ရန်ကုန်နှင့် မန္တလေးတွင် ရွှေကုန်သည်နှင့်ရွှေဆိုင်ပိုင်ရှင် ၂၀ ဦးကို စစ်တပ်က ဖမ်းဆီးသော်လည်း ရွှေစျေးနှင့်ဒေါ်လာစျေး မကျ၊
■ အခေါက်ရွှေတစ်ကျပ်သား ၃၁ သိန်းခွဲနီးပါးစျေးတက်လာပြီး အမေရိကန်တစ်ဒေါ်လာ ၃၁၀၀ နီးပါးဖြစ်လာ
ရန်ကုန်၊ ဇွန် ၁၅
ရန်ကုန်နှင့် မန္တလေးတွင် ရွှေကုန်သည်နှင့်ရွှေဆိုင်ပိုင်ရှင် ၂၀ ဦးကို စစ်တပ်က ဖမ်းဆီးသော်လည်း ရွှေစျေးနှင့်ဒေါ်လာစျေး မကျဘဲ ဆက်လက်မြင့်တက်လျက်ရှိကြောင်း သိရှိရသည်။
ပြည်တွင်းစီးပွားရေးစျေးကွက်တွင် ဒေါ်လာပြတ်လပ်လာသဖြင့် အမေရိကန်ဒေါ်လာတန်ဖိုး တရိပ်ရိပ်မြင့်တက်လျက်ရှိရာ အမေရိကန်တစ်ဒေါ်လာ ၂၉၀၀ ဝန်းကျင်မှ ၃၀၀၀ ကျော်အထိ မြင့်တက်လာကြောင်း၊ ရွှေစျေးကွက်တွင်လည်း အမေရိကန်ဒေါ်လာတန်ဖိုး တက်သဖြင့် ရွှေစျေးမှာလည်း လိုက်ပါမြင့်တက်လာကြောင်း၊ လက်ရှိတွင် အမေရိကန်တစ်ဒေါ်လာ ၃၁၀၀ ဝန်းကျင်နှင့် အခေါက်ရွှေတစ်ကျပ်သားလျှင် ၃၁ သိန်း ၄ သောင်း ကျပ်ဝန်းကျင် ရှိနေကြောင်း၊ ဒေါ်လာနှင့် ရွှေတန်ဖိုးတက်လာမှုကို ထိန်းသိမ်းရန် စစ်ကောင်စီက ရန်ကုန်နှင့် မန္တလေးတွင် ရွှေဆိုင်နှင့် ရွှေကုန်သည် ၂၀ ကို ဖမ်းဆီးစစ်ဆေးပြီး တရားစွဲဆိုရန် လုပ်ဆောင် နေကြောင်း သိရှိရသည်။
” မန္တလေးမှာ ရွှေဆိုင်နဲ့ ရွှေကုန်သည် ၅ ဦးလောက်အဖမ်းခံရတယ်။ ရန်ကုန်မှာတော့ ၁၅ ဦးလောက် ခေါ်စစ်တယ်။ ရန်ကုန်မှာတော့ ခေါ်စစ်ပြီး ပြန်လွတ်သူတချို့ရှိတယ်။ မန္တလေးကတော့ လွတ်၊ မလွတ် မသိဘူး” ဟု ရန်ကုန်တိုင်းရွှေလုပ်ငန်းရှင်အသင်းမှ အသင်းဝင် ရွှေကုန်သည်တစ်ဦးက ပြောဆိုသည်။
မန္တလေးရွှေကုန်သည်တချို့ကို ရွှေတရားမဝင် ရောင်းဝယ်ခြင်း၊ ဒေါ်လာ ရောင်းဝယ်လုပ်ခြင်း ဆိုသော စွပ်စွဲချက်များဖြင့် စစ်ကောင်စီက ငွေကြေးခါ၀ချမှု တိုက်ဖျက်ရေး ဥပဒေ၊ နိုင်ငံခြားသုံးငွေ စီမံခန့်ခွဲဥပဒေများဖြင့် တရားစွဲဆို အရေးယူရန် စစ်ဆေး နေကြောင်း သိရှိရသည်။
ဓာတ်ပုံ- စစ်ကောင်စီကြောင့် တန်ဖိုးထိုးကျနေသော မြန်မာကျပ်ငွေများ။
