ရေတာရှည်မြို့နယ်တွင် စစ်တပ် သတင်းပေးဟု သတ်မှတ်ခံရသူ ၁ ဦး ပစ်ခတ်ခံရပြီး သေဆုံး
ရန်ကုန်၊ ဖေဖော်ဝါရီ ၂၆
ပဲခူးတိုင်း၊ ရေတာရှည်မြို့နယ်တွင် စစ်တပ် သတင်းပေးဟု သတ်မှတ်ခံရသူ ၁ ဦး ပစ်ခတ်ခံရပြီး သေဆုံးခဲ့ကြောင်း ရေတာရှည်မြို့နယ် ပကဖ အဖွဲ့မှ တာဝန်ရှိသူ တစ်ဦးက ရန်ကုန်ခေတ်သစ် မီဒီယာသို့ ပြောဆိုသည်။
ဖေဖော်ဝါရီလ ၂၅ ရက်နေ့ နံနက် ၁၁ နာရီ ၃၀ မိနစ်တွင် ရေတာရှည်မြို့နယ် နားဂျပ်ကျေးရွာတွင် နေထိုင်သည့် စစ်တပ် သတင်းပေးဟု သတ်မှတ်ခံရသူ နေစိုးကို နန်းထိုက်အောင် စစ်ဆင်ရေးအဖြစ် ရေတာရှည်မြို့နယ် ပကဖအဖွဲ့က ပစ်ခတ်တိုက်ခိုက်ခဲ့ပြီး ပွဲချင်းပြီး သေဆုံးခဲ့ကြောင်း သိရသည်။
” ရှင်းသည့် နေရာ ရေတာရှည်မြို့နယ် ဒိုးတန်းကျေးရွာ စစ်တောင်းမြစ်ကူး တံတားအနီးမှာပါ။ ရေတာရှည် မြို့နယ် ပကဖ အဖွဲ့က နန်းထိုက်အောင် စစ်ဆင်ရေးအဖြစ် ရှင်းလင်းခဲ့တာပါ။ ရှင်းရတဲ့ အကြောင်းရင်းက စစ်တပ် နဲ့ဆက်သွယ်ပြီး ဒလန်မလုပ်ဖို့ အကြိမ်ကြိမ် သတိပေးတားမြစ်နေပေမယ့် နောက်မဆုတ်ဘဲ ဆက်လုပ်နေသည့်အတွက် ရှင်းလင်းခဲ့ရတာပါ” ဟု ရေတာရှည်မြို့နယ် ပကဖ အဖွဲ့မှ တာဝန်ရှိသူ တစ်ဦးကပြောဆိုသည်။
