ရန်ကုန်၊ နိုဝင်ဘာ ၂၁
မွန်ပြည်နယ်၊ ကျိုက်မရောမြို့နယ်ရှိ တောင်ကလေးရဲစခန်းကို KNLA နှင့် PDF ပူးပေါင်းတပ်များက ယနေ့ နံနက်ပိုင်းတွင် ဝင်ရောက်တိုက်ခိုက်သိမ်းပိုက်ပြီး စစ် တပ်နှင့်ရဲဘက်မှ ၁၀ ဦးသေဆုံးကြောင်း၊ လက်နက်ခဲယမ်း အမြောက် အမြား သိမ်းဆည်းရမိကြောင်းPDF သတင်းရင်းမြစ်များက ရန်ကုန် ခေတ်သစ် သတင်းဌာနထံသို့ ပြောဆိုကြသည်။
နိုဝင်ဘာလ ၂၁ ရက်နေ့ နံနက် ၅ နာရီခွဲအချိန် KNLA နှင့် PDF တပ်များက တောင်ကလေးရဲစခန်းကို ဝင်ရောက်တိုက်ခိုက် သိမ်းပိုက်ခဲ့ကြောင်း၊ ယင်း နောက် နံနက် ၆ နာရီခွဲမှစတင်၍ စစ်ကောင်စီတပ်များက ရဟတ်ယာဉ် ၃ စီးဖြင့် ပစ်ခတ်ပြီး ချောင်းနှစ်ခွ နယ်မြေရဲစခန်းဘက်မှ လက်နက်ကြီးများဖြင့် ဆက်တိုက် ပစ်ခတ်ခဲ့ကြောင်း၊ စစ်တပ်နှင့်ရဲဘက်မှ ၁၀ ဦးသေဆုံးပြီး လက်နက် ခဲယမ်းများ သိမ်းဆည်းရမိကြောင်း သိရှိရသည်။
စစ်တပ်နှင့်ရဲဘက်မှ သေဆုံးသူများတွင် ရဲဒုတပ်ကြပ် ကိုကိုလတ်၊ ရဲဒုတပ် ကြပ် ဇွဲပြည့်အောင်၊ ရဲတပ်ကြပ်ကြီး ကျော်မျိုး အပါအဝင် ၁၀ ဦးသေဆုံးခြင်း ဖြစ်ကြောင်း သိရှိရသည်။
“ဒီမနက် ၅ ခွဲမှာ တောင်ကလေးရဲကင်းစခန်းကို ပူးပေါင်းတပ်တွေ ဝင်သိမ်း တယ်။ မနက် ၆ ခွဲလောက်ကစပြီး ရဟတ်ယာဉ်တွေနဲ့လာပစ်။ ချောင်း နှစ်ခွ ရွာကနေ စစ်ခွေးတွေက လက်နက်ကြီးနဲ့ကူပစ်နေတယ်။ ရွာချင်း ကပ် လျက် ကြံတောရွာမှာလည်း ပစ်ခတ်မှုများရှိနေပါတယ်။ တိုက်ပွဲ ပြင်းထန် ကြာမြင့် နေပြီးတော့ ဂျက်တိုက်လေယာဉ်နှင့် ဗုံး ၂ လုံးကျဲချသွားပါတယ်။ ရွာ သား တွေ အကုန် ထွက်ပြေးနေရပြီး တောထဲမှာ ပုန်းနေရတယ်” ဟု ရန်ကုန် ခေတ် သစ်၏ သတင်းရင်းမြစ်က ပြောသည်။
လက်ရှိ သတင်းရေးသားဖော်ပြနေချိန်အထိ အကြမ်းဖက်စစ်ကောင်စီတပ်က လက်နက်ကြီးများဖြင့် တောင်ကလေးရဲစခန်း ပတ်ဝန်းကျင် နေရာပေါင်းစုံကို ရမ်းသမ်းပစ်ခတ်လျက်ရှိနေကြောင်း ဒေသခံများထံမှ သိရှိရသည်။
