ရှမ်းပြည်နယ်တွင် စစ်ကောင်စီလက်အောက်ခံ Non-CDM ဝန်ထမ်းများအားလုံး စစ်တပ်၏ အရန်အင်အားအဖြစ် တပ်ရင်းအသွင်ဖွဲ့စည်း တာဝန်ပေးအပ်ရန် ညွှန်ကြား
ရန်ကုန်၊ ဩဂုတ် ၁၄
အကြမ်းဖက်စစ်ကောင်စီက ရှမ်းပြည်နယ်အတွင်း Non-CDM ဝန်ထမ်းများအားလုံးကို စစ်တပ်၏ အရန်အင်အားအဖြစ် စုဆောင်းပြီး တပ်ရင်းအသွင်ဖွဲ့စည်း တာဝန်ပေးအပ်ရန် ညွှန်ကြားထား ကြောင်း သိရှိရသည်။
ဩဂုတ်လ ၉ ရက်နေ့ ၊ ရှမ်းပြည်နယ်စစ်ကောင်စီ လုံခြုံရေးနှင့် နယ်စပ်ရေးရာဝန်ကြီး ဗိုလ်မှူးကြီး စိန်ဝင်း လက်မှတ်ထိုး၍ ညွှန်ကြားထားသော အကြောင်းကြားစာတွင် ရှမ်းပြည်နယ်၊ တောင်ပိုင်း အရှေ့ပိုင်းတိုင်းစစ်ဌာနချုပ် နယ်မြေအတွင်း ပြည်သူ့စစ် မဟာဗျူဟာ ဖော်ဆောင်ရန် အတွက် ဌနာဆိုင်ရာ စာရင်းပြုစု ပေးပိုရန့် ညွှန်ကြားထားခြင်း ဖြစ်သည်။
အရှေ့ပိုင်းတိုင်းစစ်ဌာနချုပ် နယ်မြေအတွင်း ပြည်သူ့စစ်မဟာဗျူဟာ ဖော်ဆောင်ရန်အတွက် စစ်တပ်၏ အရန်အင်အားများကို ပြည်သူ့စစ်တပ်ရင်း အသွင် ဖွဲ့စည်းခြင်း၊ အင်းအား အခြေအနေပေါ် မူတည်၍ တာဝန်ခွဲဝေပေးခြင်းနှင့် အရေးကြုံလာပါက အရန်အင်အားများဖြင့် ဖွဲ့စည်းတာဝန်ပေးအပ်မည့် စီမံချက်များ ရေးဆွဲတင်ပြရမည်ဖြစ်ကြောင်း ညွှန်ကြားစာတွင် ရေးသားထားသည်။
ထို့ကြောင့် အရှေ့ပိုင်းတိုင်းစစ်ဌာနချုပ်နယ်မြေအတွင်း ပြည်နယ်ရုံးများ၊ တောင်ကြီးခရိုင်၊ ကလောခရိုင်၊ ပအိုဝ်း ကိုယ်ပိုင်အုပ်ချုပ်ခွင့်ရဒေသနှင့် ဓနု ကိုယ်ပိုင်အုပ်ချုပ်ခွင့်ရ ဒေသတို့ရှိ ခရိုင်ရုံးနှင့် မြို့နယ်အလိုက် ဝန်ထမ်း(ကျား/မ- ရဲတပ်ဖွဲ့မပါ ) စာရင်းကို နောက်ဆက်တွဲပါ အတိုင်းပြုစု၍ ဩဂုတ်လ ၁၇ ရက်နေ့ အရောက် ပြုစု တင်ပြရန် အကြောင်းကြား ထားကြောင်း သိရှိရသည်။
” ကျနော်တို့ ဝန်ထမ်းတွေကို ဖောင်ကြီး သင်တန်းမှာ လက်နက်ငယ် ပစ်ခတ်သင်တန်းနဲ့ စစ်ရေး သင်တန်းတွေကို အဓိက ပေးနေခဲ့တာ။ အခုလို ညွှန်ကြားချက် တစ်နေ့နေ့မှာ ထွက်လာမယ်လို့ မျှော်လင့်ထားတာ။ အခုကတော့ တကယ်ထွက်လာပြီ။ ဝန်ထမ်းတွေကို စစ်တိုက်ခိုင်းမယ့် သဘောပဲ။ ဒီညွှန်ကြားချက်ကြောင့်တော့ တချို့ ဝန်ထမ်းတွေတော့ ပြေးမယ်ထင်တယ်” ဟု တောင်ကြီး မြို့နယ် အထွေထွေအုပ်ချုပ်ရေးဦးစီးဌာနမှ အရာရှိတစ်ဦးက ပြောဆိုသည်။
