ကချင်ပြည်နယ်၊ မိုးညှင်းမြို့နယ်တွင် စစ်ကောင်စီတပ်အရာရှိတချို့နှင့် စီးပွားရေးသမားများ ပူးပေါင်း၍ တရားမဝင် ရွှေတူးဖော်မှုများကြောင့် အမျိုးသားအမွေအနှစ် အင်းတော်ကြီးအိုင် ပျက်စီးမည့်အရေး စိုးရိမ်နေရ
ရန်ကုန်၊ ဩဂုတ် ၁၄
ကချင်ပြည်နယ်၊ မိုးညှင်းမြို့နယ်တွင် စစ်ကောင်စီတပ်အရာရှိတချို့နှင့် စီးပွားရေးသမားများ ပူးပေါင်း၍ တရားမဝင် ရွှေတူးဖော်မှုများကြောင့် အမျိုးသားအမွေအနှစ် အင်းတော်ကြီးအိုင် ပျက်စီးမည့်အရေး စိုးရိမ်နေရကြောင်း ဒေသပြည်သူများက ရန်ကုန်ခေတ်သစ်သတင်းဌာနထံသို့ ပြောဆိုသည်။
ကချင်ပြည်နယ်၊ မိုးညှင်းမြို့နယ်၊ အင်းတော်ကြီးဒေသတွင် မမုန်ကိုင်ရွာ ရွှေလုပ်ငန်း ရှာဖွေတူးဖော်သူ လုပ်ငန်းရှင်ခရိုနီများဖြစ်ကြသည့် ရခိုင်ဆန်းဝင်း l မိုးထိမိုးမိ ၊ ကိုထွန်းရင်၊ အောင်ဖြိုးဝေ ၊ ဦးဆယ်ဘို ၊ မိုင်းနောင်ရွာ ရွှေရှာဖွေတူးဖော်သူလုပ်ငန်းရှင်ခရိုနီများ ဖြစ်ကြသည့် ဦးဇော်ဌေး ၊ ဦးသန်းဇော်အေး၊ ကိုအောင်စိုးဦး၊ ဦးအားသာ၊
ကိုဖိုးချွန် ၊ ဦးဌေးမောင်+ဒေါ်လွင်းငယ် ဦးပြူးမောင် ၊ ဦးဖိုးစော့ ၊ မိုင်းနောင်ရွာ အုပ်ချုပ်ရေးမှူး ဦးစိုးမြင့်၊
နန်မွန်းမြို့မှ ဦး၀င်းထိန် ၊ နန့်မီးလောင်ရွာမှ ခရိုနီအောင်နိုင်ဝင်းတို့က ခမရ၃၈၁ ဗိုလ်ကြီးအောင်မျိုးဟန်နှင့်် ခလရ ၄၂ မှ တပ်ရင်းမှူး လှိုင်ဘွားထွန်းထံ လာဘ်ငွေပေး၍ တရားမဝင် ရွှေတူးဖော်ကြကြောင်း၊ ယင်းသို့ တရားမဝင် ရွှေတူးဖော်မှုများကြောင့် အင်းတော်ကြီးအိုင် ပျက်စီးမည့် အခြေအနေရှိလာကြောင်း သိရှိရသည်။
“ရခိုင်ဆန်းဝင်းက မိုးထိမိုးမိနှင့်တွဲကာ ရွှေမျောသမား ၂၀၀ ကျော်ကိုဦးဆောင်တယ်။ နန့်မွန်းအုပ်ချုပ်ရေးမှုးဝင်းထိန်က နန့်မွန်းရှိ ရွှေမျော ၇၀ ကိုဦးဆောင်ကာ စစ်တပ်ကို ငွေပေးပြီး ရွှေတူးနေခြင်းဖြစ်ပါတယ်။ မြေစာများစနစ်တကျလုပ်ဆောင်ခြင်းမရှိခြင်း၊ သစ်တောများဖျက်ဆီးခံရခြင်းတို့ကြောင့် အမျိုးသားအမွေအနှစ်ဖြစ်သည့် အင်းတော်ကြီးအိုင်ပျက်ဆီးမည့်အရေးနှင့်ကြုံတွေ့လာရပါတယ်” ဟု ဒေသပြည်သူတစ်ဦးက ပြောဆိုသည်။
အလားတူ နန့်မီးလောင်ကျေးရွာမှ အောင်နိုင်ဝင်းဦးဆောင်သော ရွှေတူးသမားများကလည်း စစ်ကောင်စီတပ်နှင့်ပေါင်းကာ အင်းတော်ကြီးအိုင်ဒေသတွင် တရားမဝင် ရွှေတူးဖော်မှုများဖြင့် တောတောင်ရေမြေများကို ဖျက်ဆီးနေကြောင်း သိရှိရသည်။
