မြင်းမူမြို့နယ်ရှိ ဂုံညှင်းဆိပ်ရွာကို စစ်တပ်က မီးရှို့ဖျက်ဆီးမှု နေအိမ် ၁၈၀ ကျော် ပြာကျ၊ ယနေ့ နံနက်ပိုင်းတွင် စစ်တပ်က ငကင်းရွာကို မီးတင်ရှို့နေ
ရန်ကုန်၊ ဇူလိုင် ၉
စစ်ကိုင်းတိုင်း၊ မြင်းမူမြို့နယ်၊ ဂုံညှင်းဆိပ်ရွာကို အကြမ်းဖက် စစ်တပ်က မီးရှို့ဖျက်ဆီးခြင်းကြောင့် ပြည်သူပိုင် နေအိမ် ၁၈၀ ကျော် မီးလောင်ပြာကျခဲ့ကြောင်း ဒေသပြည်သူများက ရန်ကုန်ခေတ်သစ် မီဒီယာသို့ ပြောဆိုသည်။
ဇူလိုင်လ ၇ ရက်နေ့တွင် အကြမ်းဖက် စစ်တပ်က မြင်းမူမြို့နယ်၊ ဂုံညှင်းဆိပ်ရွာကို ဝင်ရောက် စီးနင်းခဲ့ပြီး ကျေးရွာ ဘုန်းကြီးကျောင်း၊ စာသင်ကျောင်းနှင့် ပြည်သူပိုင် နေအိမ်များကို မီးရှို့ဖျက်ဆီးခဲ့ခြင်းဖြစ်ပြီး နေအိမ် ၁၈၀ ကျော်ပြာကျခဲ့ကြောင်း သိရသည်။
“မြင်းမူမြို့နယ် ဂုံညှင်းဆိပ်ကျေးရွာကို ၇ ရက်နေ့က စစ်ခွေးတွေက မီးရှို့ဖျက်ဆီးသွားတယ်။ နေအိမ် ၁၈၀ ကျော် မီးလောင်ပြာကျသွားတယ်။ ရွာမှာက အိမ်ခြေ အရေတွက် ၆၀၀ ကျော်လောက်ရှိတယ်။ စစ်ခွေးတွေက ဘုန်းကြီးကျောင်း၊ စာသင်ကျောင်းပါမကျန် အကုန်ရှို့သွားတယ်” ဟု ဒေသပြည်သူ တစ်ဦးက ပြောဆိုသည်။
ထို့ပြင် ယနေ့ ဇူလိုင်လ ၉ ရက်နေ့ နံနက်ပိုင်းတွင် အကြမ်းဖက် စစ်တပ် စစ်ကြောင်းက ငကင်းရွာကို ဝင်ရောက်စီးနင်းနေပြီး ငကင်းမြောက်ရွာကို မီးရှို့ဖျက်ဆီးကာ လက်ရှိချိန်တွင် ငကင်းတောင်ရွာ၌ ရောက်ရှိနေကြောင်း ဒေသ ပြည်သူများက ဆက်လက်ပြောဆိုသည်။
