ဖရူဆိုမြို့နယ်၊ ထီးသော်ကူးရွာတွင် တပ်စွဲထားသော စစ်တပ်စခန်းကို ဝင် ရောက် တိုက်ခိုက်မှု စစ်တပ်ဘက်မှ သေဆုံးမှု များပြားပြီး လက်နက် ခဲယမ်း များ သိမ်းဆည်းရရှိ
ရန်ကုန်၊ ဩဂုတ် ၁၄
ကရင်နီပြည်နယ်၊ ဖရူဆိုမြို့နယ်၊ ထီးသော်ကူးကျေးရွာတွင် တပ်စွဲထားသော စစ်ကောင်စီ၏ တပ်စခန်းကို ကရင်နီ တော်လှန်ရေးတပ်ဖွဲ့များက ဝင်ရောက် တိုက်ခိုက်ရာ စစ်တပ်ဘက်မှ သေဆုံးထိခိုက်မှုများပြားပြီး လက်နက်ခဲယမ်းများ သိမ်းဆည်းရရှိကြောင်း ကရင်နီတော်လှန်ရေး ရှေ့တန်းသတင်းရင်းမြစ် တချို့ ထံမှ သိရှိရသည်။
ဩဂုတ်လ ၁၂ ရက်နေ့ ညနေ ၆ နာရီဝန်းကျင်အချိန်တွင် ဖရူဆိုမြို့နယ်၊ ထီးသော် ကူး ကျေးရွာအနီးရှိ စစ်ကောင်စီတပ်စခန်းကို ဝင်ရောက် တိုက်ခိုက် ခဲ့ခြင်းဖြစ်ပြီး ည ၇ နာရီကျော်အချိန်အထိ တိုက်ပွဲဖြစ်ပွားခဲ့ကြောင်း၊ ယင်း နောက် စစ်တပ်က လေကြောင်းပစ်ခတ်မှုနှင့် လက်နက်ကြီးများ ပစ်ကူပေးမှု များ လုပ်ဆောင်ခဲ့ကြောင်း သိရှိရသည်။
“ကျနော်တို့ တပ်တွေတော့ မပါဘူး။ ဒါပေမယ့် အဲဒီဘက်မှာ တိုက်နေတဲ့ အဖွဲ့တွေဆီက ပြန်သိရတာက ထီးသော်ကူးကျေးရွာဘက်မှာ စစ်ကြောင်းဝင်လာပြီး ယာယီစခန်းချထားတာကို ဝင်တိုက်တာ။ စစ်တပ်က အင်အား ၄၀ ဝန်းကျင်လောက်ရှိမယ်လို့ ပြောတယ်။ စစ်ကောင်စီဘက်က ပြေးတဲ့လူတွေလည်း ပြေးကုန်တယ်။ သေတဲ့လူတွေလည်း သေကြတယ်။ လက်နက်ခဲယမ်းတွေ အတော်ရတယ်လို့သိရပါတယ်။ အသေးစိတ်တော့ သူတို့ထုတ်ပြန်မှပဲ သိရမယ်။ စစ်တပ် စစ်ကြောင်းတွေက ကရင်နီထဲကို သေမှန်းသိရက်နဲ့ကို အသေခံပြီး ဝင်လာနေကြတာ။ သေလည်းသေတာပဲ” ဟု ဒီးမော့ဆိုတွင် တိုက်ပွဲဝင်နေသော ကရင်နီတော်လှန်ရေးတပ်ဖွဲ့တစ်ခုမှ ရှေ့တန်းသတင်းရင်းမြစ်က ပြောဆိုသည်။
ကရင်နီပြည်နယ်အတွင်းသို့ ထိုးစစ်ဆင်နေသော အကြမ်းဖက်စစ်တပ်စစ်ကြောင်းများမှာ သေဆုံးမှုများနှင့် လက်နက် ခဲယမ်း ဆုံးရှုံးမှုများ ဆက်တိုက်ဆိုသလိုဖြစ်ပွားလျက်ရှိရာ ဇူလိုင်လ ၂၈ ရက်နေ့ ကရင်နီပြည်နယ်၊ ဖားဆောင်းတိုက်ပွဲတွင် စစ်ကောင်စီ တပ်ဘက်မှ လက်နက်အများအပြားကို တော်လှန်ရေးတပ်ဖွဲ့များက သိမ်းဆည်းရရှိကြောင်း ဒီးမော့ဆို PDF-1102 က တရားဝင် သတင်းထုတ်ပြန်ထားသည်။
ထို့ပြင် ဩဂုတ်လ ၁၀ ရက်နေ့ နှင့် ဩဂုတ်လ ၁၂ ရက်နေ့ ဒီးမော့ဆိုမြို့နယ် တွင်ဖြစ်ပွားခဲ့သော တိုက်ပွဲတွင် စစ်ကောင်စီတပ်ဘက်မှ အနည်းဆုံး ၂၀ ဦးထက်မနည်းသေဆုံးခဲ့ကြောင်း၊ သေဆုံးသူများတွင် စစ်မှုထမ်းကောင်း ဘွဲ့တံဆိပ်ရ အကြမ်းဖက်စစ်သားများ ပါဝင်ကြောင်း ကရင်နီတော်လှန်ရေး သတင်းရင်းမြစ်တချို့က ဆိုသည်။