ထိုသို့ တရားမဝင် ရွှေတူးဖော်မှုများနှင့် မဆင်မခြင် မြေစာပုံ စွန့်ပစ်မှုများကြောင့် ဇူလိုင်လ ၂၆ ရက်နေ့မှ ဇူလိုင်လ ၂၇ ရက်နေ့ အင်းတော်ကြီးဒေသတွင် မိုးများသည်ထန်းစွာ ရွာသွန်းပြီး ရေကြီးရေလျှံမှုများဖြစ်ပေါ်ကြောင်း၊ မကြုံဖူးသည့် ရေကြီးမှုများ၊ လယ်မြေများ ပျက်စီးခြင်းများ ဆက်တိုက်ဖြစ်ပေါ်ခဲ့ကြောင်း သိရှိရသည်။
“ဇူလိုင် ၂၆ ရက်နေ့ကစပြီး ဇူလိုင်လ ၂၇ ရက်နေ့ အထိ မိုးရွာလိုက်သာ အင်းတော်ကြီးဒေသ မိုင်းနောင်ရွာ ရေနစ်ပြီး မိုင်းနောင်ရွာရှိ အထက်တန်းစာသင်ကျောင်း ခြံအုတ်စည်းရိုး ပြိုကျတယ်။ ရွာတစ်ခြမ်းရေနစ် ကုန်စုံဆိုင်တွေ ရေစို၊ ရေမျော ဆုံးရှုံးသွားပါတယ်။ ဒါတွေအားလုံးက အင်းတော်ကြီးဒေသ၊ မိုင်းနောင်ရွာ၊ မမုန်ကိုင်ရွာ အနောက်ဘက် မှာရွှေတူးဖော်ခြင်း၊ ခရိုနီတွေရဲ့ ရွှေကျင်းတူးဖော်ရာမှာ စည်းကမ်းမရှိဘဲ မြေစာစွန့်ပစ်ခြင်း ၊ သစ်/ဝါး များအလွန့်ခုတ်လှဲကြခြင်းနဲ့ ဥပဒေ စိုးမိုးမှုမရှိခြင်း၊ လက်နက်ကိုင်အဖွဲ့အစည်းများ လာဘ် ပေးလာဘ်ယူခြင်း ကြောင့် သဘာဝရဲ့ ဒဏ်ကို လူထုကခံစားနေရခြင်းဖြစ်ပါတယ်” ဟု ဒေသပြည်သူက ရှင်းပြသည်။
တရားမဝင် ရွှေတူးလုပ်ငန်းများကြောင့် အင်းတော်ကြီးဒေသ၊ ရေကြီး ရေလျှံမှုများဖြစ်ပေါ်ပြီး လယ်မြေဧက ရာပေါင်းများစွာ ပျက်စီးခဲ့ရာတွင် လယ်မြေအားလုံးစုစုပေါင်း ၂၅၀ ဧက နီးပါးတွင် စိုက်ပျိုးမရသည်အထိ ပျက်စီးမှုများ ဖြစ်ပေါ်ခဲ့ကြောင်း သိရှိရသည်။
“အင်းတော်ကြီးဒေသ နန့်မွန်း၊ မိုင်းနောင်၊ မမုံကိုင်၊ ဆနွင်းကုန်း ၊ အင်းသာကျေးရွာတွေမှာ မိုးသည်းထန်စွာ ရွာလို့ တောင်တွေပြိုပြီး သစ်တုံး၊ အမှိုက်တွေ၊ နွံ့ တွေ ကျောက်တုံးတွေ၊ သစ်ပင်တွေေက မိုးရေနှင့်အတူ လယ်ယာမြေ ရွာထဲတို့ ဝင်ရောက်တယ်။ လယ်မြေများပျက်စီးတဲ့အပြင် တောင်ပြိုကာ ကားလမ်းပိတ်ဆို့သွားခဲ့ပါတယ်။ ခလရ ၄၂ ၊ ခလရ ၁၁ ၊ ခမရ ၃၈၁ တို့နဲ့ပေါင်းကာ စည်းကမ်းမဲ့ရွှေတူးနေတဲ့ခရိုနီအုပ်စု နဲ့သစ်တောပြုန်း အောင်သစ်ခုတ်နေတဲ့ အုပ်ကြီးကြောင့် ဒီလိုတွေ ပျက်စီးမှုတွေ ဖြစ်ပေါ်တာဖြစ်ပါတယ်” ဟု ဒေသပြည်သူက ရှင်းပြသည်။
ကချင်ပြည်နယ်၊ မိုးညှင်းမြို့နယ်၊ အင်းတော်ကြီးဒေသတွင် နယ်မြေစိုးနေသော KIO/KIA အဖွဲ့အနေဖြင့်လည်း ယင်းကဲ့သို့ အမျိုးသားအမွှေအနှစ် အင်းတော်ကြီးအိုင်ကို ပျက်စီးစေနိုင်သော တရားမဝင် ရွှေတူးဖော်မှုများ၊ သစ်ခုတ်လှဲခြင်းများကို ပြင်းပြင်းထန်ထန် ကိုင်တွယ်ခြင်းနှင့် အင်းတော်ကြီးဒေသကို ဖျက်ဆီးနေသူများကို အရေးယူရန် ဒေသပြည်သူများက တောင်းဆိုကြသည်။
