ထန်းတပင်မြို့နယ်ရှိ ကျေးရွာ ၃ ရွာကို စစ်တပ်က တိုက်လေယာဥ်ဖြင့် ဗုံးကျဲ တိုက်ခိုက်မှု ပြည်သူ ၃ ဦးသေဆုံးပြီး ၃ ဦးဒဏ်ရာ ပြင်းထန်
ရန်ကုန်၊ မေ ၃
ပဲခူးတိုင်း၊ ထန်းတပင်မြို့နယ်ရှိ ကျေးရွာ ၃ ရွာကို အကြမ်းဖက် စစ်တပ်က တိုက်လေယာဥ်ဖြင့် ဗုံးကျဲ တိုက်ခိုက် ခဲ့သောကြောင့် ပြည်သူ ၃ ဦးသေဆုံးခဲ့ကြောင်း ဒေသပြည်သူများက ရန်ကုန်ခေတ်သစ် မီဒီယာသို့ ပြောဆိုသည်။
မေလ ၂ ရက်နေ့ ည ၆ နာရီခန့်တွင် အကြမ်းဖက် စစ်တပ်က ထန်းတပင်မြို့နယ်ရှိ ဘုမ္မတီးကျေးရွာ၊ သရက်တန်းကျေးရွာနှင့် ကျွဲလမ်းကျေးရွာတို့ကို တိုက်လေယာဥ် ဖြင့် ဗုံးကျဲ တိုက်ခိုက်ခဲ့သောကြောင့် ကျွဲလမ်းကျေးရွာနှင့် သရက်တန်းကျေးရွာမှ ပြည်သူ ၃ ဦး သေဆုံးကာ ၃ ဦး ထိခိုက်ဒဏ်ရာရရှိခဲ့ကြောင်း သိရသည်။
အကြမ်းဖက် စစ်တပ် လေကြောင်းမှ ဗုံးကျဲတိုက်ခိုက်ခြင်းကြောင့် တိုကျွဲလမ်းကျေးရွာနှင့် သရက်တန်းကျေးရွာမှ အသက် ၃၀ အရွယ် ကိုရဲစိုးအောင်၊ အသက် ၂၂ နှစ်အရွယ် မစုလှိုင်အေးနှင့် အသက် ၃၀ နှစ်အရွယ် မလဲ့လဲ့ခိုင် တို့သေဆုံးခဲ့ကြောင်း၊ ထို့ပြင် အသက် ၂၂ နှစ်အရွယ် မောင်ထွန်းဝင်း၊ အသက် ၅၅ နှစ်အရွယ် ဦးညွှန့်မောင်နှင့် အသက် ၁၂ နှစ်အရွယ် မပိုးအိသိမ့်တို့ ထိခိုက်ဒဏ်ရာရရှိခဲ့ကြောင်း တောင်ငူခရိုင် ထန်းတပင်မြို့နယ် ပြည်သူ့ကာကွယ်ရေး တပ်ဖွဲ့က ပြောသည်။
“ရွာသားတွေက အခုထိ ရှောင်နေရတယ်။ တော်တော်များများ ရွာထဲ ပြန်မဝင်တော့ ဘူး။ ထွက်ပြေးတိမ်းရှောင်နေကြတယ်။ မိန်းကလေး ၁ ဦးက လေယာဥ်နဲ့ ဗုံးကျဲတာ ခေါင်းပါ ပြတ်သွားတယ်။ နောက်ဆုံးကြားရတဲ့ သတင်းအရ အမျိုး သမီး ၂ ဦးနဲ့ အမျိုးသား ၁ ဦးသေဆုံးတယ်။ ကျေးရွာ ၃ ရွာလုံးက နေအိမ်တွေ မီးလောင်ပျက်စီးတာရှိတယ်။ စစ်ခွေးတွေက လက်နက်ကြီးနဲ့ပါ ရွာထဲကို ပစ်ထည့်တာ” ဟု ပြည်သူ တစ်ဦးက ပြောဆိုသည်။
ယခုနောက်ဆုံး သိရှိရသော သတင်းအချက်အလက်များအရ စစ်တပ်က ၎င်းနယ်မြေစိုးမိုးမှုမရှိသော ဒေသများကို လေယာဉ်ဖြင့်ပစ်ခတ်ခြင်း၊ လက်နက်ကြီးဖြင့် ဗုံးကျဲမှုများကို အရှိန်အဟုန်မြှင့် တိုးမြှင့်လုပ်ဆောင်လာကြောင်း ဒေသပြည်သူများက ဆိုကြသည်။
