သထုံမြို့နယ်ရှိ ကျေးရွာများကို စစ်တပ်က စစ်ကြောင်းထိုး ဝင်ရောက်ပြီး ပြည်သူ ၁ ဦးကို ပစ်သတ်ကာ နေအိမ်များကို ဖျက်ဆီးပြီး ပစ္စည်းများကို ခိုးယူသွား
ရန်ကုန်၊ သြဂုတ် ၁၄
မွန်ပြည်နယ်၊ သထုံမြို့နယ်ရှိ ကျေးရွာများကို အကြမ်းဖက် စစ်တပ်က စစ်ကြောင်းထိုး ဝင်ရောက်လာပြီး ပြည်သူ ၁ ဦးကို ပစ်သတ်ကာ နေအိမ်နှင့် ပစ္စည်းများကို ဖျက်ဆီးသွားကြောင်း ကေအဲန်ယူ−ဗဟိုက ထုတ်ပြန်ထားသည်။
ဇူလိုင်လ ၂၅ ရက်နေ့မှ သြဂုတ်လ ၆ ရက်နေ့အထိ အကြမ်းဖက် စစ်တပ်က သထုံမြို့နယ် အတွင်း စစ်ကြောင်းထိုး ဝင်ရောက်လာပြီး ပြည်သူပိုင် ပစ္စည်းများအား ခိုးယူခြင်း၊ နေအိမ်များကို မွှေနှောက် ဖျက်ဆီးခြင်း၊ လက်နက်ကြီးများဖြင့် ပြည်သူများ နေထိုင်ရာ နေရာများကို ပစ်ခတ်ခြင်းများနှင့် ပြည်သူလူထုကို အကြောင်းမဲ့ သေနတ်ဖြင့် ပစ်ခတ်ခြင်းကြောင့် ပြည်သူ ၁ ဦးသေဆုံးခဲ့ကြောင်း သိရသည်။
ဇူလိုင်လ ၂၅ ရက်နေ့နှင့် ၂၆ ရက်နေ့တွင် အကြမ်းဖက် စစ်တပ် စစ်ကြောင်းက ကေအဲန်ယူ-သထုံမြို့နယ်၊ ရွှေရောင်ပြကျေးနယ်၊ ခလောက်အင်းရွာနေရှိ ပြည်သူ ၃ ဦး၏ ပစ္စည်းများကိုခိုးယူသွားကြောင်း၊ ဇူလိုင်လ ၂၆ ရက်နေ့တွင် ရွှေရောင်ပြရွာသား စောဒေါ်လာသည် ရွာထဲကို ဆိုင်ကယ်စီးလာစဥ် အကြောင်းအရင်းမရှိဘဲ ပစ်ခတ်ခဲ့သောကြောင့် သေဆုံးခဲ့ပြီး သြဂုတ်လ ၈ ရက်နေ့၌ ရွာပြင်အနီးနားတွင် ပြန်လည်တွေ့ရှိခဲ့ကြောင်း သိရှိရသည်။
သြဂုတ်လ ၅ ရက် နှင့် ၆ ရက်နေ့တွင် အကြမ်းဖက် စစ်တပ် စစ်ကြောင်သည် ကေအဲန်ယူ-သထုံမြို့နယ်၊ ရွှေရောင်ပြကျေးနယ်၊ မရမ်းကုန်းကျေးရွာမှ ပြည်သူပိုင် ပစ္စည်များကို ထပ်မံ ခိုးယူသွားကြောင်း သိရသည်။
အကြမ်းဖက် စစ်တပ် စစ်ကြောင်းသည် ကျေးရွာ အတွင်း လက်နက်ကြီးများဖြင့် ပစ်ခတ်မှုကြောင့် သထုံမြို့နယ်၊ ရွှေရောင်ပြကျေးနယ်၊ မရမ်းကုန်းကျေးရွာမှ ပြည်သူပိုင်နေအိမ် ၁၀ လုံးပျက်စီးခဲ့ကြောင်း သိရှိရသည်။
