မြ၀တီမြို့နယ်၊ လက်ခတ်တောင်ကို စစ်တပ်က တိုက်လေယာဉ်ဖြင့် ဗုံးကျဲပြီး လက်နက်ကြီးများဖြင့် ဆက်တိုက်ပစ်ခတ်
ရန်ကုန်၊ ဩဂုတ် ၁၅
ကရင်ပြည်နယ်၊ မြ၀တီမြို့နယ်၊ လက်ခတ်တောင်တွင် တိုက်ပွဲများ အပြင်း အထန် ဖြစ်ပွားနေပြီး စစ်တပ်က လက်နက်ကြီးများ ဆက်တိုက်ပစ်ခတ်နေကာ တိုက်လေယာဉ်များဖြင့် ဆက်တိုက် ဗုံးကျဲနေကြောင်း မြ၀တီမြို့ ပြည်သူများက ရန်ကုန်ခေတ်သစ်သတင်းဌာနထံသို့ ပြောဆိုသည်။
ဩဂုတ် ၁၅ ရက်နေ့ နံနက် ၄ နာရီ ၃၀ မိနစ်အချိန် KNLA နှင့် PDF တပ်များ သိမ်းပိုက်ထားသော လက်ခတ်တောင်ကို အကြမ်းဖက်စစ်တပ်က အပြင်း အထန် ထိုးစစ်ဆင်လာပြီး လက်နက်ကြီးများဖြင့် ဆက်တိုက် ပစ်ခတ်ခဲ့ကြောင်း ၊ ထိုင်း-မြန်မာ နယ်စပ် ထိုင်းဘက်ခြမ်း၊ မဲဆောက်မြို့မှပင် ပေါက်ကွဲသံများ ကြားနေ ရကြောင်း သိရှိရသည်။
“လက်ခတ်တောင်ကို တိုက်လေယာဉ်နဲ့ ဗုံးကျဲနေတာ မဲဆောက်ဘက်ကနေ မြင်နေရတယ်။ မီးခိုးလုံးတွေ လှိမ့်တက်နေတာ။ လက်နက်ကြီးတွေကလည်း တစ်ချိန်လုံးပစ်နေတာ” ဟု မဲဆောက်ဘက်ခြမ်းမှ ပြည်သူတစ်ဦးက ပြောဆိုသည်။
မြ၀တီမြို့နယ်တွင် အကြမ်းဖက် စစ်တပ်၏ အရေးပါသည့် လက်ခတ်တောင် စခန်းကုန်းကို တော်လှန်ရေးပူးပေါင်းတပ်ဖွဲ့များက ဇူလိုင် ၂၁ ရက်နေ့တွင် သိမ်းပိုက်ခဲ့ချိန်မှစတင်၍ သြဂုတ်လ ၁၃ ရက်နေ့အထိ အကြမ်းဖက် စစ်တပ်က လက်ခက်တောင်စခန်းကုန်းကို ပြန်လည်ရရှိရန် အင်အားအလုံးအရင်းဖြင့် စစ်ကြောင်းထိုး တိုက်ခိုက်မှုကြောင့် တိုက်ပွဲပေါင်း ၁၀ ကြိမ်ထက်မနည်း ဖြစ်ပွားခဲ့ကြောင်း၊ စစ်တပ်ဘက်မှ စစ်သား ၁၇ ဦး သေဆုံး ကာ ၃၄ ဦး ထိခိုက်ဒဏ်ရာရရှိခဲ့ကြောင်း ကော်ဘရာစစ်ကြောင်းက သတင်း ထုတ်ပြန်သည်။
ဓာတ်ပုံ- လက်ခတ်တောင်ကို တိုက်လေယာဉ်ဖြင့် ဗုံးကျဲနေမှုကို ထိုင်းနိုင်ငံ မဲဆောက်ဘက်ခြမ်းမှ မြင်နေရစဉ်။
