မြင်းခြံမြို့နယ်တွင် စစ်တပ် ယာဥ်တန်းကို မိုင်းဆွဲ တိုက်ခိုက်၊ ဟင်္သာတမြို့ ပေါ်တွင် ပေါက်ကွဲမှု ဖြစ်ပွား
ရန်ကုန်၊ မေ ၁၈
မန္တလေးတိုင်း၊ မြင်းခြံမြို့နယ်တွင် အကြမ်းဖက် စစ်တပ် ယာဥ်တန်းကို မိုင်းဆွဲ တိုက်ခိုက်ခဲ့ကြောင်း Natogyi Regional Defence Force အဖွဲ့မှ တာဝန်ရှိသူ တစ်ဦးက ရန်ကုန်ခေတ်သစ် မီဒီယာသို့ ပြောဆိုသည်။
မေလ ၁၈ ရက်နေ့ နံနက် အစောပိုင်းတွင် မြင်းခြံမြို့မှ ကုက္ကဲ ရဲစခန်းသို့ တပ်ကူသွားသော စစ်ကား ၅ စီးသည် ကုက္ကဲ ရဲစခန်းမှ အပြန် လမ်းပိုင်း တစ်နေရာ၌ တော်လှန်ရေး တပ်ဖွဲ့များက မိုင်းဆွဲ တိုက်ခိုက်ခဲ့ပြီး စစ်ကား ၁ စီး ပျက်စီးကာ စစ်သားများ ထိခိုက်သေဆုံးမှု အခြေအနေ အတည်မပြုနိုင်သေးကြောင်း သိရသည်။
အဆိုပါ တိုက်ခိုက်မှုကို ဗိုလ်စက္ကခ အဖွဲ့၊ M 35 အဖွဲ့နှင့် မြင်းခြံခရိုင်း တပ်ရင်း ၈ Natogyi Regional Defence Force တို့ က ပူးပေါင်းလုပ်ဆောင်ခဲ့ကြောင်း သိရသည်။
ထို့ပြင် ဧရာဝတီတိုင်း၊ ဟင်္သာတမြို့ပေါ်တွင် ယနေ့ ညနေ ၅ နာရီခန့်၌ ဟင်္သာတမြို့ ဘူတာရုံအနီး ဗုံးပေါက်ကွဲမှု ဖြစ်ပွားခဲ့ကြောင်း ဒေသပြည်သူများက ရန်ကုန်ခေတ်သစ် မီဒီယာသို့ ပြောဆိုသည်။
“ဟင်္သာတမြို့ ပို့ဆောင်ရေးနဲ့ ဆက်သွယ်ရေး ဝန်ကြီးဌာန DME အိမ်ရှေ့ ဟင်္သာတမြို့ ဘူတာရုံ အနီးမှာ ပေါက်ကွဲမှုဖြစ်တာ လူ အထိအခိုက်မရှိဘူး။ စစ်ခွေးတွေကတော့ ထုံးစံအတိုင်း လမ်းတွေ ပိတ်ထားတယ်” ဟု ဒေသပြည်သူ တစ်ဦးက ပြောဆိုသည်။
