လွိုင်ကော်တွင် စစ်ကောင်စီ ဗဟို သင်္ကြန်မဏ္ဍပ်ကို ဒရုန်းဖြင့် ဗုံးကျဲတိုက်ခိုက်မှု ကယားစစ်ကောင်စီမှ အရာရှိများ အပါအဝင် ၂၄ ဦး ဝန်းကျင် ဒဏ်ရာရ
ရန်ကုန်၊ ဧပြီ ၁၅
ကယားပြည်နယ်၊ လွိုင်ကော်မြို့ရှိ အကြမ်းဖက်စစ်တပ်လက်အောက်ခံ ပြည်နယ်အစိုးရအဖွဲ့ရုံးက ကျင်းပပြုလုပ်သော သင်္ကြန်မဏ္ဍပ်ကို ဒရုန်းဖြင့် ဗုံးကျဲတိုက်ခိုက်ခဲ့ရာ အကြမ်းဖက်စစ်တပ်ခန့် အစိုးရ အဖွဲ့အရာရှိများအပါအဝင် ၂၄ ဦးခန့်ထိခိုက်ဒဏ်ရာရရှိခဲ့ကြောင်း ကရင်နီစစ်ဖက်ဆိုင်ရာ ဗဟိုသတင်း ထုတ်ပြန်ရေးအဖွဲ့မှ တာဝန်ရှိသူတစ်ဦးက ရန်ကုန်ခေတ်သစ်သတင်းဌာနထံသို့ ပြောကြားသည်။
ယနေ့ ဧပြီလ ၁၅ ရက် နံနက်ပိုင်းက လွိုင်ကော်မြို့ရှိ ကယားပြည်နယ်အစိုးရရုံး သင်္ကြန်မဏ္ဍပ်ကို ပြည်သူ့ကာကွယ်ရေးပူးပေါင်းတပ်ဖွဲ့က ဒရုန်းဖြင့် ဗုံးကျဲ တိုက်ခိုက်ခဲ့ခြင်းဖြစ်ပြီး သေဆုံးမှုရှိနိုင်သော် လည်း အတိအကျ မသိရ သေးကြောင်း၊ ဒရုန်းဖြင့် ဗုံးကျဲတိုက်ခိုက်သည်မှာ မှန်ကန်ကြောင်း ကရင်နီ စစ်ဖက်ဆိုင်ရာ ဗဟိုသတင်း ထုတ်ပြန်ရေးအဖွဲ့မှ တာဝန်ရှိသူတစ်ဦးက အတည်ပြုပြောကြားသည်။
“ဒရုန်းနဲ့ချတယ်ဆိုတာ မှန်တယ်၊ မနက်ပိုင်းက၊ ရာထူးကြီးကြီး တွေထိတယ် ၊ ဘယ်သူတွေထိတယ်ဆိုတာ မသိရသေးတာ၊ အားလုံး ၂၄ ယောက် ထိတယ်၊ ထိခိုက်သေဆုံးမှု အတိအကျ သိရဖို့ စုံစမ်းနေတုန်းပဲ၊ ဒရုန်းဆိုတော့ ပူးပေါင်း အဖွဲ့ပါပဲ၊ “ ဟု ၎င်းက ဆက်လက်ပြောကြားသည်။
