ကျောက်မဲတွင် TNLA စခန်းကို ထိုးစစ်ဆင်လာသော စစ်တပ်နှင့် တိုက်ပွဲဖြစ်ပြီး စစ်ကောင်စီဘက်မှ ၁၅ ဦးသေဆုံးကာ လက်နက်နှင့် ခဲယမ်းများ သိမ်း ဆည်းရမိ
ရန်ကုန်၊ ဖေဖော်ဝါရီ ၂၀
ရှမ်းပြည်နယ်၊ ကျောက်မဲမြို့နယ်တွင် TNLA စခန်းကို ထိုးစစ်ဆင်လာသော စစ်တပ်နှင့် တိုက်ပွဲဖြစ်ပြီး စစ်ကောင်စီဘက်မှ ၁၅ ဦးသေဆုံးကာ လက်နက်ခဲယမ်း များ သိမ်းဆည်းရမိကြောင်း TNLA က သတင်းထုတ်ပြန်သည်။
ဖေဖော်ဝါရီလ ၂၀ရက်နေ့ နံနက် ၇ နာရီ ၃၀မိနစ်အချိန် စစ်တပ်နှင့် တအာင်းအမျိုးသားလွတ်မြောက်ရေးတပ်မတော် TNLA တို့ တိုက်ပွဲဖြစ်ပွားခဲ့ကြောင်း၊ စစ်ကောင်စီ၏ လားရှိုးအခြေစိုက် စကခ ၁၆ ၊ ခလရ ၆၈ မှ အင်အား ၆၀ ဦးဖြင့် နန်ခုံကျေးရွာနှင့် လမ်းဆုံကျေးရွာအနီးရှိ TNLA စခန်းကုန်းသို့ ထိုးစစ်ဆင်းတိုက်ခိုက်သောကြောင့် TNLA ဘက်က ပြန်လည်ပစ်ခတ်ရာမှ တိုက်ပွဲဖြစ်ပွားခဲ့ကြောင်း သိရှိရသည်။
တိုက်ပွဲဖြစ်ပွားနေစဉ် ယနေ့ နံနက် ၈ နာရီ ဝန်းကျင်အချိန် စစ်ကောင်စီတပ်က တိုက်လေယာဉ်တစ်စီး နှင့် ဟတ်စကီး တစ်စီးဖြင့် လာရောက်ပစ်ခတ်ခဲ့ပြီး လက်နက်ကြီးဖြင့်ပါ ဆက်တိုက်ပစ်ကူတိုက်ခိုက်ခဲ့ကြောင်း၊ တိုက်ပွဲသည် နံနက် ၇ နာရီ ၃၀ မိနစ် မှ ၉ နာရီ ၄၅ မိနစ် အထိ နှစ်ဖက်တိုက်ပွဲပြင်းထန်ခဲ့ပြီး နံနက် ၁၀ နာရီ အချိန်တွင် ပြီးဆုံးသွားခဲ့ကြောင်း သိရှိရသည်။
တိုက်ပွဲအတွင်း စစ်ကောင်စီတပ်ထံမှ သေနတ် ၂ လက်၊ စက်သေနတ် ၁ လက်၊ RPG ၁ လက်၊ လက်ပစ် ဗုံးနှင့် စစ်အသုံးအဆောင်ပစ္စည်းများ သိမ်း ဆည်းရမိခဲ့ပြီး ၂ နာရီကျော်ကြာ ပြင်းထန်ခဲ့သည့် တိုက်ပွဲအတွင်း စစ်ကောင်စီဘက်မှ ၁၅ ဦး သေဆုံးပြီး ၅ ဦးဒဏ်ရာရရှိခဲ့ကြောင်း သိရှိရသည်။
