ပေါင်မြို့နယ်တွင် စစ်ကောင်စီ လက်အောက်ခံ လက်နက်ကိုင် ပျူစောထီးများက သေနတ် ၆ လက်နှင့် ကျည်များ အပ်နှံ

ပေါင်မြို့နယ်တွင် စစ်ကောင်စီ လက်အောက်ခံ လက်နက်ကိုင် ပျူစောထီးများက သေနတ် ၆ လက်နှင့် ကျည်များ အပ်နှံ

ရန်ကုန်၊ ဇူလိုင် ၁၀

မွန်ပြည်နယ်၊ ပေါင်မြို့နယ်တွင် စစ်ကောင်စီ လက်အောက်ခံ လက်နက်ကိုင်ပျူစောထီးများ၏ လက်နက်များသိမ်းဆည်းရမိကြောင်း KNLA နှင့် PDF ပူးပေါင်း တပင်ရွှေထီး စစ်ကြောင်းမှ တာဝန်ရှိသူတစ်ဦးက ရန်ကုန်ခေတ်သစ်သတင်းဌာနထံသို့ ပြောဆိုသည်။

ဇူလိုင်လ ၉ ရက်နေ့ ညနေ ၅ နာရီခန့်အချိန် မွန်ပြည်နယ်၊ သထုံခရိုင်၊ ပေါင်မြို့နယ်၊ ထန်းလေးရွာဗမာစုရှိ စစ်ကောင်စီ လက်အောက် ခံ ပျူစောထီးခေါင်း‌ဆောင်ထံတွင် လက်နက်များရှိနေကြောင်း သတင်းအရ သထုံခရိုင်၊ အမှတ် (၂) KNLA/PDF ပူးပေါင်းတပ်ရင်း၊ တပင်ရွှေထီးစစ်ကြောင်းမှ ရဲဘော်များက သွားရောက်စစ်ဆေးခဲ့ကြောင်း သိရှိရသည်။

ထိုသို့ သွားရောက်စစ်ဆေးရာတွင် ထန်းလေးရွာ၊ ဗမာစုနေ ပျူစောထီး ခေါင်းဆောင် ရွှေမြ၏ နေအိမ် ကို အလစ်အငိုက် ဝင်ရောက်စီးနင်းရာ ၎င်းနေအိမ်မှ ရိုင်ဖယ်သေနတ် ၃ လက်နှင့် BA52 စတင်းဂန်း ၁ လက်၊ကျည်အိမ် ၆ ခုနှင့်ကျည်ဆံများသိမ်းဆည်းရမိကြောင်း၊ ဆက်လက်ဖော်ထုတ်စစ်ဆေးရာမှာ နောက်ထပ် ပျူစောထီးအဖွဲ့ဝင် ၂ ဦး၏နေအိမ်မှ ရိုင်ဖယ် ၁ လက်စီ နှင့်ကျည်အိမ် ၂ ခုစုစုပေါင်း လက်နက် ၆ လက်ကျည်အိမ်(၈)ခုနှင့်ကျည်(၁၀၀) တောင့်ခန့်ကိုသိမ်းဆည်းရမိခဲ့ကြောင်း တပင်ရွှေထီးစစ်ကြောင်း တာဝန်ရှိသူက ပြောဆိုသည်။

ပျူစောထီးများမှပြန်လည်ခုခံခြင်းမပြုနိုင်ဘဲအသာတကြည်လက်နက်ချခဲ့ကြသည့်အတွက် ထန်းလေးရွာရှိ စကစလက်အောက်ခံ ပျူစောထီးများ၏ အသက်အန္တရာယ် တစုံတရာအရေးယူမှု မလုပ်ဘဲ သတိပေးပြီး၊ UG ရဲဘော်များအားလုံးပြန်လည်ဆုတ်ခွာခဲ့ရာ လုံခြုံဘေးကင်းစွာ တပ်ရင်းသို့ ပြန်လည် ‌ရောက်ရှိခဲ့ကြကြောင်း သိရှိရသည်။