မူဆယ်တွင် စစ်တပ် လက်အောက်ခံ ပြည်သူ့စစ်အဖွဲ့က ပြည်သူ ၄ ဦးကို ရိုက်နှက် ဖမ်းဆီးပြီး ၁ ဦးကို သတ်ဖြတ်ရန်ကုန်၊ သြဂုတ် ၁၄ရှမ်းပြည်နယ်၊ မူဆယ်မြို့နယ်တွင် အကြမ်းဖက် စစ်တပ် လက်အောက်ခံ ပြည်သူ့စစ်အဖွဲ့က ပြည်သူ ၄ ဦးကို ရိုက်နှက် ဖမ်းဆီးပြီး ၁ ဦးကို သတ်ဖြတ်ခဲ့ကြောင်း PSLF/TNLA သတင်းနှင့် ပြန်ကြားရေးဌာနထံမှ သိရသည်။ မူဆယ်မြို့နယ်တွင် အကြမ်းဖက် စစ်တပ် နှင့် TNLA တို့ သြဂုတ်လအတွင်း ဖြစ်ပွားခဲ့သော တိုက်ပွဲများအတွင်း စစ်တပ် လက်အောက်ခံ ပြည်သူ့စစ်အဖွဲ့က ရိုက်နှက် ဖမ်းဆီးခေါ်ဆောင်သွားသည့် ပြည်သူ ၄ ဦးအနက် ၁ ဦးမှာ မေးမြန်းစစ်ဆေးစဥ် ရိုက်နှက်မှု ဒဏ်ကြောင့် သေဆုံးသွားခဲ့ပြီး ကျန် ၃ ဦးမှာ ပြင်းထန်ဒဏ်ရာများဖြင့် ပြန်လည် လွတ်မြောက်လာကြောင်း သိရသည်။အဆိုပါ ပြည်သူ့စစ်အဖွဲ့က ဖမ်းဆီးသွားသော ပြည်သူ ၄ ဦးမှာ နမ့်ကတ်အုပ်စု မိုင်းဆက်ရွာမှ အသက် ၃၆ နှစ်အရွယ် ဦးအိုက်မြင့်၊ အသက် ၂၂ နှစ်အရွယ် လုမ်မြတ်အောင်၊ အသက် ၂၄ နှစ်အရွယ် ရီအောင်ဝင်း နှင့် အသက် ၁၇ နှစ်အရွယ် အိုက်မောင်ဦး တို့ဖြစ်ပြီး အသက် ၂၄ နှစ်အရွယ် ရီးအောင်ဝင်းကို ပြည်သူ့စစ်အဖွဲ့က ရိုက်နှက် စစ်ဆေးစဥ် သေဆုံးခဲ့ကြောင်း သိရသည်။ ပြည်သူ့စစ်အဖွဲ့က ပြည်သူ ၄ ဦးကို TNLA တပ်ဖွဲ့ဝင်ဟု စွတ်စွဲ၍ ဆိုင်ခေါင်ရွာမှ ဖမ်းဆီး ခေါ်ဆောင်သွားခြင်း ဖြစ်ကြောင်း၊ ဖမ်းဆီး ခေါ်ဆောင်သွားသည့် ပြည်သူ ၄ ဦးကို အစာမကျွေးဘဲ ၂ ရက်တိုင်တိုင် ရိုက်နှက်ထိုးကြိတ်ခဲ့ကြောင်း၊ ပြန်လွတ်လာသည့် ပြည်သူ ၃ ဦးကို မျက်နှာကိုအဝတ်ဖြင့် စည်းကာ မန်မိုင်ရွာအနီးရှိ အမှိုက်ပုံတွင် လာရောက် စွန့်ပစ်ထားခဲ့ခြင်းဖြစ်ကြောင်း သိရှိရသည်။
