လောင်းလုံးမြို့နယ်၊ပညစ်ရွာကို စစ်တပ်က မီးရှို့ဖျက်ဆီးပြီး ပြည်သူ ၂ ဦးကို ဖမ်းဆီး
ရန်ကုန်| မတ် ၁၁
တနင်္သာရီတိုင်း ထားဝယ်ခရိုင် လောင်းလုံးမြို့နယ်၊ ပညစ်ရွာကို မတ်လ ၁၀ ရက်နေ့ နံနက် ၈ နာရီ ဝန်းကျင် အချိန်တွင် စစ်ကောင်စီတပ်နှင့် ပျူစောထီးအဖွဲ့ပါ အင်အား ၅၀ နီးပါးစစ်ကြောင်းထိုး ဝင်ရောက်လာပြီး ကျေးရွာအတွင်းရှိ နေအိမ် အချို့ကို မီးရှို့သွားကြောင်း ဒေသခံများက ပြောသည်။
စစ်ကောင်စီတပ်နှင့် ပျူစောထီး အဖွဲ့တို့သည် ပညစ်ရွာထဲတွင်နေအိမ် ၆လုံးကို မီးရှို့ဖျက်ဆီးခဲ့ကာ တန်ဖိုးကြီး ပစ္စည်းများကိုလည်း ခိုးယူသွားကြောင်း၊ ရော်ဘာခြံထဲရှိ အလုပ်လုပ်နေသည့် ဒေသခံ ၃ဦး ဖမ်းဆီးကာ အမျိုးသမီး တစ်ဦးကိုမူ ပြန်လည် လွတ်ပေးခဲ့ကြောင်း ဒေသခံများက ပြောသည်။
ပညစ်ရွာနေ ဒေသခံတစ်ဦးက”စစ်တပ်က စစ်ကြောင်းထိုး ဝင်လာချိန်မှာ သူပုန်းတွေ ဝင်လာသလိုမျိုး သေနတ်တွေ ပစ်ဖောက်ပြီး ဝင်လာတာပါ အဲ့ချိန်မှာ ရွာဖက်မှာရှိတဲ့ PDF တွေနဲ့ အပြန် အလှန် တိုက်ပွဲ ဖြစ်ပွားခဲ့သေးတယ်”ဟု ပြောသည်။
ထိုပြင် ယင်းကဲ့သို့ စစ်ကောင်စီက နေအိမ်အချို့ကို မီးရှို့ဖျက်ဆီးခဲ့သည့် အပြင် နေအိမ် ၁၀၀ နီးပါးကို ဖောက်ထွင်းပြီး တန်ဖိုးရှိ ပစ္စည်းများကို ခိုးယူသွားကြောင်း ဒေသခံများ၏ ပြောဆိုချက် အရ သိရသည်။
“စစ်တပ်က ဝင်လာတဲ့ အချိန်ကစလို့ ရွာခံတွေ အိမ် အကုန်ပိတ်ပြီး ထွက်ပြေးသွားတာပါ၊ ရွာထဲကို သေနတ်နဲ့ ပစ်ခတ်တော့ ဘယ်သူမှ မနေရဲဘူး”ဟု ပညစ်ရွာခံ နောက်တစ်ဦးက ပြောသည်။
ရွာသားအများစု ရွာလုံးကျွတ်ထွက်ပြေးချိန်တွင် စစ်ကောင်စီက အခွင့်ကောင်းယူပြီး ယင်းကဲ့သို့ ပြုလုပ်ခဲ့ကြောင်း ဒေသခံများက ပြောသည်။
စစ်ကောင်စီက မီးရှို့ဖျက်ဆီးခဲ့သည့် ပညစ်ရွာတွင် အိမ်ခြေ စုစုပေါင်း ၁၂၀ ဝန်းကျင်ရှိပြီး ယခင် အဆိုပါ ရွာမှာ ပင်လယ်ရွာတစ်ခုလည်း ဖြစ်ကာ ခရီးသွားများ အလည်အပတ်သွားနေသည့် ထင်ရှားသော ကမ်းခြေတစ်ခု ဖြစ်သည်။
လက်ရှိ စစ်ကောင်စီက လမ်းပြအဖြစ် ဖမ်းဆီးခေါ်ဆောင်သွားသည့် အသက်ကြီးပိုင်း ပညစ်ရွာခံ အမျိုးသား နှစ်ဦး အခုချိန် အထိ ပြန်လည် လွတ်မြောက်လာခြင်း မရှိသေးကြောင်း ဒေသခံများထံမှ သိရသည်။
ပုံစာ-ပညစ်ရွာကျေးရွာရှိ နေအိမ်များ စစ်ကောင်စီ လက်ချက်ကြောင့် မီးလောင်ပျက်စီးခဲ့ပုံ။
