ရန်ကုန်၊ နိုဝင်ဘာ ၁၇
၈၈ မျိုးဆက် ကျောင်းသား ခေါင်းဆောင် ကိုမြအေး ဒီနေ့မှာပြန်လည်လွတ် မြောက်လာဖို့ရှိတယ် လို့သတင်းတွေထွက်ပေါ်နေပါတယ်။
အဲဒါနဲ့ပက်သက်ပြီး သူရဲ့သမီးဖြစ်သူကတော့ ” အဖေ ဦးမြအေး လွတ်ပြီလို့ သတင်းကြားပါတယ်။ အခုထိတော့ အိမ်မရောက်သေးပါဘူး။ လုပ်ငန်းစဥ်တွေများလို့ ညနေလောက်မှ ထွက်လာလို့ရမယ်လို့လဲပြောကြပါတယ်” လို့သူရဲ့လူမှုကွန်ရက်မှာရေးသားထားပါတယ်။
လူကိုယ်တိုင်အိမ်ပြန်ရောက်ပြီး မိသားစုနဲ့ပြန်တွေ့ရမှ သက်ပြင်းချနိုင်မှာမို့ ပြန်ပြီးအတည်ပြုပေးမယ့်အကြောင်းနဲ့ ဆုတောင်းပေးတဲ့သူတွေအားလုံးကို ကျေးဇူးတင်ကြောင်းလည်းရေးသားထားပါတယ်။
ကိုမြအေးကို စစ်အာဏာသိမ်းတဲ့ရက် ၂၀၂၁ခုနှစ်၊ ဖေဖော်ဝါရီလ ၁ ရက်နေ့က သူရဲ့နေအိမ်မှာပဲ ဖမ်းဆီးသွားတာဖြစ်ပါတယ်။
ဖမ်းဆီးခဲ့ပြီးနောက် ပုဒ်မ ၅၀၅ (ဂ) နဲ့ တရားစွဲဆိုခဲ့ပြီး ဒီနှစ် မတ်လမှာ အင်းစိန်ထောင်တွင်း တရားရုံးက ထောင်ဒဏ် ၂ နှစ်ချမှတ်ခဲ့တာဖြစ်ပါတယ်။
စစ်ကောင်စီကတော့ ဒီနေ့မှာ တနိုင်ငံလုံးက အကျဥ်းထောင်တွေမှာ အကျဥ်းကျခံနေရတဲ့ အကျဥ်းသား ၅၀၉၈ဦးနဲ့ အကျဥ်းသူ ၆၇၆ဦး စုစုပေါင်း ၅၇၇၄ ဦးတို့ကို လွတ်ငြိမ်းခွင့်ပေးပေးမယ်လို့ ကြေညာထားပါတယ်။
