သပိတ်ကျင်းမြို့နယ်တွင် စစ်တပ်က စစ်ကြောင်းထိုးပြီးကျေးရွာများကို လှည့်လည် မီးရှို့နေသောကြောင့် ပြည်သူ ၁၀၀၀၀ ကျော်ထွက်ပြေးနေရ
ရန်ကုန်၊ ဩဂုတ် ၁၁
မန္တလေးတိုင်း၊ သပိတ်ကျင်းမြို့နယ်၊ တကောင်းတိုက်နယ်အတွင်းရှိ ကျေးရွာများကို အကြမ်းဖက် စစ်တပ် စစ်ကြောင်းက လှည့်လည်မီးရှို့ဖျက်ဆီးနေသဖြင့် ပြည်သူ ၁၀၀၀၀ ကျော် ထွက်ပြေးတိမ်း ရှောင်နေရကြောင်း သပိတ်ကျင်းမြို့နယ်ပြည်သူ့ကာကွယ်ရေးအဖွဲ့- ပကဖမှတာဝန်ရှိသူတစ်ဦးက ရန်ကုန်ခေတ်သစ်သတင်းဌာနထံသို့ပြောကြားသည်။
ဇူလိုင်လ ၂၉ ရက်နေ့မှ စတင်ပြီး အကြမ်းဖက်စစ်တပ်စစ်ကြောင်းမှ အင်အားရာချီအသုံးပြုကာ တကောင်းတိုက်နယ်အတွင်းရှိ ကျေးရွာများကို လှည့်လည်စစ်ကြောင်းထိုးနေပြီး တွေ့သမျှကျေးရွာ၊ နေအိမ်များကို မီးရှို့ဖျက်ဆီးသည့်အပြင် ပြည်သူများကိုလည်းဖမ်းဆီးသတ်ဖြတ်နေသဖြင့် ပြည်သူများမှ နေအိမ်စွန့်ခွာထွက်ပြေးနေကြရကြောင်း သိရသည်။
“အိမ်ခြေ ၁၀၀ ကျော်လောက်ရှိပြီ မီးရှို့ခံရတာ၊ သူတို့ကတွေ့ရင်တွေ့သလိုဝင်ရှို့ခဲ့တာ၊ ပြီးတော့ ရွာထဲ ဖြတ်တော့ မထင်ရင် မထင်သလို တွေ့တဲ့အိမ်မီးရှို့သွားတာ၊ ဖမ်းဆီးသတ်ဖြတ်ခံရမှုကတော့ ဩဂုတ်လ ၄ ရက်နေ့ဖြစ်သွားတဲ့ ကျောက်အိုက်ဖြစ်စဉ်တော့ရှိတယ်၊ ကျန်တာတေ့မရှိဘူး၊ ကျနော်တို့ ဘက်မှာ မိုး က တအားရွာများထားတဲ့ အရှိန်လဲပါတော့ ကားကြီးတွေ၊တွဲကားတွေ ၁၂ ဘီးကား တွေ မောင်းလို့မရ ဘူး၊ အဲလိုဆိုတော့ ထွန်စက်တွေ၊ ကျွဲတွေ၊ နွားတွေလှည်းတွေနဲ့ထွက်ပြေးနေရတာပေါ့၊ ဆိုင်ကယ် အချို့ လဲပါတယ်၊” ဟု သပိတ်ကျင်းမြို့နယ်ပြည်သူ့ကာကွယ်ရေးအဖွဲ့- ပကဖမှတာဝန်ရှိသူတစ်ဦးက ရန်ကုန် ခေတ်သစ်သတင်းဌာနထံသို့ပြောကြားသည်။
စစ်ဘေးရှောင်ပြည်သူများမှာ တောထဲ၊တောင်ထဲ၌ ကိုယ်အစု၊ သူ့အစု အဆင်ပြေသလို တိမ်းရှောင်နေရ ပြီး ခြင်ကိုက်ခံရမှုကြောင့် ငှက်ဖျားရောဂါခံစားနေရသည့်အပြင် ရက်ကြာလာသည်နှင့်အမျှ စားနပ်ရိက္ခာ အပြင်ကျန်းမာရေးစောင့်ရှောက်မှုအရေးပေါ်လိုအပ်နေကြောင်း သိရသည်။
အကြမ်းဖက်စစ်တပ်စစ်ကြောင်းထိုးမှုကြောင့် မင်းကုန်းကျေးရွာ၊ ဆယ်ဇင်းကုန်းကျေးရွာ၊ လက်ပန်ကုန်း ကျေးရွာ၊ ပေါ်တော်မူကျေးရွာ၊ မတောင်ကျေးရွာ၊ ကျောက်အိုက်ကျေးရွာ၊ ချိုချင်မြိုင်ကျေးရွာ၊ ဒေါမကြီး ကျေးရွာ၊ ပိန်းအိုင်ကျေးရွာ၊ ဝါးပိုးရုံကျေးရွာတို့မှ ပြည်သူ တစ်သောင်းကျော် စစ်ဘေးရှောင်နေပြီး မင်း ကုန်းကျေးရွာ၊ ဆယ်ဇင်းကုန်းကျေးရွာ၊ လက်ပန်ကုန်းကျေးရွာ၊ ကျောက်အိုက်ကျေးရွာ၊ ဝါးပိုးရုံကျေး ရွာမှ နေအိမ် တစ်ရာကျော်မီးရှို့ဖျက်ဆီးခံထားရကြောင်း၊ အကြမ်းဖက်စစ်ကြောင်းမှာ ထွက်ခွာခြင်း မရှိသေးပဲ မိုးရုံကျေးရွာကို မီးရှို့နေသဖြင့် အတိအကျ စာရင်းကောက်ယူနိုင်ခြင်းမရှိသေးကြောင်း သိရ သည်။
