျေးရွာရှိ စစ်တပ်စခန်းကို PDF မဟာမိတ်တပ်ပေါင်းစုက ယနေ့ တိုက်ခိုက်ပြီး စစ် ကောင် စီတပ်ဘက်မှ ၂၀ နီးပါး သေဆုံးသွားကြောင်း သံတောင်မြောက်ပိုင်း (အထူးဒေသ) တပ်ဖွဲ့ မှ ဗိုလ်မုတ်ဆိတ်က ရန်ကုန်ခေတ်သစ်သတင်းဌာနထံသို့ ပြောဆိုသည်။
နိုဝင်ဘာ ၂၆ ရက်နေ့ နံနက် ၆ နာရီတွင် ဦးကိုကြီး ဦးစီးသည့် သံတောင် မြောက်ပိုင်း (အထူးဒေသ) တပ်ဖွဲ့၊ တပ်ခွဲ ၃ နှင့် မဟာမိတ် ပူးပေါင်းအဖွဲ့ PDF တပ်ရင်း ၃၅၀၁ ၊ တပ်ခွဲ ၄ ၊ ဒေသ ပြည်သူ့ကာကွယ်ရေးတပ်ဖွဲ့များ ပူးပေါင်း၍ စစ်ကောင်စီတပ်၏ သံမိုးတောင် တပ်စခန်းကို တိုက်ခိုက်ခဲ့ကြကြောင်း၊ တိုက်ပွဲ ကြာမြင့်ချိန် ၂ နာရီခွဲခန့်ရှိပြီး စခန်းရှိ စစ်ကောင်စီတပ်သားအားလုံး သေဆုံး သွားကြောင်း သိရှိရသည်။
“စစ်တပ် စခန်းမှာ ရှိတဲ့ စစ်ခွေးတွေ အားလုံး ထိခိုက်သေဆုံးပြီး စခန်းကို ကျနော် တို့ ကျားထိုးတက်တယ်။ အောက် ခြေ ကင်းစခန်းကို စတင် မီးရှို့နေ ချိန် မှာ ရဟတ်ယာဉ် ၂ စီးနဲ့ လာပစ်တယ်။ ဗုံးတွေကျဲတယ်။ စက်သေနတ်တွေ ရော့ကတ်တွေနဲ့ ပစ်တယ်။ ကျနော်တို့အားလုံး အန္တရယ် ကင်းစွာ ပြန်ဆုတ် နိုင်ခဲ့ပါတယ်။ စစ်ခွေးတွေဘက်က ၁၅ ဦးနဲ့ ၂၀ အကြား သေပါတယ်။ အနည်း ဆုံး ခွေး ၁၅ ကောင် အနည်းဆုံးပဲ။ စစ်တပ်က ရဟတ်ယာဉ်နဲ့ ၇ ခေါက် ဗုံးကျဲတယ်။ ပစ်တယ်။ အောက်ခြေ ကင်းစခန်းကို စပြီး မီးရှို့ ကျားထိုး တက် တုန်း ရဟတ်ယာဉ်တွေ ရောက်လာတာ” ဟု ဗိုလ်မုတ်ဆိတ် က ပြောသည်။
ကရင်ပြည်နယ်၊ သံတော်ကြီးမြို့နယ်၊ သံတောင်မြောက်ပိုင်း (အထူးဒေသ) နယ်မြေတွင် ယနေ့တိုက်ပွဲမတိုင်မီ ယခု နိုဝင်ဘာလ အတွင်းတိုက်ပွဲ ၃ ကြိမ်ရှိခဲ့ပြီး ယင်း တိုက်ပွဲ ၃ ကြိမ်တွင် စစ်သား ၂၀ ဦး အထက် ထိခိုက် သေဆုံးမှုရှိကြောင်း၊ အောက်တိုဘာလအတွင်းတွင်လည်း တိုက်ပွဲ ၃ ကြိမ်ဖြစ်ပွားခဲ့ပြီး အနည်းဆုံး စစ်သား ၂၀ ကျော် ထိခိုက် သေဆုံးခဲ့ကြောင်း ၎င်းက ဆက်ပြောသည်။
ယနေ့တိုက်ပွဲတွင် စစ်တပ်က သံမိုးတောင်ကျေးရွာကို ရဟတ်ယာဉ်များဖြင့် ရမ်းသမ်းပစ်ခတ်သဖြင့် ကျေးရွာရှိ ပြည်သူ ပိုင်နေအိမ်များ ပျက်စီးသွားပြီး ရွာသား ၁ ဦးသေဆုံးကာ ၁ ဦး ဒဏ်ရာရရှိသည်ဟု ကနဦးသတင်းများရရှိ ထားကာ လက်ရှိတွင် စစ်တပ်က လမ်းများ ပိတ်ဆို့ထားကြောင်း သိရှိရသည်။
“တောင်ငူနဲ့လိပ်သိုလမ်းမကြီးပေါ် က သံမိုးတောင်ရွာမှာ တိုက်ပွဲဖြစ်တာမှာ စစ် တပ် ဘက် သေတာများလို့ ရဟတ်ယာဉ်နဲ့ပစ်တယ်။ အခုထက်ထိ လမ်း တွေ ကိုပိတ်ထားတယ်။ သံမိုးတောင်မှာ တိုက်ပွဲ ဖြစ်ပြီးတော့ ထုံးဘိုကြီး ရွာမှာ ရှိတဲ့ စစ်တပ်ကလည်းလက်နက်ကြီး၂ချက်နဲ့လက်နက်ငယ် ရွာဘက်တွေကို ရမ်းပစ်တယ်” ဟု ဒေသခံတစ်ဦးက ပြောသည်။
နိုဝင်ဘာ ၁၉ ရက်နေ့ကလည်း စစ်ကောင်စီ စစ်ကြောင်းကို တောင်ငူ PDF က မိုင်းဆွဲတိုက်ခိုက်သဖြင့် ထုံးဘိုကြီးရွာတွင် အခြေချထားသော စစ်တပ်စခန်းမှ စခန်းမှူးနှင့်တပ်သား ၂ ဦး သေဆုံးသွားကြောင်း ဒေသခံများက ပြောဆို ကြ သည်။
