မိုးဗြဲမြို့ကို ပြန်လာသည့် ပြည်သူ ၁ ဦးကို စစ်တပ်က ပစ်သတ်၊ စစ်ဘေးရှောင် စခန်းများကို စစ်တပ်က တိုက်လေယာဥ် လက်နက်ကြီးများဖြင့် ပစ်ခတ်မှု ပြည်သူ ၂ ဦး ဒဏ်ရာရ
ရန်ကုန်၊ ဇွန် ၁၅
ရှမ်းပြည်နယ်တောင်ပိုင်း၊ ဖယ်ခုံမြို့နယ်၊ မိုးဗြဲမြို့ကို ပြန်လာသည့် ပြည်သူ ၁ ဦး ကို အကြမ်းဖက် စစ်တပ်က ပစ်သတ်ခဲ့ကြောင်း မိုးဗြဲ PDF ထံမှ သိရသည်။
ယမန်နေ့ ဇွန်လ ၁၄ ရက် မွန်းပိုင်းတွင် မိုးဗြဲမြို့ရှိ နေအိမ်သို့ ပြန်လာသည့် လင်မယား ၂ ဦးကို အကြမ်းဖက် စစ်တပ်က ပစ်ခတ်သတ်ဖြတ်ခဲ့ပြီး အမျိုးသားဖြစ်သူ သေဆုံးကာ အမျိုးသမီးဖြစ်သူ ထွက်ပြေးလွတ်မြောက် ခဲ့ကြောင်း သိရှိရသည်။
ယင်းနေ့ ည ၉ နာရီခန့်ကလည်း အကြမ်းဖက် စစ်တပ်က မိုးဗြဲမြို့အနောက်ခြမ်းရှိ စစ်ဘေးရှောင်စခန်း ကို တာဝေးပစ်လက်နက်ကြီးဖြင့် ၁၅ လုံးထက်မနည်း ပစ်ခတ်တိုက်ခိုက်ခဲ့ရာ စစ်ဘေးရှောင် အမျိုးသား၂ ဦး ထိခိုက်ဒဏ်ရာ ရရှိခဲ့ကြောင်း ၊ ယနေ့ ဇွန်လ ၁၅ ရက် နံနက် ၁ နာရီခွဲခန့်ကလည်း မိုးဗြဲအနောက်ခြမ်း ရှိ စစ်ဘေးရှောင် စခန်းများရှိရာ နေရာကို လေယာဉ်ဖြင့် လာရောက်ဗုံးကျဲခဲ့ပြီး စစ်ဘေးရှောင်များ ခိုလှုံရာ တဲအချို့ ပျက်စီးခဲ့ကြောင်း သိရသည်။
အကြမ်းဖက်စစ်တပ်မှ စစ်ဘေးရှောင်ပြည်သူများရှိရာ စခန်းများကို ဦးတည်ပစ်ခတ်တိုက်ခိုက်လျက်ရှိ သည်မှာ အကြိမ်ပေါင်းမြောက်များစွာ ရှိခဲ့ပြီး မိုးဗြဲမြို့တွင် စစ်ရေးအခြေအနေ တင်းမာနေသောကြောင့် စစ်ဘေးရှောင် ပြည်သူများအနေဖြင့် နေရပ်ပြန်ခြင်း မပြုလုပ်ကြရန်နှင့် လုံခြုံရေးကို အထူးဂရု စိုက် နေထိုင်ပေးကြပါရန် အမှတ် (၁၀၀၁)၊ မိုးဗြဲပြည်သူ့ကာကွယ်ရေးတပ် (MBPDF)က သတိပေးထုတ်ပြန်ထားသည်။
