ဖြူးမြို့နယ်၊ အုတ်ဖြတ် ရဲစခန်းနှင့် အုတ်ဖြတ် တံတားရှိ စစ်တပ် ဂိတ်တို့ကို တိုက်ခိုက်မှု စစ်သား ၁၀ ဦး သေဆုံး
ရန်ကုန်၊ ဇူလိုင် ၁၀
ပဲခူးတိုင်း၊ ဖြူးမြို့နယ်၊ အုတ်ဖြတ် ရဲစခန်းနှင့် အုတ်ဖြတ် တံတားရှိ အကြမ်းဖက် စစ်တပ်ဂိတ်တို့ကို KNLA၊ ရိုးမစစ်ကြောင်း ၂ ပူးပေါင်းတပ်ဖွဲ့တို့ တိုက်ခိုက်ရာ စစ်သား ၁၀ ဦးသေဆုံးခဲ့ကြောင်း ဒေသတွင်း တော်လှန်ရေး တပ်ဖွဲ့များက ရန်ကုန်ခေတ်သစ် မီဒီယာသို့ ပြောဆိုသည်။
ဇူလိုင်လ ၁၀ ရက်နေ့ မွန်းလွဲပိုင်းတွင် အုတ်ဖြတ် စစ်တောင်း မြစ်ကူးတံတားရှိ အကြမ်းဖက် စစ်တပ်၏ လုံခြုံရေး ဂိတ်ကို စနိုက်ပါဖြင့် သွားရောက် ပစ်ခတ်ခဲ့ရာ စစ်သား ၂ ဦးသေဆုံးခဲ့ကြောင်း၊ ထို့ပြင် ဒရုန်းဖြင့် ၆၀ မမဗုံးသီးချ တိုက်ခိုက်ခဲ့ရာ တပ်သား ၂ ဦး ထပ်မံ သေဆုံးခဲ့ကြောင်း သိရသည်။
အလားတူ ဇူလိုင်လ ၈ ရက်နေ့ကလည်း အုတ်ဖြတ်တံတားကို လုံခြုံရေးယူရန်လာသည့် အုတ်ဖြတ်ရဲစခန်းမှ စစ်သားများကို KNLA၊ ရိုးမစစ်ကြောင်း ၂ ပူးပေါင်းတပ်ဖွဲ့က ဒရုန်းဖြင့် ၆၀ မမ ဗုံးသီးချတိုက်ခိုက်ခဲ့ပြီး စစ်သား ၆ ဦး သေဆုံးခဲ့ကြောင်း ဒေသတွင်း တော်လှန်ရေး တပ်ဖွဲ့များက ပြောဆိုသည်။
