ပေါက်မြို့နယ်မှ ကံမမြို့ဘက်သို့ ထွက်လာသော စစ်ကြောင်းကို မိုင်းဆွဲတိုက်ခိုက်မှု စစ်ဗိုလ် တစ်ဦးနှင့်တပ်ကြပ် တစ်ဦး သေဆုံး
ရန်ကုန်၊ ဧပြီ ၁၁
မကွေးတိုင်း၊ ပေါက်မြို့နယ်၊ ပျဉ်းချောင်းရွာမှ ကံမမြို့ဘက်သို့ ထွက်လာသော အကြမ်းဖက်စစ်ကြောင်းကို မိုင်းဆွဲတိုက် ခိုက်ခဲ့ရာ စစ်ဗိုလ်တစ်ဦးနှင့်တပ်ကြပ်တစ်ဦးသေဆုံးခဲ့ကြောင်း ပြည်သူ့အားမန်ကာကွယ်ရေးတပ်ဖွဲ့မှ တာဝန်ရှိသူတစ်ဦးက ရန်ကုန်ခေတ်သတင်းဌာနထံသို့ပြောကြားသည်။
ဧပြီလ ၈ ရက် နံနက် ၈ နာရီခန့်က အင်အား ၅၀ ခန့်ဖြင့် ပျဉ်းချောင်းကျေးရွာအတွင်းမှ ပခုက္ကူမြို့နယ်၊ ကံမမြို့ဘက်သို့ ထွက်လာသော အကြမ်းဖက်စစ်သားများကို လမ်းပိုင်းတနေရာတွင် မိုင်းဆင်ပြီး ဖောက်ခွဲတိုက်ခိုက်ခဲ့ရာ အကြမ်းဖက်စစ်ဗိုလ်မှာ နေရာမှာပင် ပွဲချင်းပြီးသေဆုံးပြီးတပ်ကြပ်တစ်ဦးမှာ လည် ပင်းထိမှန် ဒဏ်ရာဖြင့် ပခုက္ကူဆေးရုံ၌ ယနေ့ ဧပြီလ ၁၁ ရက်နေ့တွင် သေဆုံးခဲ့ခြင်းဖြစ်ကြောင်း သိရသည်။
“ဒီညနေမှ အတိအကျထပ်သိရတာ၊ နှစ်ပွင့်ဗိုလ်က နေရာမှာပဲသေတယ်၊ တပ်ကြပ်တစ်ဦးက လည်ပင်း ပြတ်ရှဒဏ်ရာနဲ့ ဒီနေ့ပခုက္ကူဆေးရုံမှာသေတယ်၊ ပျူ ၆ ဦးဒဏ်ရာရတယ်၊ မိုင်းက တပွိုင့်သာ ဆွဲနိုင်ခဲ့တာ၊ အဲဒီနေ့က ထိခိုက်ဒဏ်ရာရလို့ ကုသထားတဲ့ ဆေးထိုးအပ်၊ သွေးသုတ်ထားတဲ့ အဝတ်စ၊ဂွမ်းနဲ့ သွေး ကွက်တွေကို ဖုံးထားတဲ့နေရာ၊ အသုံးအဆောင်ပစ္စည်းအချို့ကို တွေ့ရှိခဲ့ပါတယ်” ဟု ပြည်သူ့အားမန် ကာကွယ်ရေးတပ်ဖွဲ့မှ တာဝန်ရှိသူတစ်ဦးက ရန်ကုန်ခေတ်သတင်းဌာန ထံသို့ပြောကြားသည်။
အဆိုပါတိုက်ခိုက်မှုကို ပြည်သူ့အားမန်ကာကွယ်ရေးတပ်ဖွဲ့၊ MUGDF ၊ TYK ၊ အနောက်လွင်ပြင်ပြည်သူ့ကာကွယ်ရေးတပ်ဖွဲ့၊ ဇာမဏီတပ်ဖွဲ့၊ တော်ဝင်ကျားတပ်ဖွဲ့၊ RDF ၊ RGF ၊ကိုမီးခဲအဖွဲ့၊ နွေဦးညီနောင်အဖွဲ့၊ Cylione ပြောက်ကျားတပ်ဖွဲ့၊ တပ်ရင်း ၄ ၊ RGF (မြေလတ်) ၊ နေပြည်တော်တပ်ရင်း ၇၀၃ နှင့် ပေါက်မြို့နယ် ပကဖ အဖွဲ့များပူးပေါင်းကာတိုက်ခိုက်ခဲ့ခြင်းဖြစ်ကြောင်း သိရသည်။
