ဝက်လက်မြို့နယ်ကို စစ်ကြောင်းထိုးလာသည့် အကြမ်းဖက် စစ်တပ်၏ ခမရ ၃၆၈ မှ စစ်သား ၃ ဦး လက်နက်နှင့် အလင်းဝင်

ဝက်လက်မြို့နယ်ကို စစ်ကြောင်းထိုးလာသည့် အကြမ်းဖက် စစ်တပ်၏ ခမရ ၃၆၈ မှ စစ်သား ၃ ဦး လက်နက်နှင့် အလင်းဝင်

ရန်ကုန်၊ ဇူလိုင် ၂၃

စစ်ကိုင်းတိုင်း၊ ဝက်လက်မြို့နယ်ကို စစ်ကြောင်းထိုးလာသည့် အကြမ်းဖက် စစ်တပ်၏ ခမရ ၃၆၈ မှ စစ်သား ၃ ဦး လက်နက်နှင့် အလင်းဝင်လာကြောင်း ပြည်သူ့ရင်ခွင်-ဝက်လက်အဖွဲ့မှ တာဝန်ရှိသူ တစ်ဦးက ရန်ကုန်ခေတ်သစ် မီဒီယာသို့ ပြောကြားသည်။

ဇွန်လ ၂၅ ရက်နေ့က ဝက်လက်မြို့နယ်ကို စစ်ကြောင်းထိုးလျက်ရှိသော အကြမ်းဖက် စစ်တပ်၏ စကခ ၁၀ လက်အောက်ခံ ဖောင်းပြင်မြို့ အခြေစိုက် ခမရ ၃၆၈ မှ တပ်သား ၃ ဦးသည် လက်နက်များနှင့် တကွ CDM ပြုလုပ်လာကြောင်း သိရသည်။

ပြည်သူ့ရင်ခွင်ဝက်လက်သို့ ခိုလှုံရောက်ရှိလာသူများ၏ တပ်ရင်းမှူးမှာ ဒုဗိုလ်မှူးကြီး မျိုးချစ် ဟု သိရှိရပြီး စစ်ကြောင်းမှူးမှာ ဗိုလ်ကောင်းထက်ဇော် ဟု သိရှိရကာ အဆိုပါ အရာရှိ ၂ ဦး၏ မိသားစုနောက်ကြောင်းကို တော်လှန်ရေးရဲဘော် အချင်းချင်း ချိတ်ဆက်ဖော်ထုတ်လျက်ရှိကြောင်း ပြည်သူ့ရင်ခွင်-ဝက်လက်ထံမှ သိရှိရသည်။

ဝက်လက်မြို့နယ် အတွင်း တာဝန်ထမ်းဆောင်လျက်ရှိကြသော အကြမ်းဖက် စစ်တပ်အဖွဲ့ဝင်၊ ရဲတပ်ဖွဲ့နှင့် ဆက်စပ်တပ်ဖွဲ့များ အတွင်းရှိ တပ်ဖွဲ့ဝင်များ၊ ပြည်သူကိုမျက်နှာမူပြီး အမှန်တရားကို ချစ်မြတ်နိုး၍ ဓမ္မကိုလိုလားသော်လည်း အခြေနေမပေး၍ ပြည်သူ့ရင်ခွင်သို့ ဆက်သွယ်ရန် ခက်ခဲသည့် တပ်ဖွဲ့ဝင်များနှင့် ၎င်းတို့၏ မိသားစုဝင်များကို ဝက်လက်မြို့နယ်ပြည်သူ့ရင်ခွင်အနေဖြင့် ကြေငြာချက်အမှတ် (၁)၊ (၂)၊ (၃) တို့ကို သီးခြားစီထုတ်ပြန် ဖိတ်ခေါ်ခဲ့ပြီး ဖြစ်ကြောင်း၊ ပြည်သူ့ရင်ခွင်သို့ ခိုဝင်လာသူအများအပြားအား နွေးထွေးစွာ လက်ခံခဲ့ပြီး မိသားစုဝင်များပါ ကာကွယ်စောင့်ရှောက်ပေးလျက် ရှိကြောင်း သိရှိရသည်။

ထို့ပြင် ပြည်သူ့ရင်ခွင်သို့ ခိုလှုံလာသူအများစုသည် စစ်အာဏာရှင်နှင့် အပေါင်းအပါများကို ပြည်သူလူထုနှင့် အတူ လက်တွဲ၍ တိုက်ခိုက်ရေးကိစ္စ၊ ရဲလုပ်ငန်းကိစ္စ၊ PDF တပ်ဖွဲ့ဝင်များကို လေ့ကျင့်သင်ကြားပေးခြင်း ကိစ္စများတွင် လက်တွဲဆောင်ရွက်လျက်ရှိကြောင်း သိရသည်။

ပြည်သူ့ ရင်ခွင်-ဝက်လက်သည် မြန်မာတစ်နိုင်ငံလုံးရှိ CDM ပြုလုပ်လိုသူ တပ်ဖွဲ့ဝင်တိုင်းကို နွေးထွေးစွာ ကြိုဆိုဖိတ်ခေါ်ကြောင်း၊ ရောက်ရှိရာ မြို့နယ်တိုင်းရှိ တော်လှန်ရေး တပ်ဖွဲ့ဝင်များနှင့် ချိတ်ဆက်ပြီး အန္တရာယ်ကင်းရှင်းရန် အထူးဂရုစိုက် ကယ်ထုတ်ပေးမည် ဖြစ်ကြောင်း ပြည်သူ့ရင်ခွင်-ဝက်လက်မှ တာဝန်ရှိသူမှ ပြောကြားသည်။

ထို့ပြင် လက်နက်နှင့်အတူ CDM ပြုလုပ်လာသူတိုင်းအား ထိုက်ထိုက်တန်တန်ဆုငွေချီးမြှင့်ပေးလျက် ရှိပြီး ပြည်သူများအနေဖြင့်လည်း မိမိပတ်ဝန်းကျင်သို့ ရောက်ရှိအကူညီတောင်းခံလာပါက သက်ဆိုင်ရာ ရပ်ကျေး (ပကဖ)၊ (ပအဖ) အဖွဲ့ဝင်များကို အကြောင်းကြား၍ လိုအပ်သလို ကူညီ‌ဆောင်ရွက်ပေးကြပါရန်လည်း ဝက်လက်မြို့နယ်ပြည်သူ့ရင်ခွင် မှ မေတ္တာရပ်ခံ အပ်ကြောင်း ထုတ်ပြန်ထားသည်။