ရန်ကုန်တိုင်း၊ ထန်းတပင်မြို့နယ်ရှိ စစ်တပ်ပိုင် Mytel တာဝါတိုင်ကို မိုင်းခွဲ ရှင်းလင်း
ရန်ကုန်၊ မတ် ၂၈
ရန်ကုန်တိုင်း၊ ထန်းတပင်မြို့နယ်ရှိ စစ်တပ်ပိုင် Mytel တာဝါတိုင်ကို ယမန်နေ့ ညပိုင်းတွင် မိုင်းခွဲ ရှင်းလင်းမှုဖြစ်ပွားကြောင်း ဒေသပြည်သူများက ရန်ကုန်ခေတ်သစ်သတင်းဌာနထံသို့ ပြောဆိုကြသည်။
မတ်လ ၂၇ ရက်နေ့ ည ၁၂ နာရီဝန်းကျင်အချိန် ထန်းတပင်မြို့နယ်၊ ဆတ်ကလေးကျေးရွာရှိ စစ်တပ်ပိုင် Mytel တာဝါတိုင်ကို ပစ်မှတ်ထား ဖောက်ခွဲ မှု ဖြစ်ပွားခြင်းဖြစ်ပြီး Mytel တာဝါတိုင်၏ အောက်ခြေ ပျက်စီးသွားကြောင်း သိရှိရသည်။
“ဆတ်ကလေးကျေးရွာမိုင်တဲတာဝါတိုင်၂၇ရက်ည ၁၂နာရီဝန်းကျင်မှာပေါက်ကွဲပါတယ်။ တိုင်ရဲ့ အောက်ခြေပျက်စီးသွားပါတယ်။ အဲဒီမှာ မိုင်း၂လုံးကျန်နေလို့ စစ်ခွေးတွေက ဖြုတ်သွားပါတယ်။ ဆက်ကလေးကျေးရွာထဲရှိ မိုင်တဲ့တာဝါတိုင်မှာ မပေါက်ကွဲသေးသောလက်ကျန်ဗုံးအားဖြုတ်သိမ်းဖို့စစ်ခွေးနှင့်ရဲများ ဖြုတ်ပြီး ဖောက်ခွဲတယ်။ ဗုံးပေါက်ကွဲတဲ့ အသံမှာအလွန်ပြင်းထန်ပြီး ရွာနီးချောက်စပ်ရွာတွေသာမက ထန်းတပင်မြို့ပေါ်မှာအတိုင်းသားကြားရပါတယ်။ လူထိခိုက်မှုတော့မရှိပေမယ့် မိုင်တဲတာဝါတိုင်ရဲ့စက်ပိုင်းဆိုင်ရာတွေ ပျက်စီးကုန်ပါတယ်” ဟု ဒေသပြည်သူတစ်ဦးက ပြောသည်။
မတ်လ ၂၇ ရက်နေ့ နံနက်ပိုင်း မှော်ဘီမြို့နယ်ရှိ စစ်တပ်တပ်ရင်းများထံသို့ သွယ်တန်းထားသော လျှပ်စစ်ဓာတ်အားပေးလိုင်း၊ မင်္ဂလာဒုံမြို့နယ်ရှိ မိုင်တဲတာဝါတိုင်များကို ဖောက်ခွဲရှင်းလင်းမှုများ ဖြစ်ပွားခဲ့ကြောင်း သိရှိရသည်။
